CNA ၊မြတ်သူ။
စစ်ကောင်စီရဲ့ ထိန်းချုပ်ထားဆဲဖြစ်တဲ့ စစ်တွေ ၊ကျောက်ဖြူ နဲ့ မာန်အောင်မြို့နယ်တွေမှာ စစ်ကောင်စီက မတ်လ ၁၇ ရက်နေ့ကတည်းကပင် တက္ကသိုလ်ဝင်ခွင့် စာမေးပွဲကိုကျင်းပ ပြုလုပ်နေတာ ဖြစ်ပြီးတော့ စာမေးပွဲဝင်ခွင့်လျှောက်လွှာတင်ထားတဲ့ ကျောင်းသား ဦးရေ ၃၂၀၀ ထဲက ၁၅၀၀ ကျော်သာ လာရောက်ဖြေဆိုသူရှိတယ်လို့ စစ်ကောင်စီက ဒီနေ့မှာ သတင်းထုတ်ပြန်လာပါတယ်။
ရခိုင်တကျော့ပြန်တိုက်ပွဲ အတွင်းမှာ အာရက္ခတပ်တော်ဟာ ရခိုင်က မြို့နယ် ၁၇ ခု ထဲက ၁၄ မြို့နယ်ကို အပြီးသတ်သိမ်းပိုက်ရရှိထားပြီးနောက် စစ်ကောင်စီဟာ သူတို့ ထိန်းချုပ်ထားဆဲ ဖြစ်တဲ့ စစ်တွေမြို့မှာ စာစစ်ဌာန (၄) ခု ၊ ကျောက်ဖြူမြို့မှာ စာစစ်ဌာန (၂) ခု နဲ့ မာန်အောင်မြို့မှာ စာစစ်ဌာန (၂) ခု ဖွင့်လှစ်ကာ တက္ကသိုလ်ဝင်ခွင့် စာမေးပွဲကိုကျင်းပပြုလုပ်နေတာလည်း ဖြစ်ပါတယ်။
လက်ရှိမှာ တော့ စစ်တွေ နဲ့ ကျောက်ဖြူမြို့တွေ မှာ လည်း စစ်ကောင်စီ နဲ့ အာရက္ခတပ်တော်တို့ နှစ်ဖက်ပစ်ခတ်တိုက်ခိုက်တာတွေ ရှိနေတဲ့ အတွက် အဲဒီမြို့နယ်တွေမှာ ရှိနေတဲ့ကျောင်းသူ ကျောင်းသားတွေ ဟာ လုံခြုံရေး စိုးရိမ်ရတာ စစ်ဘေးရှောင်ထွက်ခွါနေရတာတွေ ကြောင့် တက္ကသိုလ်ဝင်ခွင့် စာမေးပွဲ လာရောက်ဖြေဆိုသူတွေ ပျက်ကွက်မှု အများဆုံးမှာ ရှိနေတာ ဖြစ်တယ်လို့မာန်အောင်မြို့နယ် ပညာရေးမှူး ရုံးက အရာရှိတစ်ဦးက CNA ကို ပြောပါတယ်။
“ကျနော်တို့ အခု သိရသလောက်ပျက်ကွက်မှု အများဆုံးကတော့ စစ်တွေ နဲ့ ကျောက်ဖြူပါ မာန်အောင်မှာကတော့ အဲဒီလောက်ထိပျက်ကွက်မှုမရှိဘူး။အဓိကတော့ အခုကလုံခြုံရေးလည်း စိုးရိမ်ရတယ် ပြီးတော့ စစ်ရှောင်ထွက်သွားတဲ့ အထဲမှာလည်း ကျောင်းသားတွေက တော်တော် များများရှိနေတယ် ပျက်တာကတော့ စစ်တွေ နဲ့ ကျောက်ဖြူက ပျက်ကွက်တာ ပိုများတယ်”လို့ သူကဆိုပါတယ်။
ရခိုင်မှာ စစ်ကောင်စီက အာဏာသိမ်းပြီးနောက်ပိုင်း ၂၀၂၂ – ၂၀၂၃ ခုနှစ်မှာ တက္ကသိုလ်ဝင်တန်းစာမေးပွဲဖြေဆိုခဲ့သူ ကျောင်းသား ဦးရေ စုစုပေါင်း ၁၆,၉၂၈ ဦး ရှိခဲ့ပြီး ၂၀၂၃-၂၀၂၄ ခုနှစ်မှာတော့တက္ကသိုလ်ဝင် စာမေးပွဲဝင်ရောက်ဖြေဆိုသူဟာ ၈, ၅၃၄ ရှိခဲ့ပြီး ဒီနှစ်မှာတော့ စာမေးပွဲ ဝင်ရောက်ဖြေဆိုတဲ့ ကျောင်းသား ဦးရေဟာ ၁၅၀၀ ကျော်သာ ရှိလာနေတာလည်း ဖြစ်ပါတယ်။
