ပြည်တွင်းရေး အခင်းအကျင်း၊ အဖြစ်အပျက်များကို စစ်ရေးဖြင့် ဖြေရှင်းသည်ထက် နိုင်ငံရေး နည်းလမ်းဖြင့် ဖြေရှင်းရန် အမြဲအသင့်ရှိကြောင်း ဒီဇင်ဘာ ၂၉ ရက်နေ့ ရက်စွဲနဲ့ အေအေက ထုတ်ပြန် ကြေငြာပါတယ်။ ဒီထုတ်ပြန်ချက်ဟာ ရက္ခိုင်ပြည်ရဲ့ တောင်ဘက်အစွန်ဆုံး မြိုဖြစ်တဲ့ ဂွမြို့ကို အေအေကအပြီးသတ် သိမ်းပစ် လိုက်ချိန်မှာ ထွက်ပေါ်လာတာပါ။
အဲဒီထုတ်ပြန် ကြေငြာချက်ထဲမှာ အာရက္ခပြည်သူ့ တော်လှန်ရေးအစိုးရ အနေနဲ့ ဒေသအတွက် အကျိုး ဖြစ်ထွန်း စေမယ့်၊ ဒေသဖွံဖြိုး တိုးတက်ရေးကို အထောက်အကူ ပြုစေမယ့် မည်သည့် နိုင်ငံခြား ရင်းနှီးမြုပ်နှံမှုကိုမဆို အသိအမှတ်ပြုကြောင်းနဲ့ ရင်းနှီးမြုပ်နှံသူများ၊ စီမံကိန်းများ၊ ရင်းနှီးမြုပ်နှံမှုမှာ လုပ်ကိုင်နေတဲ့ သူတွေရဲ့ လုံခြုံရေးကို အလေးပေး ကာကွယ်သွားမှာ ဖြစ်ကြောင်း ဖော်ပြထားတယ်။ ပြီးတော့ အာရက္ခတပ်တော်အနေနဲ့ ဒေသတွင်း ရင်းနှီးမြုပ်နှံသည့် ကုမ္ပဏီများနှင့် အကျိုးတူ ပူးပေါင်း ဆောင် ရွက် သွားလိုကြောင်း ကိုလည်း ထည့်သွင်း ဖော်ပြထားတယ်။
လက်ရှိ အာရက္ခဒေသတွင်း စစ်ပွဲမှာ အေအေ အနေနဲ့ ပလက်ဝ အပါအဝင် မြို့နယ် ၁၅ ခုကို အပြည့်အဝ ထိန်းချုပ်ထားပြီး စစ်ကောင်စီရဲ့ အနောက်ပိုင်းတိုင်း စစ်ဌာနာချုပ်ကိုလည်း ဒီဇင်ဘာလ ၂၀ ရက်နေ့က အပြီးသတ် တိုက်ခိုက် ချေမှုန်းထားတယ်။ ဒါကြောင့် လက်ရှိအနေအထားမှာ အေအေရဲ့ စစ်ရေး ရည်မှန်းချက် ပြီးမြောက်ဖို့ ရက္ခိုင်ပြည်ရဲ့ မြို့တော်ဖြစ်တဲ့ စစ်တွေ၊ တရုတ်စီမံကိန်းတွေ အများအပြား ရှိတဲ့ ကျောက်ဖြူနဲ့ မာန်အောင်ကျွန်း တို့ကိုပဲ တိုက်ခိုက် သိမ်းပိုက်ရန် လိုတော့တာ ဖြစ်တယ်။
အေအေ အနေနဲ့ အဲဒီမြို့တွေကို တိုက်ခိုက် သိမ်းပိုက်ဖို့ အထိအခိုက် အပျက်အစီး အနည်းဆုံး ဖြစ်အောင် ရည်ရွယ်ဟန်တူတယ်။ ဒါကြောင့်လည်း စစ်ကောင်စီနဲ့ နိုင်ငံရေး နည်းလမ်းဖြင့် တွေ့ဆုံဆွေးနွေးလို ကြောင်းထုတ်ပြန်ကြေငြာတာ ဖြစ်နိုင်တယ်။
အေအေရဲ့ ထုတ်ပြန်ကြေငြာချက်ဟာ တရုတ်ရဲ့ဖိအားလား
အေအေရဲ့ ထုတ်ပြန်ကြေငြာချက် ထွက်လာပြီးနောက် ဒါဟာတရုတ်ရဲ့ ဖိအားကြောင့်များလား ဝေဖန်သုံးသပ် သူတချို့ ရှိတယ်။ တရုတ်ဟာ “၁၀၂၇ စစ်ဆင်ရေး” ဒုတိယလှိုင်းအတွင်းမှာ KIA အပါအဝင် မြောက်ပိုင်းညီနောင် မဟာမိတ်အဖွဲတွေကို ထိုးစစ်ရပ်ဖို့ တောင်းဆိုတာ၊ စစ်ကောင်စီနဲ့ နိုင်ငံရေးအရ တွေ့ဆုံ ဆွေးနွေးဖို့ ဖိအားပေး တာတွေ လုပ်ခဲ့တယ်။
တဖက်မှာ ထုတ်ပြန်ချက်တွေ ထုတ်ပြီး ခြိမ်းခြောက်တာ၊ တိုင်းရင်းသား လက်နက်ကိုင် ခေါင်းဆောင် တွေကို ထိန်းသိမ်းတာတွေနဲ့ နယ်စပ်ကုန်သွယ်ရေး ဂိတ်တွေကို ပိတ်ကာ ပြင်းပြင်းထန်ထန် ဖိအားပေး အကျပ်ကိုင်ခဲ့တယ်။ ဒါကြောင့်လည်း ကိုးကန့်နဲ့ တကောင်း တပ်တွေရဲ့ ထိုးစစ်ဟာ အတိုင်းအတာ တစ်ခုထိ အရှိန်လျော့နည်း သွားခဲ့ရတယ်။
တရုတ်အနေနဲ့ မြောက်ပိုင်းမဟာမိတ် အဖွဲဝင်တစ်ခုဖြစ်တဲ့ အေအေကိုလည်း အတိုင်းအတာတစ်ခုထိ ထိုးစစ်တွေရပ်ဖို့ ဖိအားပေးမှာ အသေအချာပါပဲ။ သို့သော် အေအေဟာ တရုတ်နယ်စပ်မှာ အခြေ မစိုက်တာ၊ ရက္ခိုင်ပြည်သူတွေ အနေနဲ့လည်း တရုတ်ကို မှီခိုနေရတာတွေ မရှိတာတွေကြောင့် ထင်သ လောက် ဖိအားပေးလို့ ရနိုင်ခြေ မရှိဘူး။
တစ်ဖက်မှာ ပထဝီ နိုင်ငံရေးအရ အာရက္ခဒေသဟာ အိန္ဒိယ၊ ဘင်္ဂလားဒေ့ရှ်တိုနဲ့ နယ်နမိတ် ချင်း ထိစပ်နေတာ၊ အာရက္ခ ပြည်တွင်းက အိန္ဒိယစီမံကိန်း တချို့တဝက်ကိုလည်း အေအေက အပြည့်အဝ ထိန်းချုပ်ထားတာစတဲ့ ပထဝီနိုင်ငံရေး အားသာချက်တွေကြောင့် တရုတ်အနေနဲ့ အေအေကို ထိုးစစ်ရပ်သွား အောင်၊ သို့မဟုတ် သူတို့ရဲ စစ်ရေး ရည်မှန်းချက်ကို ဟန့်တား နိုင်အောင်ထိ ဖိအားပေး နိုင်တဲ့ အခြေအနေ၊ အနေအထား မရှိခဲ့ဘူး။ ဒါကြောင့် အခုထုတ်ပြန် ချက်ဟာ တရုတ်ရဲ့ ဖိအားဆို တာထက် အေအေရဲ့စစ်ရေး နိုင်ငံရေး အခင်းအကျင်း လိုအပ်ချက် အပေါ်မူတည်ပြီး ထုတ်ပြန်လာတဲ့ ထုတ်ပြန်ကြေငြာချက်လို့ ယူဆရ တယ်။
ဆွေးနွေးပွဲ အလားအလာ
စစ်ကောင်စီ အနေနဲ့လည်း နိုင်ငံရေး နည်းလမ်းဖြင့် တွေ့ဆုံဆွေးနွေးဖို ဖိတ်ခေါ်နေတာရယ်၊ အေအေ အနေနဲ့ လည်း တွေ့ဆုံဆွေးနွေးဖို လိုလားနေတာရယ်ကြောင့် စစ်တပ်နဲ့ အေအေကြားက တွေ့ဆုံဆွေးနွေးပွဲဟာ သိပ် မကြာခင် ဖြစ်လာနိုင်ခြေ ရှိတယ်။ ဒီအတွက် တရုတ် အနေနဲ့လည်း အားပေး ထောက်ခံမှာ သေချာတယ်။
တရုတ်ဟာ ရက္ခိုင်ပြည်အတွင်းက သူတို့အကျိုးစီးပွားတွေ၊ သူတိုစီမံကိန်းတွေကို ကာကွယ်ဖို့ အေအေနဲ့ စစ်တပ်ကြားမှာ နိုင်ငံရေး နည်းလမ်းဖြင့် တွေ့ဆုံ ဆွေးနွေးရေးကို လိုလားမှာ အသေအချာပါပဲ။ အဲဒီအတွက် တရုတ်ဟာ ကြားဝင်စေ့စပ်ပေးတာ၊ ညှိနှိင်းဆောင်ရွက် ပေးတာတွေ လုပ်လာနိုင်တယ်။ တကယ်လို့ တရုတ်သာ တက်တက်ကြွကြွ ကြားဝင်စေ့စပ်ပေးမယ်၊ ညှိနှိင်းဆောင်ရွက် ပေးမယ်ဆိုရင် အေအေနဲ့ စစ်ကောင်စီ ကြားက နိုင်ငံရေး တွေ့ဆုံဆွေးနွေးပွဲ ဖြစ်ပေါ်လာမှာ အသေအချာပဲ။
တကယ်လို့ ဆွေးနွေးပွဲသာ ဖြစ်လာခဲ့ရင် စစ်တပ်ဟာ အေအေနဲ့ အပစ်အခတ် ရပ်စဲဖို့ လိုလားမှာ အသေအချာ တယ်။ သို့သော် စစ်ရှုံးနေတဲ့အတွက် စစ်တပ်ဟာ သူတို့ရဲ့ လိုလားချက်တွေကို တောင်းဆိုတာထက် အေအေရဲ့ တောင်းဆိုချက်တွေ အပေါ်မှာပဲ အခြေအနေအပေါ် မူတည်ကာ နိုင်ငံရေးအရ အပေးအယူတွေ လုပ်ရမယ့် သဘောရှိတယ်။
အေအေအနေနဲ့တော့ သူတို့သိမ်းပိုက်ထားတဲ့ နယ်မြေတွေကို နိုင်ငံရေးအရ တရားဝင် အသိမှတ်ပြုပေးဖို့၊ အပြစ်မဲ့ ပြည်သူတွေကို လေယာဉ်နဲ့ ဗုံးကြဲသတ်ဖြတ်တာတွေ မလုပ်ဖို့ ဦးစားပေး တောင်းဆိုမှာ သေချာ တယ်။ ပြီးတော့ သူတို့ရဲ့ စစ်ရေး ရည်မှန်းချက်ဖြစ်တဲ့ အာရက္ခဒေသ တစ်ခုလုံးကို သိမ်းပိုက်ထိန်းချုပ် နိုင်ရေး အတွက် စစ်တွေ၊ ကျောက်ဖြူ၊ မာန်အောင် မြို့တွေမှာ တပ်စွဲထားတဲ့ စစ်ကောင်စီ တပ်ဖွဲ့တွေကို ရုပ်သိမ်းပေးဖို့ ကိုလည်းတောင်းဆိုနိုင်တယ်။ ပြီးတော့ မွတ်စလင် လက်နက်ကိုင်တွေကို လေ့ကျင့်သင်ကြားပေးတာ၊ လက်နက် တပ်ဆင်ပေးတာတွေ မလုပ်ဖို့လည်း တောင်းဆိုနိုင်တယ်။
စစ်တပ်ဘက်ကတော့ စစ်တွေနဲ့ ကျောက်ဖြူမြိုတွေကို ထိုးစစ်မဆင်ဖို့ ဦးစားပေး တောင်းဆိုနိုင်တယ်။ ပြီးတော့ ဧရာဝတီဘက်နဲ့ မကွေးဘက်ဒေသတွေကိုလည်း ရက္ခိုင်တပ်တွေ မပိုဖို၊ ထိုးစစ်မဆင်ဖို့ တောင်းဆိုနိုင် တယ်။
တစ်ဖက်မှာ မြန်မာပြည် အလယ်ပိုင်းက နွေဦးတော်လှန်ရေး အင်အားစုတွေကို လက်နက်ခဲယမ်း ထောက်ပံ့တာတွေ မလုပ်ဖို့လည်း တောင်းဆိုကောင်း တောင်းဆိုနိုင်တယ်။ တကယ်လို့ စစ်တပ်သာ မိမိရဲ့ လက်ရှိ အခြေအနေမှန်ကို နားမလည်ခဲ့ရင် အနောက်ပိုင်းတိုင်း စစ်ဌာနချုပ်ကို ပြန်ပေးဖို့နဲ့ ရက္ခိုင် – ဘင်္ဂလား ဒေ့ရှ် နယ်စပ် ထိန်းချုပ်ခွင့်တွေ ပြန်ပေးဖို့ တောင်းဆိုနိုင်တယ်။
ဘာတွေဖြစ်လာမလဲ
စစ်တပ်အနေနဲ့ အေအေ သိမ်းပိုက်ထိန်းချုပ်ထားတဲ့ မြို့ရွာတွေကို အသိအမှတ်ပြုတာ ဖြစ်နိုင်ခြေရှိ သည့်တိုင်အောင် စစ်တပ် ထိန်းချုပ်ထားဆဲ ဖြစ်တဲ့ စစ်တွေ၊ ကျောက်ဖြူနဲ့ မာန်အောင် မြို့တွေက တပ်ဆုတ်ပေးမှာကိုတော့ လိုက်လျော နိုင်ခြေမရှိဘူး။ အဲဒီလိုဆိုရင် စစ်တပ်အတွက် စီးပွားရေး၊ စစ်ရေးအရ အများကြီး နစ်နာဆုံးရှံး မှာ ဖြစ်သလို နိုင်ငံရေး ဂုဏ်သိက္ခာအားဖြင့်လည်း အများကြီး နစ်နာဆုံးရှုးမှာ ဖြစ်တယ်။
တစ်ဖက်မှာ လက်ရှိ စစ်ခေါင်းဆောင်တွေရဲ့ ဦးဆောင်မှုနဲ့ စစ်ရေးစွမ်းရည်တွေ အပေါ်မှာလည်း အများကြီး ဝေဖန်စရာ ဖြစ်လိမ့် မယ်။ ဒါကြောင့် စစ်တပ်ဟာ ဒီအချက်ကို လိုက်လျော နိုင်ခြေ မရှိဘူး။ အဲဒီလိုသာဆိုရင် အပြန်အလှန် အနေနဲ့ အေအေဟာ ဧရာဝတီနဲ့ မကွေးတို့ကို ထိုးစစ်မဆင်ဖို၊ ရက္ခိုင်တပ်တွေ မပို့ဖိုကို လက်ခံနိုင်ခြေ မရှိဘူး။ အကျိုး ဆက်အနေနဲ့ အေအေနဲ့စစ်တပ်ကြားက တိုက်ပွဲတွေဟာ ပိုပြီးပြင်ထန် လာနိုင်တယ်။
အေအေအနေနဲ့ စစ်တွေကို ထိုးစစ်ဆင်မယ်ဆိုရင် နိုင်ငံရေးအရ ဖိအားတွေ သိပ်မရှိနိုင်သည့်တိုင်အောင်၊ ကျောက်ဖြူကို ထိုးစစ်ဆင်မယ်ဆိုရင် နိုင်ငံရေးအရ ဖိအားတွေ အများကြီး ရှိနိုင်တယ်။ တစ်ဖက်မှာ တရုတ် လုံခြုံရေးတပ်ဖွဲတွေနဲ့လည်း ထိပ်တိုက်တွေ့တာမျိုး ဖြစ်လာနိုင်တယ်။ သို့သော် အေအေ အနေနဲ့တော့ သူတို့ရဲ့ စစ်ရေး ရည်မှန်းချက် ဖြစ်တဲ့ အာရက္ခ ဒေသတစ်ခုလုံးကို သိမ်းပိုက် ထိန်းချုပ်ရေး အတွက် အစွန်းကုန် ကြိုးစား သေချာတယ်။
အေအေဟာ တရုတ်စီမံကိန်းတွေ မထိခိုက်အောင်၊ မြို့ရွာတွေ ပျက်စီးဆုံးရှုံးမှု နည်းအောင် အတတ်နိုင်ဆုံး ကြိုးစားမှာ ဖြစ်ပေမယ့်၊ ဘယ်နည်းနဲ့မဆို သူတို့ရဲ့စစ်ရေး ရည်မှန်းချက်ကိုတော့ ပြီးမြောက် အောင် ဆောင်ရွက်မှာ သေချာတယ်။
တစ်ဖက်မှာ ရက္ခိုင်တပ်တွေဟာ ဧရာဝတီနဲ့ မကွေးဘက်တွေထိ ထိုးစစ်ဆင်လာ နိုင်လာတယ်။ ရေရှည် မှာ အာရက္ခလုံခြုံရေး အတွက်၊ စစ်အာဏာရှင် အမြစ်ပြတ် ချေမှုန်းရေး အတွက် ဧရာဝတီနဲ့ မကွေးမှာ ရှိတဲ့ ‘ကပစ စက်ရုံ’တွေကို ဦးတည် တိုက်ခိုက်တာမျိုး လုပ်လာနိုင်တယ်။ ပြီးတော့ မဟာမိတ် အင်အား စုတွေနဲ့ စစ်ရေးပူးပေါင်း ဆောင်ရွက်တာ၊ မြန်မာနိုင်ငံ အလယ်ပိုင်းက နွေဦးတော်လှန်ရေး အင်အားစု တွေကို လက်နက်ခဲယမ်း ထောက်ပံ့တာနဲ့ လေ့ကျင့်သင်ကြားပေးတာတွေ လုပ်ဆောင် လာနိုင်တယ်၊၊
တကယ်လို့ အဲဒီလိုသာ အေအေအနေနဲ့ ဧရာဝတီနဲ့ မကွေးကို ထိုးစစ်ဆင်တာ၊ မဟာမိတ်တပ်ဖွဲတွေနဲ့ ပူးပေါင်းဆောင် ရွက်တာ၊ မြန်မာနိုင်ငံ အလယ်ပိုင်းက နွေဦးတော်လှန်ရေး အင်အားစုတွေကို လက်နက် ထောက်ပံ့တာတွေလုပ် လာရင် မြန်မာ့ပြည်တွင်းစစ်မှာ အတိုင်းအတာ တစ်ခုထိ အလှည့်အပြောင်းတွေ ဖြစ်လာနိုင်တယ်။ ဒါကြောင့် ၂၀၂၅ မှာ ဘာတွေဖြစ်လာမလဲ ဆိုတာကတော့ စစ်ခေါင်းဆောင်တွေရဲ့ ဆင်ခြင်တုံတရားနဲ့ ညာဏ် အမြော်အမြင်ရှိမှု တွေမှာ မူတည်နေတယ်။ တစ်ဖက်မှာ စစ်ခေါင်းဆောင်တွေ အနေနဲ့ အေအေနဲ့ ဘယ်လောက်ထိ နိုင်ငံရေးအရ အပေးအယူတွေ လုပ်နိုင်မလဲ ဆိုတဲ့အပေါ်မှာလည်း မူတည်နေတယ်။
ခိုင်စစ်သွီး ရေးသားသည်။
