(ကလေးငယ် ၂ ဦး နဲ့ အမျိုးသား တစ်ဦး အပြင်းအထန်ဒဏ်ရာရ)
သံတွဲမြို့နယ် အတွင်းက အဘဲကျေးရွာကို ဒီနေ့ နေ့လယ်လောက်မှာ စစ်ကောင်စီ နေဗီက အတွဲလိုက် ဒုံးတွေ နဲ့ ပစ်ခတ်ခဲ့ တာကြောင့် ကျေးရွာ အတွင်းကို စစ်ကောင်စီ ပစ်ခတ်လိုက်တဲ့ လက်နက်ကြီး ကျည်ကျရောက်ပေါက်ကွဲခဲ့ပြီး အဘဲကျေးရွာ အတွင်းက ကိုယ်ဝန်ဆောင် အမျိုးသမီး အပါအဝင် အရပ်သား ၅ ဦးသေဆုံးပြီး ၃ ဦးအပြင်း အထန် ဒဏ်ရာ ရရှိခဲ့ တယ်လို့ ဒေသခံတွေက အတည်ပြုပြောပါတယ်။
အဲဒီပစ်ခတ်မှုကို ကသစ်ကျွန်း အနီးမှာ ရပ်ထားတဲ့ စစ်ကောင်စီ နေဗီက ၅ စီကနေ အတွဲလိုက် ဒုံးတွေ နဲ့ဆက်တိုက် ပစ်ခတ်ခဲ့တာ ဖြစ်ပြီး အဘဲ ကျေးရွာ ဝင်ဝက နေအိမ်တွေကို ကျရောက်ပေါက်ကွဲခဲ့တာကြောင့် ကိုယ်ဝန်ဆောင်အမျိုး သမီး တစ်ဦး အပါအဝင် အရပ်သား ၅ ဦးသေဆုံးခဲ့ရပြီး ကလေးငယ် ၂ ဦးအပါအဝင် အမျိုးသား တစ်ဦးမှာလည်း အပြင်းအထန် ဒဏ်ရာ ရရှိခဲ့ရတာ ဖြစ်တယ်လို့ အဘဲကျေးရွာ ဒေသခံ တစ်ဦးကေ ပြာပါတယ်။
“လက်နက်ကြီး ကျတာကတော့ ရွာရဲ့ ဝင်ဝ ပိုင်းကို ကျတာ။ သေတာက အမျိုးသမီး ၄ ဦး အမျိုးသား တစ်ဦး အမျိုးသမီး ၄ ဦးသေသွားတဲ့ အထဲမှာ ကိုယ်ဝန်ဆောင်အမျိုးသမီး တစ်ဦး ပါတယ်။ နောက် အသက်ကြီးပိုင်း အမျိုး သမီး တစ်ဦးဆိုရင် ခါး တစ်ပိုင်း ပြတ်သွားတယ်။ ၄ ယောက်ကတော့ ပွဲချင်းပြီးသေတယ်။ ခါးပြတ်သွားတဲ့ အမျိုးသမီးကြီးကတော့ ဆေးရုံလိုက်ပို့မယ့် ကားရှာနေချိန်မှာ သေသွားတယ်။ ဒဏ် ရာ ရတာက အမျိုးသား တစ်ဦး နဲ့ ကလေးငယ် ၂ ဦး ဒဏ်ရာ အပြင်း အထန် ရတယ်လို့ ”သူက အတည်ပြု ပြောပါတယ်။အခုလို စစ်ကောင်စီက အတွဲလိုက်ဒုံးတွေ နဲ့ ပစ်ခတ်ခဲ့တဲ့ အဘဲကျေးရွာ အနီးမှာ တိုက်ပွဲ တစ်စုံတရာ ဖြစ်ပွားတာ မရှိဘဲ စစ်ကောင်စီက အရပ်သားပြည်သူတွေ နေထိုင်ရာ နေရာကို ရည်ရွယ်ချက် ရှိရှိနဲ့ ဦးတည် ပစ်ခတ်ခဲ့တာ ဖြစ်တယ်လို့လည်း ဒေသခံတွေကဆိုပါတယ်။
စစ်ကောင်စီက အခုလို တိုက်ပွဲ ဖြစ်ပွါးတာ မရှိပဲ အတွဲလိုက် ဒုံးတွေ နဲ့ ဆက်တိုက်ပစ်ခတ်မှု ပြုလုပ်ခဲ့တာကြောင့် အဘဲကျေး ရွာဒေသခံတွေဟာ ကျေးရွာ အတွင်းမှာ မနေထိုင်ရဲကြတော့ဘဲ ကျေးရွာအတွင်းက နေအိမ်တွေကိုစွန့်ခွါကာ ဘေးလွတ်ရာ နေရာတွေကို ထွက်ပြေးတာတွေလည်း များစွာ ရှိနေတယ်လို့ နောက်ထပ် အဲဒီကျေးရွာအတွင်းက ဒေသခံ တစ်ဦးက ဆိုပါတယ်။
“လက်နက်ကျည်တွေက ရွာနားကို ဆက်တိုက်ကျတယ်။တစ်နေကုန်ပစ်နေတာ တိုက်ပွဲ ဖြစ်နေတာ မရှိဘဲ ဒီအတိုင်း ရမ်းသမ်း ပြီးတော့ ပစ်တာ။ရွာကလူတွေကတော့ တနေကုန်ပစ်နေတော့ မနေရဲလို့ အကုန်ထွက်ပြေးနေကြရတယ်လို့”သူ ကပြောပါတယ်။အဲဒါတွေအပြင် မဲနယ်ကွင်း ကျေးရွာ အနီးကိုလည်း အဲဒီ ကသစ်ကျွန်း အနီးမှာရပ်ထားတဲ့ စစ်ကောင်စီနေဗီတွေက ညနေ ၆ နာရီဝန်းကျင်လောက်အထိ အတွဲလိုက်ဒုံးတွေနဲ့ ဆက်တိုက်ပစ်ခတ်ခဲ့တာတွေလည်း ရှိခဲ့တယ်လို့ သံတွဲ မြို့နယ် အတွင်း က စစ်ရေး အခြေအနေကို စောင့်ကြည့်နေသူတွေရဲ့ပြောဆိုချက် အရ သိရပါတယ်။
အာရက္ခတပ်တော် အေအေ ဟာ သံတွဲမြို့ တိုက်ပွဲ ၃ လတာ ကာလအတွင်းမှာ သံတွဲမြို့ နယ် ၊ ငပလီမြို့အတွင်းက ဖဇင် လေဆိပ် အပါအဝင် စစ်ကောင်စီ အခြေစိုက် တပ်ရင်းတွေ ဖြစ်ကြတဲ့ ခလရ – ၅၅ တပ်ရင်း နဲ့ ခမရ – ၅၆၆ တပ်ရင်းတွေကို အပြီးသတ် သိမ်းပိုက် နိုင်ခဲ့ပြီး ဖြစ်သလို သံတွဲ မြို့တွင်းကိုလည်း ထိန်းချုပ်ထားနိုင်ပြီး ဖြစ်ပါတယ်။
အဲဒီနောက် သံတွဲမြို့တွင်းက ထွက်ပြေးနေကြတဲ့ စစ်ကောင်စီ တပ်ဖွဲ့ဝင်တွေ နဲ့ ခလရ – ၅၅ တပ်ရင်း နဲ့ ခမရ – ၅၆၆ တပ်ရင်းတွေက ထွက်ပြေးနေကြတဲ့ စစ်ကောင်စီ တပ်ဖွဲ့တွေဟာ မြပြင် နဲ့ လင်းသာကြားက ရေဝါတောင်နဲ့ ငှက်ပျော ချောင်းဆည် အနီးတစ်ဝိုက်မှာ အေအေ ရဲ့ထိုးစစ်ကို အင်အားတွေ တပ်မံဖြည့်တင်းကာ ခုခံစစ်အနေ အထားနဲ့ ဆက်လက် ခုခံ တိုက်ခိုက်နေသလို စစ်ကောင်စီကလည်း လက်နက်ကြီးတွေ နဲ့ ပစ်ခတ်တာ လေကြောင်း တိုက်ခိုက်တာ အပြင် ဒရုန်းတွေ နဲ့ ပစ်ခတ်တာတွေကိုပါဆက်တိုက် လုပ်ဆောင်နေတယ်လို့ သံတွဲ စစ်ရေး အခြေအနေကို စောင့်ကြည့်နေသူ တစ်ဦးကပြောပါတယ်။
