လုံးဝအဆင်မပြေမှုတွေ(တနည်းအားဖြင့်) ပစ္စက္ခအခြေအနေရှိနေတဲ့ ရခိုင်မှာ စစ်ကောင်စီဟာ AA အပေါ် ရှုံးမဲမဲပြီး အရပ်သားတွေကို ဦးတည် တိုက်ခိုက်နေတဲ့အတွက် နေ့စဉ်လိုလိုမှာ အရပ်သား ထိခိုက်၊ သေဆုံးမှု ထောင်နဲ့ချီပြီးရှိလာနေပါတယ်။
တပ်စခန်းတွေတစ်ခုပြီးတစ်ခု AA လက်ထဲကို ပေးနေရတဲ့ စစ်ကောင်စီဟာ ရခိုင်မှာ စစ်စခန်းအနည်းငယ်လောက်သာ ကျန်တော့တဲ့အတွက် လေကြောင်းတစ်ခုကိုပဲ အားကိုးပြီး အရပ်သား လူနေရွာတွေကို လက်နက်ကြီးတွေနဲ့ လေကြောင်းကနေတဆင့် ပစ်ခတ်ပြီး ပြည်သူကို အကြောက်တရားရအောင် ခြိမ်းခြောက်နေတဲ့အတွက် အရပ်သားပြည်သူတွေက ရွံရှာ၊ အပြစ်တင်ပြောဆိုနေကြတာလည်းဖြစ်ပါတယ်။
ရခိုင်မြောက်ပိုင်းဘက်ကိုကြည့်မယ်ဆိုရင် မောင်တောနဲ့ စစ်တွေမြို့တွေသာကျန်တော့ပြီး တောင်ဘက်ပိုင်း မှာတော့ မာန်အောင်ကျွန်းအပါအဝင် သဘာဝဓါတ်ငွေ့စီမံကိန်းတွေတည်ရှိရာ ကျောက်ဖြူမြို့ပေါ်၊တောင်ကုတ်မြို့ပေါ်၊ အမ်းမြို့နယ်က နေရာတချို့နဲ့ ဂွမြို့စတဲ့မြို့ ၇ မြို့လောက်က နေရာတချို့မှာ စစ်ကောင်စီရဲ့ စစ်စခန်းအနည်းငယ်လောက်သာကျန်ပါတော့တယ်။
မောင်တောမြို့ ကိုလည်း စစ်ကောင်စီက အင်အားအလုံးအရင်းနဲ့ ခုခံရင်းနဲ့ ပေးလိုက်ရပြီး မြို့သူကြီးစခန်းတစ်ခုသာ ကျန်ပါတော့တယ်။ ဒီအထဲ စစ်ကောင်စီတပ်သားတွေကြားမှာ အကွဲကွဲအပြဲပြဲ ဖြစ်နေတဲ့အတွက် မကြာခင်ရက်ပိုင်းအတွင်းမှာ AA လက်ထဲကို ထိုးအပ်လိုက်ရမဲ့အနေအထား မှာ ရှိနေတယ်လို့ စစ်ဘက်ဆိုင်ရာ အသိုင်းအဝိုင်းတွေက သုံးသပ်ပြောဆိုကြပါတယ်။
အလားတူပဲ သံတွဲမြို့နယ်အတွင်းမှာ တိုက်ပွဲတွေက ပြင်းထန်နေဆဲ ဖြစ်တာကိုတွေ့ရသလို ငပလီကို ပြန်လည်ရရှိဖို့ ကြိုးစားနေတဲ့ စစ်ကောင်စီတပ်တွေဟာ လေယာဉ်နဲ့ ဗုံးတွေကြဲချပြီး နေ့တိုင်းတိုက်ခိုက်နေပေမဲ့ တိုးမပေါက်တော့တဲ့အထားမှာရှိနေတာကို တွေ့နေရပါတယ်။
ဒါပေမဲ့ စစ်ကောင်စီကတော့ အကျအရှုံးလုံးဝမရှိသလိုပြောဆိုမှုတွေကို မြေပြင်အခြေအနေကိုသိရှိနေသူတွေကတော့ ရခိုင်ကို အပို့ခံနေရတဲ့ စစ်ကောင်စီတပ်သားသစ်တွေအတွက် သနားမိတယ်လို့ ပြောဆိုနေကြတာလည်းဖြစ်ပါတယ်။
ရေတပ်သင်္ဘောတွေကို သံတွဲ၊ တောင်ကုတ်ချောင်းတွေမှာ အမြောက်အများချထားပြီး တိုက်ခိုက်မှုတွေလုပ်နေပေမယ့် တစ်ဖက်မှာသံတွဲမြို့ ဟိုတယ်ထဲတွေမှာစခန်းချခဲ့တဲ့ စစ်ကောင်စီတပ်သားတွေ ရဲ့အလောင်းတွေက လူမနေနိုင်အောင် နံစော်ပုတ်ပွနေတယ်ဆိုတဲ့သတင်းတွေလည်း ကြားနေကြရပါတယ်။
ဇူလိုင်လ (၇) ရက်နေ့က AA ရဲ့ထုတ်ပြန်ချက်ထဲမှာတော့ “အာရက္ခဒေသတစ်ခုလုံးအတွင်း၌ ဖက်ဆစ် စစ်ကောင်စီ၏တပ်များအားလုံး အနှေးနှင့်အမြန်ကင်းစင်ရမည်” ဟူသော နဂိုစစ်ရေးရည်မှန်းချက်အတိုင်း မိမိတိုသိမ်းပိုက်ရန်ကျန်ရှိနေသေးသော ရန်သူ၏ တပ်ရင်း၊ ဗျူဟာ၊ စကခ (၅) ဌာနချုပ်၊ နခခ စခန်းများ၊ နပခဌာနချုပ်များအားလုံးကို အာရက္ခတပ်တော်မှ တစ်ခုပြီးတစ်ခု ဆက်လက် ထိုးစစ်ဆင်တိုက်ခိုက် လျက် ရှိကြောင့် နဲ့ အနောက်ပိုင်းတိုင်းစစ်ဌာနချုပ်တည်ရှိရာ အမ်းမြို့၊ ငပလီ ကမ်းခြေရှိရာ သံတွဲမြိုနှင့် နခခ(၂)၊ နခခ(၅) တည်ရှိရာ မောင်တောမြိုများ၌ တိုက်ပွဲများဆက် လက်ပြင်းထန်လျက်ရှိ” လို့ ဖော်ပြထားတာတွေ့ရပါတယ်။
ဒီကြားထဲ သြဂုတ်လ ၂၉ ရက်နေ့မှာပဲ TNLA ကို တရုတ်က သတိပေးခြိမ်းခြောက်စာထွက်ပေါ် လာခဲ့တဲ့အတွက် တော်လှန်ရေးအဖွဲ့အစည်းတွေနဲ့ နိုင်ငံရေးစောင့်ကြည့်လေ့လာသူတွေကြားမှာ သို့လော၊ သို့လော ပြောစရာတွေဖြစ်လို့နေပါတယ်။ အုတ်အော်သောင်းနင်းနဲ့ ဝေဖန်သုံးသပ်မှုတွေအမျိုးမျိုးထွက် လာခဲ့တယ်။ အာရက္ခတပ်တော်(AA) အတွက်လည်း အကျပ်ရိုက်သွားမလားဆိုပြီး ရခိုင်ဒေသခံတွေက စိုးရိမ်နေခဲ့တာလည်းဖြစ်ပါတယ်။ ရခိုင်တိုက်ပွဲကတော့ ရှိနေဆဲ တိုက်နေဆဲ၊ စစ်ကောင်စီတပ်ဘက်ကလည်း အားဖြည့်ယင်းကျဆုံးနေဆဲပဲ ဖြစ်ပါတယ်။
ဆိုရရင် AA အပါအဝင်တနိုင်ငံလုံးက တော်လှန်ရေးတပ်တွေဟာ စစ် ကောင်စီကင်းမဲ့သွားအောင် တိုက်နေကြတာဖြစ်တဲ့အတွက် ဒီတိုက်ပွဲဟာ ဘယ်လောက်ကြာရှည်အုန်းမှာလည်းဆိုတာကို ဘယ်သူ မှ မခန်းမှန်းနိုင်ပါဘူး။
ဒါပေမဲ့ ရခိုင်မှာတော့ မကြာခင်မှာ ဂွ၊ တောင်ကုတ်တို့ဟာ AA လက်ထဲကျရောက်သွားမှာတော့သေချာ ပါတယ်။ ဒီလိုကျရောက်သွားပေမဲ့ အဓိက မြို့တွေဖြစ်တဲ့ စစ်တွေ၊ ကျောက်ဖြူ၊ အမ်း မြို့တွေကိုတော့ ခက်ခက် ခဲခဲ တိုက်ယူရမယ့်သဘောရှိတယ်လို့ နိုင်ရေးအကဲခတ်သူတွေက ဆိုကြပါတယ်။
■ AA မနိုင်တော့လို့ ပြည်သူတွေရှိရာကို လေယာဉ်နဲ့ဗုံးတွေကြဲချ
စစ်ကောင်စီက ဆုံးရှုံးသွားတဲ့ နယ်မြေတွေကို ဗုံးကြဲမယ်လို့ သတင်းစာကနေ ကြေငြာပြီးနောက် အကောင်အထည်ဖော်လုပ်ဆောင်လာတာကို တွေ့ရတယ်။ စစ်ကောင်စီဟာ မြေပြင်တိုက် ခိုက်ရေးမှ အတုံးအရုံးကျဆုံးနေကြရတာကြောင့် စက်တင်ဘာ ဒုတိယပတ် ထဲမှဘဲ တစ်နိုင်ငံလုံးမှာ ရှိတဲ့ သိမ်းပိုက်ခံနယ်မြေတွေကို လေကြောင်းကနေ ဗုံးတွေသွားရောက်ကြဲချခဲ့တဲ့သတင်းက မီဒီယာတိုင်းမှာ ပျံနှံ့လာခဲ့ပါတယ်။
အဲဒီလိုတိုက်ခိုက်လိုက်တဲ့အတွက် ကလေးငယ်နဲ့ ကိုယ်ဝန်ဆောင်အမျိုးသမီးတွေအပါအဝင် သေဆုံးဒဏ်ရာရသူတွေ အများအပြားရှိလာခဲ့ပါတယ်။ ဒါ့အပြင် စက်တင်ဘာ ၈ ရက်နေ့က ညက ပေါက်တောမြို့နယ်အတွင်းက ရှင်ရွာ ကျေးရွာအား စစ်ကောင်စီက ဗုံးကြဲတိုက်ခိုက်ခဲ့အတွက် ကျေးရွာအတွင်း ဆေးကုသမှုခံယူနေတဲ့ သုံ့ပန်းများနဲ့ အရပ်သားများ ၁၇ ဦး သေဆုံးပြီး ၁၀ ကျော်ဒဏ်ရာရရှိခဲ့တယ်လို့ သိရတယ်။ ဒီလိုအပ်ရပ်တွေအတွက် ရခိုင်ပြည် သူတွေရဲ့ အခက်အခဲဟာ ပိုမိုမြင့်တက်လာမှာဖြစ်ပေမဲ့ AA ကလည်း ဆက်လက်တိုက်ခိုက်သွားမယ်ဆိုတာကို ယုံမှားစရာ မရှိပါဘူး။
■ အမိုးအကာမဲ့နေတဲ့ စစ်ဘေးရှောင်တွေရဲ့ စိန်ခေါ်မှု
မိုးရာသီဖြစ်တဲ့အတွက် လက်ရှိမှာ ဆေးဝါးတွေ လိုအပ်ချက်ကတော့ ရခိုင်ပြည်သူတွေအတွက် ကြီးမားတဲ့ စိန်ခေါ်မှုတစ်ခုဖြစ်လို့နေပါတယ်။ တိုက်ပွဲရှောင်ပြီး နေရပ်စွန့်ခွာနေကြသူများအတွက် အမိုးအကာမဲ့နေထိုင်နေကြရတာတကြောင်း၊ စစ်ကောင်စီရဲ့ လေကြောင်းရန်ကနေ ရှောင်ဖို့ တော၊ တောင်တွေကို အမှီသဟဲပြုနေကြရတဲ့အတွက် အရေပြားရောဂါအပါအဝင် ကူးစက်ရောဂါတချို့ခံစားနေကြရတာကို တွေ့နေကြရပါတယ်။
ရခိုင်စစ်ဘေးရှောင်တစ်ဦးက “ အခုဆိုရင် အရေပြားမှာ ကျောက်ပေါက်ရာလိုမျိုးကူးစက်ရောတမျိုးဖြစ်နေကြတာတွေ့ရပါတယ်။ မျောက်ကျောက်ရောဂါလိုမျိုးတွေလည်း ပေါ်နေတယ်ကြားလို့ ကျွန်တော်တို့ စိုးရိမ်နေကြတာပါ။ စစ်ဘေးရှောင်တွေမှာ ဆေးဝါးအကူအညီတွေအများကြီးလိုအပ်နေကြပါတယ်” လို့ပြောပါတယ်။
လက်ရှိမှာ နိုင်ငံတကာအဖွဲ့အစည်းတွေအနေနဲ့လည်း စစ်ဘေးရှောင်စခန်းတွေဆီးကို ရောက်နိုင်ဖို့ အခက်အခဲတွေ အများကြီးရှိနေတာတွေ့ရပါတယ်။ INGO တွေဝင်လာနိုင်တဲ့အနေအထားဖြစ်အောင် လုပ်ဖို့ လိုအပ်နေပေမယ့် မြန်မာနိုင်ငံထဲ ဝင်ရောက်လာတဲ့ နိုင်ငံတကာအဖွဲ့တွေအနေနဲ့ကလည်း စစ်ကောင်စီနဲ့ စာချုပ်ချုပ် ဆိုထားမှုတွေရှိနေတဲ့အတွက် စစ်ဘေးရှောင်တွေအနေနဲ့ ကျန်းမာရေးအတွက် စိုးရိမ်စရာအခြေအနေကို ရင်ဆိုင်နေကြရတယ်လို့ဆိုကြပါတယ်။ ဒါပေမယ့် AA အနေနဲ့ ဆေးဝါးကုသမှုကိုတတ်နိုင်သလောက်လုပ်ဆောင်နေကြတာကိုတွေ့နေရပါတယ်။ ရခိုင်လူမျိုးတွေအပါအပဝင် ရခိုင်ဒေသတွင်းက မွတ်ဆလင်အပါအဝင် မတူကွဲပြားသူများအတွက်လည်း ဆေးဝါးနဲ့ ကျန်းမာရေးစောင့်ရှောက်မှုတွေပေးနေတဲ့အတွက် မွတ်ဆလင်အသိုင်းအဝိုင်းနဲ့လည်း ဆက်ဆံရေး ပြေလည်လာနေတယ်လို့ ဆိုကြပါတယ်။
■ ဖြတ်လေးဖြတ်က ရခိုင်စစ်ပွဲကို မဟန့်တားနိုင်တော့။
ရခိုင်မှာ စစ်ကောင်စီက ဖြတ်လေးဖြတ်ကျင့်သုံးပြီးနောက်မှာ ပြည်သူတွေဟာ စားဝတ်နေရေးအခက်အခဲတွေနဲ့ ရင်ဆိုင်ခဲ့ကြရပေမယ့် စစ်ကောင်စီရဲ့ ဖြတ်လေးဖြတ်ဗျူဟာကို အရှုံးမပေးတဲ့ ရခိုင်ပြည်သူတွေဟာ AA ရဲ့ တော်လှန်ရေးယုံကြည်မှုနဲ့ ခရီးဆက်နေဆဲဖြစ်ပါတယ်။ ဘေးအိမ်မှာဆန်ရှိသေးရင် တစ်ဘက်အိမ်က ထမင်းမငတ်စေဘဲ မျှကူပေးတဲ့စနစ်တွေကျင့်သုံးပြီး ရခိုင်ပြည်သူတွေ တောင့်ခံနေကြသည်ကို တွေ့ရသည်မှာ အံသြစရာကောင်းလို့နေသည်။ AA အနေနဲ့လည်း တိုက်ပွဲတိုင်းအောင်နိုင်ခြင်း လက်ဆောင်ယူလာပေးနေဆဲဖြစ်သည်။ စားဝတ်နေရေး၊ ကျန်းမာရေးကအစ အခြားလိုအပ်ချက်ပေါင်းများစွာကို အသက်နဲ့ရင်းပြီး AA နဲ့အတူ တော်လှန်ရေးကာလအတွင်းမှာ သည်းခံနေကြရသည့် ရခိုင်ပြည်သူတို့ရဲ့ မျှော်လင့်ချက်မှာ လက်တကမ်းတွင်ရှိလာနေတယ်လို့လည်း ရခိုင်အရေးစောင့်ကြည့်နေသူတွေက ဆိုကြပါတယ်။
■ ပြည်သူယုံကြည်မှုမရှိတဲ့စစ်ကောင်စီတပ်။
စစ်ကောင်စီတပ်တွေမှာ လက်နက်အင်အား လူအင်အား ဘယ်လောက်ပဲများပြားပါစေ တော်လှန်ရေး ရဲဘော်တွေရဲ့ စိတ်ဓာတ်နဲ့ ကြံ့ခိုင်မှုကိုတော့ ဘယ်လိုမှ အနိုင်တိုက်ခိုက်နိုင်မှာ မဟုတ်ပါဘူး။ နှစ်ဘက်ညှိနှိုင်းမှု တစ်ခုကို အကောင်အထည်ဖော်နိုင်မှသာ ရှဉ့်လည်းလျောက်သာ ပျားလည်းစွဲသာ အနေအထားကို ရောက်ရှိပြီး လူသားအရင်းအမြစ်တွေဆုံးရှုံးမှု နည်းပါးသွားမှာဖြစ်ပါတယ်။ AA ကတော့ လက်ဖြန့်တောင်းယူမှာ မဟုတ်ဘူး လို့ အယင်ကတည်း ကြွေးကြော်ထားခဲ့တဲ့အတိုင်း ရခိုင်ပြည်ကို စစ်ကောင်စီလက်ထဲကနေ တိုက်ယူနေတာဖြစ် တယ်ဆိုတာကို အားလုံးလည်း အသိပဲဖြစ်ပါတယ်။ ဒါပေမဲ့ တိုက်ပွဲကာလ ရှည်ကြာလာလေ ရဲဘော်တွေနဲ့ အပြစ်မဲ့ ပြည်သူတွေ သေဆုံးမှုအား များလာလေလေဖြစ်လာခဲ့ပါတယ်။
ဒီလိုအခြေအနေမှာ စစ်ကောင်စီအနေနဲ့ AA နဲ့ တွေ့ဆုံဆွေးမှုတစ်ခုကို အောင်မြင်စွာလုပ်နိုင်ခဲ့မယ်ဆိုရင် အကောင်းဆုံးအနေအထားတစ်ခုကို ရရှိမှာဖြစ်သလို ပြည်သူတွေ သေဆုံးဒဏ်ရာရမှုတွေကိုလည်း လျော့ချနိုင်မှာဖြစ်ပါတယ်။ အဲဒီလိုမဟုတ်ဘဲ ပြည်သူတွေကို အ ကြောင်းမဲ့ သတ်ဖြတ်ပြီး ခြိမ်းခြောက်မှုတွေနဲ့ ဆက်သွားနေမယ်ဆိုရင်တော့ စစ်ကောင်စီရဲ့ တပ်တွေဟာ ဒုက္ခ ကောင်းကောင်းကြီးရောက်လာတော့မှာ သေချာတယ်လို့လည်း နိုင်ငံရေးအကဲခတ်တွေက သုံးသပ်ကြပါတယ်။
တကယ်တော့ ပြည်သူ့တပ်မတော်လို့ စစ်ကောင်စီက ဘယ်လောက်ပဲ ကြွေးကြော်နေနေ လုပ်ရပ်ဟာ သက်သေတစ်ခုဖြစ်တယ်။ အပြစ်မဲ့ပြည်သူတွေကို နေ့စဉ်သတ်ဖြတ်နေတာဟာ စစ်ကောင်စီတပ်တွေဖြစ်သလို အပြစ်မဲ့ပြည်သူတွေကို အကြောင်းမဲ့ ဖမ်းဆီးခြင်း၊ ထောင်ချခြင်း၊ ချုပ်နှောင်ထားခြင်း၊ ဖမ်းဆီးငွေညှစ်ခြင်းတွေ ကိုလည်း စစ်ကောင်စီတပ်သားတွေကသာ လုပ်ဆောင်နေတာဖြစ်ပါတယ်။ ခိုးဆိုးလုနှိုက်လုပ်ရပ်တွေကိုလည်း နေ့စဉ်လုပ်ဆောင်နေတာကိုတွေ့ရတယ်။ လမ်းမှာတွေ့ရင်တောင် ပါလာသမျှကို လုယူတယ်။ လူမနေတဲ့အိမ် တွေကို ဖောက်တယ်။ ရှိတာအကုန်ယူတယ်။ ငပိတောင်မကျန်အောင်ယူတယ်။ ဆားတောင်မကျန်အောင်ယူ တယ်။ လတ်တလောမှ ဘင်္ဂါလီအကြမ်းဖက်စစ်သွေးကြွတွေနဲ့ ပူးပေါင်းပြီးတော့ လူသတ်မှုတွေကိုပြောင်ပြောင် တင်းတင်းကျူးလွန်လာတယ်။ ဒါဟာ အကြောက်တရားကို ဖြစ်လာအောင် ဖန်တီးတာဖြစ်ပေမဲ့ ပြည်သူတွေ ဆီက ပြည်သူယုံကြည်တဲ့ တပ်မတော်ဘယ်တော့မှ ဖြစ်မလာတော့ဘူးဆိုတာပါပဲ။
နောက်ပြီး မကြာသေးခင်ကမှ ယာယီသမ္မတဦးမြင့်ဆွေကို ဖြုတ်ချပြိး စစ်ခေါင်းဆောင်မင်းအောင်လှိုင် က သမ္မတတာဝန်ကို လွှဲပြောင်းယူလိုက်တဲ့ လုပ်ရပ်ဟာလည်း အရှက်အကြောက်ကင်းမဲ့တဲ့ လုပ်ရပ်တစ်ခုဖြစ် တယ်လို့ နိုင်ငံရေး လေ့လာသုံးသပ်သူတွေက ပြောဆိုကြတာကိုလည်းတွေ့ရတယ်။ ဒီလိုသမ္မတရာထူးကို ယူ လိုက်တဲ့အတွက်လည်း မြန်မာနိုင်ငံအနှံ့မှာ စစ်ရေးပဋိပက္ခတွေ ပိုမိုပြင်းထန်လာနိုင်တယ်လို့လည်း သုံးသပ်ကြ ပါတယ်။ ဒါအပြင် စစ်ကောင်စီထောင်ထားတဲ့ မိုင်းတွေကို အရပ်သားပြည်သူတွေ နင်းမိပြီး သေဆုံးတဲ့အပြင် ဒဏ်ရာရလာသူတွေကိုလည်း မိုင်းတန်ဖိုးငွေအပေးရင် တရားစွဲဆိုမှုတွေ၊ ဆေးကုသခွင့်မပေးမှုတွေကိုပါ လုပ် ဆောင်လာတာဟာလည်း လွန်စွာဆိုးရွားလှတဲ့ လုပ်ရပ်တစ်ခုဖြစ်ပါတယ်။
■ ပြည်သူတွေရဲ့ လေးစားအားကိုးမှု တစိုးတစိမှ မရှိတော့တဲ့ စစ်ကောင်စီ
စစ်ပွဲတစ်ခုဖြစ်ပြီဆိုတာနဲ့ အခက်တွေ့ရတာက ပြည်သူတွေဖြစ်ပါတယ်။ စားသောက်ရေးအခက်အခဲ တွေ၊ နေထိုင်ရေးအခက်အခဲတွေ၊ ကျန်းမာရေးအခက်အခဲတွေ၊ ပညာရေးအခက်အခဲတွေကို ရင်ဆိုင်လာကြရ တယ်။ စားသောက်ကုန်တွေ သယ်ယူလို့မရအောင် စစ်ကောင်စီက ပိတ်ပင်ထားခဲ့တယ်။ လမ်းတံတားတွေကို စစ်ကောင်စီက ချိုးဖောက်ဖျက်ဆီးခဲ့တယ်။
နောက်ပြီး ဒီနှစ်တွေထဲမှာ ကျောင်းမနေရတဲ့ ကလေးငယ်တွေ အမြောက်အများရှိနေခဲ့တယ်။ ကျန်းမာရေးပိုင်းဆိုင်ရာမှ ဆေးဝါးမပြည့်စုံလို သေဆုံးသွားခဲ့သူတွေလည်း အမြောက်အများရှိတယ်။ စားသောက်ရေးအခက်အခဲ၊ ရေအခက်တွေကိုလည်း ပြည် သူတွေ ရင်ဆိုင်ခဲ့ရတယ်။ ဒါဟာ စစ်ပွဲတစ်ခုရဲ့ နောက်ဆက်တွဲဖြစ်ရပ်တွေဆိုရင် ပိုမှန်ပါလိမ့်မယ်။ အဲဒီဒုက္ခတွေကို ပြည်သူတွေ ခါးစည်းခံနေကြရတယ်။ ဒါပေမဲ့ တိုက်ပွဲဟာ မအောင်မြင်ခဲ့ရင်လည်း နောက်ဆက် တွဲ ဆိုးကျိုးတွေ အများကြီးဖြစ်လာနိုင်တယ်ဆိုတာကို သတိထားရမှာဖြစ်တယ်။ စစ်ကောင်စီတွေဟာ အယင် ထက် ပိုပြီး ဖိနှိပ်လိမ့်မယ်ဆိုတာကို ကြိုတွေးထားဖို့လိုတယ်။
ဒါတွေကိုကြည့်ရင် စစ်ကောင်စီလုပ်ရပ်ဟာ ပြည်သူတွေကိုများ မုန်းတီးနေပြီလားလို့ မေးခွန်းထုတ်စရာ ဖြစ်လို့နေပါတယ်။ ဒါကြောင့်နဲ့ ပြည်သူတွေကလည်း စစ်ကောင်စီကို အယုံအကြည်မရှိ၊ မချစ်ကြဘဲ မုန်းတီးနေကြတဲ့ ပြည်သူတွေကို အပြစ်ဆိုစရာမရှိတော့ပါ။
အောင်ထွန်းနိုင် ရေးသားသည်။
