ကျောက်ဖြူမြို့နယ်အတွင်းက ဦးကင်းကျေးရွာကို စစ်ကောင်စီက မနေ့က မတ်လ ၆ ရက်နေ့ တစ်ရက်တည်းမှာ ဒရုန်း နဲ့ ဗုံး ၂ ကြိမ် ကြဲချတိုက်ခိုက်ခဲ့တာကြောင့် ကျေးရွာ အတွင်းက နေအိမ် အများအပြား မီးလောင်ပျက်စီးသွားခဲ့ရတယ်လို့ သိရပါတယ်။
စစ်ကောင်စီတပ်တွေ နဲ့ အာရက္ခတပ်တော် တို့ဟာအဲဒီ ကျေးရွာ အနီးတဝိုက်မှာ ပြီးခဲ့တဲ့ လပိုင်းကတည်းကပင် နှစ်ဖက်တိုက်ပွဲဖြစ်ပွါးနေတာရှိနေပြီး စစ်ကောင်စီကတော့ မနေ့က အဲဒီကျေးရွာမှာ အာရက္ခတပ်တော် ရဲ့ တပ်ဖွဲ့ဝင်တွေ နေထိုင်တယ်ဆိုတဲ့ ရည်ရွယ်ချက် နဲ့ ဗုံးကြဲတိုက်ခိုက်ခဲ့တာ ဖြစ်တယ်လို့ သိရပါတယ်။
ဒီအခြေအနေ နဲ့ ပတ်သက်ပြီး ပြည်မကို ရောက်နေတဲ့ ကျောက်ဖြူမြို့ဒေသခံ တစ်ဦးက “ကျနော်သိရသလောက်တော့ အဲဒီမှာ တပ်တော်က လူတွေ ရှိတယ်ဆိုတဲ့ အတွက်ကြောင့် ဗုံးကြဲတိုက်ခိုက်ခဲ့တာလို့သိရတယ်။ဒရုန်း နဲ့ ဗုံးကြဲတိုက်ခိုက်လို့ မီးလောင်တာကိုတော့ အတည်ပြုလို့ရတယ်။နောက်ထပ်အသေးစိတ်ကိုလည်း ကျနော်တို့ သိနိုင်ဖို့ ဖုန်းဆက်နေတယ်ဖုန်းလိုင်းအင်တာနက်လိုင်းတွေကလည်း အကုန်ပြတ်နေတော့ ဆက်သွယ်ဖို့က တော်တော်ခက်နေတယ်”လို့ဆိုပါတယ်။
လက်ရှိ မိးလောင်ပျက်စီးမှု အခြေအနေ အသေးစိတ်ကိုတော့ CNA အနေ နဲ့ သီးခြားအတည်ပြုနိုင်ဖို့ ဆက်လက်ကြိုးစားနေသလို အာရက္ခတပ်တော် ပြောခွင့်ရ ဦးခိုင်သုခကို ဒီအခြေအနေတွေ နဲ့ အသေးစိတ်သိရှိနိုင်ဖို့အတွက် ဆက်သွယ်မေးမြန်းထားပေးမယ့် ပြန်လည်ဖြေကြားပေးတာတော့ မရှိသေးပါဘူး။
လက်ရှိဒရုန်း နဲ့ ဗုံးကြဲတိုက်ခိုကခံခဲ့ရပြီး နေအိမ်တွေ မီးလောင်ပျက်စီးသွားခဲ့ရတဲ့ ဦးကင်းကျေးရွာဟာ အတွင်းမှာ နေအိမ် ၁၇၀ ကျော်ရှိပြီးတော့ စစ်ကောင်စီ အခြေစိုက် ဓညဝတီရေတပ်စခန်း နဲ့ ၃ မိုင်အကွာမှာ ရှိတဲ့ ကျေးရွာ တစ်ရွာဖြစ်တယ်လို့လည်းသိရပါတယ်။
အဲဒီကျေးရွာအတွင်းက ဒေသခံတွေကတော့ ပြီးခဲ့တဲ့ လပိုင်း စစ်ကောင်စီ နဲ့ အာရက္ခတပ်တော်တို့ နှစ်ဖက်တိုက်ပွဲ ဖြစ်ပွါးချိန်ကတည်းကပင် တိုက်ပွဲ နဲ့ ဘေးလွတ်ရာနေရာတွေကို ပြောင်းရွှေ့သွားခဲ့ကြရပြီးဖြစ်တယ်လို့ ဆိုပါတယ်။
အဲဒီနောက် တစ်ရက်တည်းမှာပဲ စစ်ကောင်စီဟာ စစ်တွေမြို့နယ်အတွင်းမှာ ရှိတဲ့ ဝါဘိုကျေးရွာကိုလည်း မနေ့က ဒရုန်း နဲ့ ဗုံးကြဲတိုက်ခိုက်ခဲ့တာကြောင့် ဒေသခံ ပြည်သူ နေအိမ် ၄၀ ကျော်ထက်မနည်း မီးလောင်ပျက်စီးတာတွေ ရှိခဲ့ရတယ်လို့ သိရပါတယ်။
