ထိုင်းနိုင်ငံအထဲမှာ နေထိုင်တဲ့ တရားမဝင်မြန်မာရွှေ့ပြာင်းလုပ်သား ၁သိန်းခွဲကျော်ကို ရက်ပေါင်း ၇၀ ကျော်အတွင်းမှာထိုင်း အာဏာပိုင်းတွေကဖမ်းဆီးနိုင်ခဲ့တယ်လို့ ထိုင်း အလုပ်သမားဝန်ကြီးဌာနက သတင်းထုတ်ပြန်ထားပါတယ်။
ထိုင်းအစိုးရဟာ ရက်ပေါင်း ၁၂၀ စီမံချက် နဲ့ ပြီးခဲ့တဲ့ ဇွန်လ ၅ ရက်နေ့ကတည်းကပင် အထောက်အထားမဲ့ နိုင်ငံခြားသား အလုပ်သမားတွေကို ဖမ်းဆီးခဲ့ရာ သြဂုတ်လ ၂၂ ရက်နေ့မှာ တရားမဝင်နိုင်ငံခြားအလုပ်သမား ၂၀၈,၀၃၅ ဦးကို ရက်ပေါင်း (၇၈) ရက်အတွင်းမှာ ဖမ်းဆီးရမိခဲ့တယ်လို့ ဆိုပါတယ်။
အဲဒီထဲက ၁၅၅,၆၆၉ ဦးဟာ ထိုင်းနိုင်ငံအတွင်းမှာ တရားမဝင်နေထိုင်ကြတဲ့ မြန်မာနိုင်ငံ သားတွေဖြစ်ကြပြီး ကျန်ရှိတဲ့ သူတွေ ဟာ ဗီယက်နမ်၊ လာအိုနှင့် ကမ္ဘောဒီးယားနိုင်ငံသားတွေဖြစ်ကြတယ်လို့ ဆိုပါတယ်။
မြန်မာနိုင်ငံသားအများစုဟာ စစ်ကောင်စီအာဏာသိမ်းပြီးနောက်ပိုင်း နဲ့ စစ်ကောင်စီက စစ်မှုထမ်းဥပဒေအသက်သွင်းပြီး နောက်ပိုင်းမှာ နိုင်ငံအတွင်းက လူငယ်အများစုဟာ စစ်ကောင်စီလက်အောက်မှာ စစ်မှုထမ်းရမှာ စိုးရိမ်တာကြောင့် အိမ်းနှီးချင်း နိုင်ငံဖြစ်တဲ့ ထိုင်းနိုင်ငံ အတွင်းကို ရရာ နည်းလမ်းမျိုးစုံ နဲ့ ထွက်ပြေးလာခဲ့ကြရပါတယ်။
အဲဒီနောက် တရားဝင်နေထိုင်ခွင့် အထောက်အထားမရှိတာကြောင့် အခုလို အစုလိုက် အပြုံလိုက် ဖမ်းဆီးတာကို ခံရတာ ဖြစ်တယ်လို့အလုပ်သမားအရေး ဆောင်ရွက်နေသူ တစ်ဦးကပြောပါတယ်။
“တစ်ရက်မှာ လူ ၁၀၀၀ကျော်လောက်ကိုပုံမှန်ဖမ်းတာ။အရင်က တစ်ခါမှ အခုလို အမြောက်အများဖမ်းတာတော့ မရှိခဲ့ ဘူး။အခုက စစ်ကောင်စီကြောင့် ဒီဘက်ကို နည်းလမ်းမျိုးစုံနဲ့ဝင်လာတယ်။အဆင်ပြေသလို နေတယ်။ဝင်ဖမ်းတော့ အကုန်မိတယ်။တချို့ဆို ထိုင်းတွေကလည်းတိုင်တာရှိတော့ ဖမ်းတာက ပိုပြီးလွယ်တယ်။ကျနော်တို့ မြန်မာတွေ တော်တော် ခက်ခဲကြတယ်“လို့သူကပြောပါတယ်။လက်ရှိမှာလည်း ထိုင်းအစိုးရ ရဲ့ စီမံချက်ဟာ ရက်ပေါင်း ၄၀ နီးပါးကျန်ရှိနေသေးပြီး အထောက်ထားမရှိတဲ့ နိုင်ငံခြားသား အလုပ်သမားတွေကို ပန်းရောင်ကတ် လုပ်ပေးမယ့် အစီစဉ် ဟာလည်း လက်ရှိအချိန်ထိ မရေရာသေးတဲ့ အခြေ အနေတွေ မှာ ရှိနေသေးတာကြောင့် ပိုမိုဂရုစိုက်ဖို့ လိုအပ်တယ်လို့လည်း သူကပြောပါတယ်။
"ပန်းရောင်ကတ်အသစ်တွေ ရိုက်ပေးမယ့်ကိစ္စက မသေချာသေးဘူး။ဝန်ကြီးချုပ်အပြောင်းလဲနဲ့ဆိုတော့။ဒါပေမယ့် အခုဝန်ြ ကီးချုပ် အသစ်က သက်ဆင်ရဲ့ သမီး ဖြစ်နေတော့ ဖြစ်တော့ဖြစ်လာမယ်။ဘယ်တော့ဆိုတာကိုတော့ မသိသေးဘူး။ သူ့အဖေလက်ထက်မှာလည်း ဒီအလုပ်သမား ကိစ္စတွေကို ကောင်းကောင်းလုပ်ပေးခဲ့တော့ မကြာခင်လုပ်ပေးမယ်လို့တော့ ထင်တယ်”လို့ သူကပြောပါတယ်။
