ထိုင်းနိုင်ငံအတွင်းကို တရားမဝင် ဝင်ရောက်လာတဲ့ မြန်မာနိုင်ငံသား ၂၄၅ဦးကို ထိုင်းရဲတပ်ဖွဲ့နဲ့ ထိုင်းစစ်တပ်တို့က ဖမ်းဆီးရမိတဲ့အကြောင်း ထိုင်းသတင်းဌာနတွေရဲ့ ဖော်ပြချက်တွေအရ သိရပါတယ်။
ပြီးခဲ့တဲ့ ဖေဖော်ဝါရီ ၁၄ရက်နဲ့ ဖေဖော်ဝါရီ ၁၈ရက် ၂ရက်အတွင်းမှာဘဲ ကလေးငယ်တွေအပါအဝင် မြန်မာနိုင်ငံသား ၂၄၅ဦးကို ထိုင်းရဲတပ်ဖွဲ့က ဖမ်းဆီးရမိခဲ့တာဖြစ်တယ်လို့ ဆိုပါတယ်။
ဖေဖော်ဝါရီ ၁၄ ရက်နေ့ မနက်ပိုင်းတုန်းက ထိုင်းနိုင်ငံ၊ ဖက်ချာဘူရီခရိုင် ဖက်ခါဆမ်လမ်းပေါ်မှာ မြန်မာနိုင်ငံသား အမျိုးသား ၄၉ ဦး၊ အမျိုးသမီး ၄၆ ဦးနဲ့ ကလေးငယ် ၁၁ ဦး လိုက်ပါလာတဲ့ ကုန်တင်ကားတစ်စီးကို ထိုင်းရဲတပ်ဖွဲ့က ဖမ်းဆီးခဲ့တယ်လို့ သိရပါတယ်။
အဲ့ဒီနေ့ ညနေပိုင်းမှာဘဲ မဲဆောက်ခရိုင်၊ ထိုင်း-မြန်မာ ချစ်ကြည်ရေး အမှတ် ၁ တံတား ပတ်ဝန်းကျင်မှာ သောင်ရင်းမြစ်ကနေ တရားမဝင် ဖြတ်ကျော်ဝင်ရောက်လာတဲ့ မြန်မာနိုင်ငံသား ၂၃ဦးကို ထိုင်းစစ်တပ်က ဖမ်းဆီးရရှိခဲ့ပါသေးတယ်။
ဖမ်းဆီးရမိတဲ့ မြန်မာနိုင်ငံသားတွေကို မြန်မာနိုင်ငံဘက်ကို ပြန်ပို့ဆောင်သွားမှာဖြစ်တယ်လို့လည်း ထိုင်းသတင်းဌာနတွေရဲ့ ဖော်ပြချက်တွေအရ သိရပါတယ်။
ဖေဖော်ဝါရီလ ၁၈ ရက်နေ့ ညနေပိုင်းမှာလည်း ထိုင်းနိုင်ငံ၊ ထိုင်း-မြန်မာ နယ် စပ် ကန်ချနဘူရီပြည်နယ်၊ ဆန်ခလဘူရီမြို့မှာ တရားမဝင် ဝင်ရောက်လာတဲ့ မြန်မာနိုင်ငံသား ၁၁၆ ဦးကို ထိုင်းအာဏာပိုင်တွေက ဖမ်းဆီးရမိတဲ့ အကြောင်းကို ထိုင်းသတင်းဌာနတွေမှာ ဖော်ပြထားပါတယ်။
ဖမ်းဆီးခံရသူအများစုဟာ ထိုင်းနိုင်ငံ၊ ဘန်ကောက်နဲ့ မလေးရှားနိုင်ငံဘက်တွေမှာ အလုပ်လုပ်ဖို့ တရားမဝင် နယ်စပ်ဖြတ်ကျော်ဝင်ရောက်လာတာဖြစ်ပြီး၊ တစ်ယောက်ကို ဘတ် ၁၈၀၀၀ ကနေ ၂၀၀၀၀ အထိ ပွဲစားတွေကို ပေးခဲ့ရတယ်လို့ ဆိုပါတယ်။
ဒါပေမယ့် လမ်းခုလပ်မှာဘဲ ပွဲစားတွေက မြန်မာနိုင်ငံသားတွေကို စွန့်ပစ်သွားခဲ့ပြီးနောက် ထိုင်းအာဏာပိုင်တွေဆီမှာ ဖမ်းဆီးခံခဲ့ရတာလို့ ထိုင်းသတင်းဌာနတွေက ဖော်ပြပါတယ်။
ဖမ်းဆီးခံရသူတွေထဲမှာ စစ်ကောင်စီရဲ့ စစ်မှုထမ်း ဥပဒေကို ရှောင်တိမ်းဖို့ ထွက်ပြေးလာသူတွေလည်း ပါဝင်တယ်လို့ သိရပါတယ်။
အသက်ပြည့်ပြီးသူတိုင်း စစ်မှုထမ်းရမယ့် ပြည်သူ့စစ်မှုထမ်း ဥပဒေကို စစ်ကောင်စီက ပြဌာန်းပြီးနောက်ပိုင်း လူငယ်အများစုဟာ တရားမဝင်လမ်းကြောင်းကတဆင့် ပြည်ပနိုင်ငံဘက်ကို တိမ်းရှောင်လာတာတွေ အများအပြားရှိနေပါတယ်။
စစ်ကောင်စီကလည်း တရာဝင်လမ်းကြောင်းကတဆင့် ပြည်ပနိုင်ငံထွက်ခွင့်တွေကို တင်းကျပ်ထားသလို အထူးသဖြင့် အသက် ၁၈ နှစ်ကနေ ၃၅နှစ်အတွင်း အမျိုးသားတွေကို ပြည်ပအလုပ် အကိုင်အတွက် စာချုပ်ချုပ်ဆိုတာတွေကို ဒီနှစ် ဇန်နဝါရီလအတွင်းမှာ အကန့်အသတ်မရှိရပ်ဆိုင်းတဲ့အကြောင်း ညွှန်ကြားထားတယ်လို့လည်း သိရပါတယ်။
ဒါ့အပြင် စစ်ကောင်စီက ပြဋ္ဌာန်းထားတဲ့ ပြည်သူ့စစ်မှုထမ်း နည်းဥပဒေ ပုဒ်မ – ၅၁ အရ စစ်မှုထမ်းဖို့ဆင့်ခေါ်တဲ့အမိန့်စာ ရရှိသူတွေဟာ စစ်မှုထမ်းဗဟိုအဖွဲ့ရဲ့ ခွင့်ပြုချက်မရှိဘဲ ပြည်ပနိုင်ငံတွေကို ထွက်ခွာခွင့် မရှိဘူးလို့ ဖော်ပြထားပါတယ်။
