ဆက်လက်ရှုံးနေရဦးမည့် စစ်ကောင်စီ၏တိုက်ပွဲများ

လူ့အကျင့်ကို ကျင့်သောသူကိုသာ လူဟူခေါ်ထိုက်၏။ သို့သော် လူကျင့်ဝတ်လူ့ဂုဏ်သိက္ခာနှင့်ကင်းဝေး သော လုပ်ရပ်တို့ ကို လုပ်ဆောင်သောသူတို့ကိုကား လူဟုမခေါ်ဆိုနိုင်ပေ။ ရက်စက်ယုတ်မာမှုများနှင့်ပြည်နှက် နေ သည့် ၊ လူသားချင်း စာနာမှုကင်းဝေးနေသည့် ငမိုက်သားတို့၏ လားရာလမ်းသည်ကား ငရဲပြည်တစ်ခုတည်း သာတည်း။

လူသည်မည်သည့်တာဝန်ကို ထမ်းဆောင်စေကာမူ လူပီသဖို့လိုအပ်သည်။ စစ်သားဆိုသည်မှာလည်း စစ်မှုထမ်းရ သည်ဆို စေကာမူ ရက်စက်ခြင်း၊ ယုတ်မာခြင်းကင်းရမည်ဖြစ်သည်။ စစ်သည်အနိထာရုံမှန်၏။ သို့သော် လှံလှန်ချင်း၊ ဓား ဓားချင်း၊ သေနပ် သေနပ်ချင်း တိုက်ခိုက်ကြခြင်းသည် စစ်ပွဲမည်၏။

သို့စေကာမူ ယခု စစ်ကောင်စီတပ်သားများလုပ်ဆောင်နေသော လုပ်ဆောင်ချက်များမှာ ထိုသို့မဟုတ်ပေ။ တွေ့ရာ ပြည်သူတွေကို ဖမ်းဆီး၊ တစ်ချို့ကို ငွေညှစ်၊ ရသလောက်ယူ။ တစ်ချို့အိမ်များကို မီးရှို့ဖျက်စီး၊ လူသတ်၊ မုဒိန်းကျင့်။ ထိုကဲ့သို့သော လွန်စွာမှ ရွံစရာကောင်းလှသည့် လူမဆန်သော လုပ်ရပ်များကို တော်ရုံစစ်သားများ လုပ်ဆောင်မည်မ ဟုတ်ပေ။

ကြွက်မနိုင် – ကျီ မီးရှို့ဆိုသည့် စကားပုံအတိုင်းပင် တိုင်းရင်းသားလက်နက်ကိုင်များကို မနိုင်သည့် အတွက် ရွာများကို မီးရှို့၊ လူသတ်၊ စသောအလုပ်များကိုသာ လုပ်ဆောင်နေသည့် စစ်ကောင်စီတပ် သားများ၏ သွားရမည့်လမ်းကို ပြည်သူ များက ဆုံးဖြတ်ပေးပါလိမ့်မည်။ မကြာတော့သော ကာလတစ်ခုတွင် စစ်ကောင်စီ တပ်သားများအနေဖြင့် နေပြည်တော် တစ်ခုတည်းတွင်သာ စုဝေးနေထိုင်ကြရပေလိမ့်မည်။ အရှုံးနှင့် ရင်ဆိုင်ရ တော့ မည့် အချိန်မှာ များစွာမဝေးလှတော့ပေ။

တိုင်းရင်းသားလက်နက်ကိုင်အားလုံးကလည်း တစ်ချိန်တည်းတစ်ပြိုင်တည်းတွင် စုပေါင်းတိုက်ခိုက်နေ ကြပြီဖြစ်သကဲ့သို့ လက်နက်ကိုင်တော်လှန်ရေးအင်အားစုများမှာလည်း တစ်နေ့ထက်တစ်နေ့ များပြားလာစေခဲ့ သည်။ ထိုသို့များပြား ရန်အ တွက် စစ်ကောင်စီကပင် တွန်းပို့ပေးခဲ့ခြင်းဖြစ်သည်။

ကျေးရွာတစ်ခုသို့ရောက်လျင် လူငယ်များအား အနိုင်ကျင့်စော်ကားသည်။ အပြစ်မျိုးစုံဖြင့် ဖမ်းဆီးခေါ်ဆောင်သွားသည်။ ထိုလုပ်ရပ်များသည် လူငယ်များ လက်နက်ကိုင်တပ်ထဲသို့ ဝင်ရန်စစ်ကောင်စီက ကူညီပေးခြင်းပင်ဖြစ်သည်။ အလား တူစွာပင် ရခိုင် ပြည်နယ်အတွင်းမှ လူငယ်များကို AA တပ်ဖွဲ့နှင့်အဆက်အသွယ်ရှိသည်ဟု ဆိုကာ ဖမ်းဆီးခြင်း၊ ကျေးရွာတွင် ဆက်ကြေးတောင်းခြင်း၊ ရွာသားများပိုင် ကျွဲ၊ နွား၊ ဝက်များကို သတ်စားခြင်းများလုပ်ဆောင်ခဲ့သည့်အတွက် လူငယ်များစွာတို့သည် AA သို့ရောက်ရှိသွားကြသည်။ ယနေ့အချိန်တွင် အေအေ အင်အားကြီးထွားလာခဲ့သည် မှာ စစ်ကောင်စီ၏ ယုတ်မာမှုကြောင့်ဖြစ်သလို အပြစ်မဲ့ပြည်သူများဖြစ်သည့် လူငယ်များအနိုင်ကျင့်ခဲ့သည့် အတွက် ထိုသို့ အင်အားကြီးထွားလာခဲ့ခြင်းဖြစ်သည်။

မကြာသေးမီက စစ်မှုထမ်းဥပဒေကို ပြဋ္ဌာန်းပြန်သည်။ ထိုသို့ပြဋ္ဌာန်းလိုက်သည့်အတွက်လည်း လက်နက်ကိုင် တော်လှန်ရေးတပ်များ အင်အားထပ်မံကြီးထွားလာခဲ့ရပြန်သည်။ “ငါတို့ကို တိုက်ဖို့ အင်အား ကြီးအောင်လုပ်ကြပါ၊ ငါတို့ကိုလာတိုက်ကြပါ”ဟု လုပ်ဆောင်လိုက်ခြင်းပင်ဖြစ်သည်။

ကျောင်းနေအရွယ်များစွာ တို့သည် ကျောင်းမနေရမည့်အတူ လက်နက်ကိုင်တိုက်ပွဲဝင်တော့မည်ဟု ဆုံးဖြတ်ချက်ခိုင်မာစေခဲ့သည်။ စစ်ကောင်စီ၏ လုပ်ရပ်များသည် မှားပြီးယင်း မှာနေတော့သည်။ အမှားတစ်ခုလုပ်ပြီးတိုင်း အမှားများထပ်ကာတလဲလဲ နောက်ကလိုက်လာခဲ့တော့သည်။ ယင်းအမှား များကို ဘုရားတွင်ကောင်းမှုလုပ်ရုံဖြင့် ချေဖျက်နိုင်မည်မဟုတ်သည်မှာသေချာသည်။

ယခုနှစ်ပိုင်းအတွင်း တိုက်ပွဲတိုင်းသည် စစ်ကောင်စီဘက်မှ ခံစစ်အဖြစ်သာ တိုက်နေရပြီး တိုက်ပွဲမြောက်များစွာကို အရှုံးနှင့်ရင်ဆိုင်နေခဲ့ရသည်။ တိုက်လိုက်တိုင်းရှုံးလာရသည့် အဖြစ်သည် စစ်သားများ အနေဖြင့် မတိုက်လိုတော့သည့် စစ်ပွဲကို တိုက်နေရခြင်းတစ်ကြောင်း၊ သွေးပျက်ထိတ်လန့် နေရခြင်းက တစ်ကြောင်း၊ တာဝန်တစ်ခုတည်းအတွက် တိုက်ရသည်ကတစ်ကြောင်း၊ စားသောက်ရေးအတွက် ရိက္ခာအပြည့် အ၀ မရသည်က တစ်ကြောင်းတို့ကြောင့်ဖြစ်သည်။

သို့သော်လည်း တော်လှန်ရေးတိုက်ပွဲဝင်ရဲဘော်များသည် ရင်ဘတ်နှင့်တိုက်ခိုက်ခြင်း၊ နှလုံးရည်နှင့်တိုက်ခိုက်ခြင်း၊ ခံပြင်းစိတ်တို့ပြည့်နှက်နေခြင်းတို့ကြောင့် အကြောက် တရားကင်းမဲ့ပြီး ဂုဏ်သိက္ခာရှိရှိ တိုက်ခိုက်နေကြခြင်း ဖြစ်သည့် အတွက် အောင်မြင်လာရခြင်းဖြစ်သည်ဟုလည်း သုံးသပ်ယူဆမိပါသည်။

လတ်တလောဖြစ်ပေါ်နေသော လူသတ်မှုကြီးများအကြောင်းကို တင်ပြရလျှင် စစ်တွေမြို့၊ ဗျိုင်းဖြူရွာမှာ သတ်ဖြတ်သွားတဲ့ လူသတ်မှုကြီးပင်ဖြစ်သည်။ လူပေါင်း ၇၀ ဝန်းကျင်ကို သတ်ဖြတ်ခဲ့သော လူသတ်မှုကြီးသည် လွန်စွာရွံရှာမုန်း တီးစရာ ကောင်းသော လူသတ်မှုကြီးတစ်ခုဖြစ်သည်ကို အထူးပြောရန်မလိုအပ်တော့ပေ။

သာမန် အရပ်သားပြည်သူများကို အကြောင်းမဲ့ သတ်ဖြတ်ခြင်း၊ ဖမ်းဆီးနှိပ်စက်ခြင်း၊ လက်နောက်ပြန်ကြိုး တုတ်ပြီး နေပူလှန်းထားခြင်း။ အမျိုးသမီးများကို အဓမ္မပြုကျင့်ပြီးသတ်ဖြတ်ခြင်းများသည် လူ့အခွင့်အရေးကို ချိုး ဖောက်သကဲ့သို့ ခွေးကျင့်ခွေးကြံ လုပ်ရပ်များဖြစ်သည်ဟုပင် ပြောရမည်ဖြစ်ပေသည်။

သို့သော်….. သို့သော်လည်း …. အဆိုပါလူသတ်မှုကြီးနှင့်ပတ်သက်၍ လူ့အခွင့်သမားများ နှုတ်ပိတ်နေခြင်းသည် အဘယ်ကြောင့်နည်း။ စဉ်းစားစရာအချက်များပင်ဖြစ်သည်။ ဘင်္ဂါလီဆယ်ယောက်သေ လျင်ပင် လူ့အခွင့်အရေး သများက မအိပ်နိုင် မစားနိုင်ထအော်လေ့ရှိကြသော်လည်း ဗျိုးဖြူရွာကိစ္စနှင့်ပတ်သက်ပြီး နှုတ်ဆိတ်နေခြင်းသည် တွေးတောစရာ များပင်ဖြစ်ပေသည်။

၂၀၁၂ ဘင်္ဂါလီ-ရခိုင်အရေးအခင်းတွင် ဘင်္ဂါလီများကို အစုလိုက်အပုံလိုက်သတ် ဖြတ်ခဲ့သည့်ဖြစ်စ ဉ်အား ရိုက်တာသတင်းဌာနက ဖော်ထုတ်ခဲ့သည့် အတွက် ကမ္ဘာကသိခဲ့ရသည်။ သို့သော်လည်း ယခုအခါတွင် ဘင်္ဂါလီများနှင့် လက်တွဲပြီး အာရက္ခတပ်တော်ကို ပြန်လည်တိုက်ခိုက်လာသည်မှာ အပေးအယူကစားတစ်ခုရှိနေသည်ကို မြင်တွေ့လာရပြန်သည်။

ယင်းအပြင် စစ်တွေမြို့ပေါ် ဘုန်းတော်ကြီးကျောင်းများတွင် တည်းခိုးခိုလှုံနေကြသော ပြည်သူ ၂၀၀ ကျော်နှင့် မင်းဂံရပ်ကွက်မှ ပြည်သူ ၂၀၀ ကျော်တို့ကို ဖမ်းဆီးတရားစွဲဆိုခြင်းများမှာလည်း လွန်စွက်ရက်စက်ပြီး လူမဆန်သည့် အပြုအမူများပင်ဖြစ်ပေသည်။ စစ်ဘေးစစ်ဒဏ်ကို စိုးရိမ်ကြောက်လန့်ပြီး အိုးအိမ်များကို စွန့်ခွါကာ တိမ်းရှောင်လာကြသည့် စစ်ဘေးသင့်ပြည်သူများသည် မည်သည့်ပြစ်မှုများကို ကျူးလွန်ပါအံ့နည်း။

အေအေအနေဖြင့်ဆိုလျှင် တိုက်ပွဲအတွင်း ဖမ်းဆီးရမည့်သည့် သူများကိုပင် စားသောက်ရေးနှင့်လုံခြုံစွာထား ပေးသည်။ တပ်မိသားစုများကိုပင် ကူညီပံ့ပိုးပေးသေးသည်။ စစ်တပ်နှစ်ခု၏ လုပ်ရပ်ကို နှိုင်းယှဉ်ကြည့်လျင် လွန်စွာကွာခြားနေသည်။ ယင်းအတွက်နှင့်လည်း အေအေသည် တိုက်ပွဲတိုင်းတွင် အောင်ပွဲများကို ရရှိနေခြင်း ပင်ဖြစ်ပေမည်။

ငါးဦးနှင့် အထက် အစုလိုက်အပြုံလိုက်သတ်ဖြတ်ခြင်းနှင့်ပတ်သက်ပြီး ၂၀၂၁ ဖေဖော်ဝါရီလ ၁ မှ ၂၀၂၄ မေလ (၅)ရက်နေ့အထိ အစုလိုက်အပုံလိုက်သတ်ဖြတ်ခြင်း အကြိမ်ရေ ၂၃၉ ကြိမ် ကျူးလွန်၊ မ ၁၃၇၇ မ-၃၂၂ ဦး၊ ခွဲမရ ၈၅၂ စုစု၂၅၅၂ ယောက်သတ်ဖြတ်ခံခဲ့ရသည်။ ထိုသတ်ဖြတ်မှုများကို မစီကြီး၊ ပဲခူး၊ ဗျိုင်းဖြူရွာ အစရှိသော ဒေသများအပြင် အခြားနေရာများတွင်လည်း သတ်ဖြတ်မှုများစွာရှိခဲ့မည်ဖြစ်ပေသည်။

ထိုသို့အစုလိုက် အပြုံလိုက်သတ်ဖြတ်မှုများသည် ရာဇဝတ်မှုမြောက်ကြောင်းကို လည်း လေ့လာသူများက ဆို သည်။ မစီကြီးလေကြောင်းတိုက်ခိုက်မှုတွင် သေဆုံးသူပေါင်း ၁၅၉ ဦးအထိရှိခဲ့ပြီး အများဆုံးဖြတ်ခဲ့ခြင်းဖြစ် သည်ကိုလည်း စာရင်းပြုစုသူများထံမှ သိရှိရသည်။ အလားတူ ပဲခူးဆန္ဒပြမှုတွင် လည်း ၈၀ ကျော်အထိသတ်ဖြတ်ခံခဲ့ရခြင်းဖြစ်ကြောင်းနှင့် ဖားကန့်၊ အနန့်ပါ တွင် ၈၀ ခန့်သတ်ဖြတ်ခဲ့ဖြင့်လည်းဆိုသည်။ စစ်ကောင်စီတပ်မှ သတ်ဖြတ်မှုကြောင့် နိုင်ငံတစ်ဝှမ်းတွင် သေဆုံးသူပေါင်း ၅၃၀၀ ကျော်ရှိနေပြီဟုလည်း DVB သတင်းအရ သိရှိရသည်။

ထိုသို့ အရပ်သားများကို ရည်ရွယ်ချက်ရှိရှိသတ်ဖြတ်ခြင်းသည် လူသားမျိုးနွယ်အပေါ်ပြုကျင့်ကျူးလွန်သည့် ရာဇဝတ်မှုဟုလည်း သုံးနှုန်းကြသည်။ ထိုပြစ်မှုများကို ICC တွင်သာဆုံးဖြတ်လေ့ရှိကြောင်းလည်းသိရှိရသည်။ ထို လုပ်ရပ်သည် ပြည်သူများကို ခြိမ်းခြောက်ခြင်းဖြစ်ပြီး ပြည်သူများကြောက်လန့်သွားစေရန်၊ စစ်ရေးလှုပ် ရှားမှုများမလုပ်နိုင်ရန် လုပ်ဆောင်ခြင်းများဖြစ်သော်လည်း လက်နက်ကိုင်တော်လှန်နေကြသော တော်လှန်ရေး တပ်ဖွဲ့ ဝင်များအနေဖြင့် နောက်ဆုတ်သွားမည်မဟုတ်ကြောင်းကို မျက်မြင်သက်သေအဖြစ်ပြသ နေကြဆဲဖြစ်ပေသည်။

လက်ရှိနေ့များတွင် ရခိုင်တိုက်ပွဲများကို လေ့လာကြည့်လျှင် တောင်ကုတ်၊ သံတွဲနှင့် မောင်တောမြို့နယ် များတွင် အဓိက တိုက်ခိုက်နေကြသည်ကို တွေ့ရသည်။ မောင်တောမြို့နယ်အတွင်း စစ်ကောင်စီတပ်များ များစွာ မကျန်တော့သကဲ့သို့ မြို့ကိုဝင်ရောက်တိုက်ခိုက်တော့မည်ဟုလည်း အေအေက သတင်းထုတ်ပြန်ထား ခဲ့ သည်။

ထိုသို့ထုတ် ပြန်ထား သည်နှင့်တစ်ပြိုင်နက် မောင်တော မြို့တွင်းသို့ စစ်ကောင်စီတပ်များဝင်ရောက်ကာ နေအိမ်များတွင် တပ်စွဲ ထားခြင်းများကိုပြုလုပ်လာခဲ့ကြောင်းဒေသခံများက ဆိုသည်။ မြို့တွင်းမှ တိုင်းရင်းသား များကို မြို့ပြင်ထွက်ခွင့်မပေးဘဲ ပိတ်ထားသည်။ လူပေါင်းထောင်ချီ မြို့တွင်းတွင် ပိတ်မိနေဆဲဖြစ်ကြောင်းလည်း သတင်းများကဆိုကြသည်။

နောက်တစ်ခုမှာ မောင်တောမြို့ကို ဝိုင်းပတ်ထားသည်မှာ ဘင်္ဂါလီကျေးရွာများဖြစ် ပြီး ထိုကျေးရွာများကို စစ်ကောင်စီက လက်နက်များပစ်ခတ်ကာ အေအေပစ်ခတ်ကြောင်း သတင်းထုတ်ပြန်ရန် အဆင်သင့်လုပ်ဆောင်ထားကြောင်းလည်း ဘင်္ဂါလီများက သုံးသပ်ကြသဖြင့် စိုးရိမ်ရသော အခြေအနေသို့ ရောက်ရှိနေသည်ဟုလည်း ဆိုကြသည်။ လက်ရှိတွင် မောင်တောမြို့နှင့်ကပ်ရပ်တွင် တိုက်ပွဲများပြင်းပြင်း ထန်ထန် ဖြစ်ပွားနေသည်ဟုလည်း ဒေသခံများထံက ကြားသိရသည်။

ထို့အပြင် သံတွဲမြို့နှင့်အနီးဆုံးနေရာသို့ အေအေရောက်ရှိလာပြီဖြစ်သဖြင့် မြို့ပေါ်မှ ဒေသခံများဘေး လွတ် ရာသို့ ရှောင်တိမ်းသွားကြပြီဖြစ်သည်။ ယင်းသို့ရှောင်တိမ်းသွားသည့်တိုင် စစ်ကောင်စီတပ်ဖွဲ့ဝင်များ သည် ရဲစခန်းနှင့် မြို့နယ်၊ ခရိုင်အုပ်ချုပ်ရေးရုံးအဆင့်တို့တွင်သာ စစ်တပ်နှင့်ရဲအနည်းငယ်ထားရှိပြီး ငပလီဘက်ခြမ်းကို အင်အား အလုံးအရင်းဖြင့် ကာကွယ်ထားကြောင်းလည်း သံတွဲဒေသခံများကဆိုသည်။

ထိုသို့ သံတွဲမြို့ကို တပ်အင်အားအနည်းငယ်သာချထားပြီး ငပလီကို အဓိက ကာကွယ်နေခြင်းသည် မည်သည့် အတွက်ဖြစ်နိုင်ပါသလဲ။ ငပလီပင်လယ်ကမ်းခြေတစ်လျှောက်တွင် တည်ထားသော ဟိုတယ်ပေါင်း မြောက်များ စွာတို့ကို ပိုင်ဆိုင်သူများမှာ စစ်ကောင်စီနှင့် သားသမီးများ၊ စစ်ကောင်စီနှင့်အပေါင်းအပါများပင်ဖြစ်သည်။

မြောက် များလှစွာသော ပိုင်ဆိုင်မှုများနှင့် ရင်းနှီးမြှုပ်နှံမှုများကို ပြုလုပ်ထားခြင်းကြောင့်ဖြစ်သည်ဟု ယေဘုယျ အားဖြင့် ရှုမြင်နိုင်ဖွယ်ရှိပါသည်။ ယင်းတို့၏ ပိုင်ဆိုင်မှုများကို ဆုံးရှုံးရမည်ကို စိုးရိမ်သည့်အတွက် သံတွဲထက် ငပလီကို ကာကွယ်နေခြင်းဖြစ်သည်ဟု ဆိုရမည်ဖြစ်ပေသည်။

ထို့အပြင် လတ်တလောသိလာခဲ့ရသည့် တရုတ်ပြည်က ကူညီပေးသော သင်္ဘော(၆)စီးကိစ္စနှင့် အဆင့် မြင့်ဒရုန်းများကို အသုံးပြုလာသည့် ကိစ္စသည် တော်လှန်ရေးတပ်ဖွဲ့များအတွက် သတိထားစရာအချက်များ ဖြစ် ကောင်းဖြစ်လာနိုင်မည်ဟု လည်း နိုင်ငံရေးအကဲခတ်များက သုံးသပ်ကြသည်။

လက်ရှိရခိုင်ပြည်နယ်အတွင်း အေအေက သိမ်းပိုက်ထားသော မြို့များမှာ ပေါက်တော၊ မင်းပြား၊ မြေပုံ၊ ရမ်းဗြဲ၊ ကျောက်တော်၊ မြောက်ဦး၊ ရသေ့တောင်၊ ပုဏ္ဏားကျွန်းတို့ဖြစ်ပြီး ကျန်မြို့နယ်အချို့မှာလည်း သိမ်းပိုက်ရ ရှိတော့မည် လက်တကမ်းအလိုသို့ရောက်ရှိနေပြီဖြစ်သည်ဟုလည်း သတင်းများအရသိရသည်။

သို့သော်လည်း ထိုသို့သိမ်းပိုက်ထား သည့် မြို့နယ်များအတွင်းသို့ စစ်ကောင်စီတပ်မှ လေယာဉ်ဖြင့် ညအချိန်များတွင် ဗုံးကြဲချ ခြင်းများကို နေ့စဉ်လုပ် ဆောင်နေသဖြင့် အပြစ်မဲ့ပြည်သူများ နေစဉ်သေဆုံးမှုနှင့်ထိခိုက်ဒဏ်ရာရရှိမှုများကို လည်း ကြုံတွေ့နေရဆဲဖြစ် ကြောင်းသတင်းများအရ သိရှိရသည်။

ခြုံ၍ဆိုရသော် တိုက်ပွဲတိုင်းတွင် ရှုံးနိမ့်လာသော စစ်ကောင်စီတပ်သည် လက်နက်ကိုင်တော်လှန်ရေး တပ်ဖွဲ့များကို ရှုံးနိမ့်နေရသည့်အတွက် အရပ်သားပြည်သူများကိုသာ အဓိကထားတိုက်ခိုက်ခြိမ်းခြောက်လာခဲ့ သည်မှာ ငါးမရ- တွင်းဖျက် ဆိုသည့်စကားပုံအတိုင်းလုပ်ဆောင်ခြင်းသာဖြစ်သည်။ သို့သော်လည်း လူမဆန်သည့် အပြုအမူကြောင့် တိုက်ပွဲများ ဆက်လက်ရှုံးနိမ့်လာခဲ့မည်ဆိုပါက နိုင်ငံရေးအခြေအနေသည် မည် သို့မည်ပုံဖြစ်လာဦးမည်ဆိုသည်ကို ဆက်လက်ရှု စားကြရဦးမည်ဖြစ်ပါကြောင်း ……။

မြတ်နိုင်- ရေးသည်။