သံတွဲမြို့နယ်၊ငပလီမြို့ အတွင်းက စစ်ကောင်စီ အခြေစစ်ရေတပ်စခန်းတစ်ခုဖြစ်တဲ့ ကွင်းဝိုင်းရေတပ်စခန်းကို အာရက္ခတပ်တော် အေအေ က ပြီးခဲ့တဲ့ ရက်ပိုင်းကတည်းကပင် ဝင်ရောက်တိုက်ခိုက်နေတာကြောင့် နှစ်ဖက် တိုက်ပွဲတွေ အပြင်းအထန် ဖြစ်ပွါးနေတယ်လို့ သံတွဲမြို့ စစ်ရေး အခြေအနေကို လေ့လာစောင့်ကြည့်နေသူတွေ ကပြောပါတယ်။
အာရက္ခတပ်တော် အေအေဟာ အဲဒီကွင်းဝိုင်းရေတပ်စခန်းကို ပြီးခဲ့တဲ့ ဇူလိုင်လ ၁၉ ရက်နေ့ကတည်းကပင် စတင်ထိုးစစ်ဆင်တိုက်ခိုက်နေတာဖြစ်ပြီး ဒီနေ့မှာလည်း စစ်ကောင်စီက ကြည်း၊ရေ၊လေ ပူးပေါင်းကာ အပြင်း အထန် ခုခံ တိုက်ခိုက်တာတွေ ရှိနေတယ်လို့ အဲဒီသံတွဲမြို့ စစ်ရေး အခြေအနေကို လေ့လာစောင့်ကြည့်နေသူ တစ်ဦးကပြောပါတယ်။
“တိုက်ပွဲကတော့ အပြင်းအထန်ဖြစ်နေတယ်။စစ်ကောင်စီကလည်း ကြည်း၊ရေ၊လေ နဲ့ အပြင်းအထန်ခုခံနေ တယ်။လေကြောင်းတိုက်ခိုက်တာကိုတော့ စစ်ကောင်စီက အပြင်းအထန်လုပ်နေတယ်လို့”သူကပြောပါတယ်။အဲဒီကွင်းဝိုင်းရေတပ်စခန်းဟာ သံတွဲမြို့နယ် အတွင်းက စစ်ကောင်စီလက်ကျန်တပ်ရင်းတစ်ခု ဖြစ်ပြီးစစ်ကောင် စီဘက်ကလည်း အဲဒီတပ်စခန်းမကျရှုံးစေရေး အတွက် စစ်အင်အားတွေကို အဆက်မပြတ်ဖြည့်တင်းပေးနေတာ တွေ ရှိနေတယ်လို့ သံတွဲမြို့ စစ်ရေး အခြေအနေကို စောင့်ကြည့်နေသူတွေကပြောပါတယ်။
ဒါ့အပြင် နှစ်ဖက်တိုက်ပွဲ အပြင်းအထန်ဖြစ်ပွါးမှုတွေကြောင့် အာရက္ခတပ်တော်ဘက်က စစ်သည် တော် တွေ အနေ နဲ့ အထိအခိုက် အကျအရှုံးများနေသလို စစ်ကောင်စီတပ်တွေဘက်ကလည်း ထိခိုက် သေဆုံး မှုများ စွာရှိတယ်လို့အဲဒီ စစ်ရေး အခြေအနေကို သိသူကပြောပါတယ်။
“တိုက်ပွဲက တော်တော် ပြင်ထန်နေတော့ အေအေဘက်ကလည်းထိခိုက် ကျရှုံးမှုတွေ ရှိတယ်။စစ်ကောင်စီဘက် ကလည်း ထိခိုက်မှုတွေတော်တော် ရှိတယ်လို့သိရတယ်။စစ်ကောင်စီကတော့ လေကြောင်းနဲ့ လက်နက်ကြီး ပစ်ကူကို အဓိကထား တိုက်ခိုက်နေတယ်။နောက်ပြီးတော့ စစ်ကောင်စီက ဂွဘက်ကလာပြီးတော့ အင်အားတွေကို ကုန်းကြောင်း ရေကြောင်းက ဆက်တိုက်ဖြည့်တင်းတာတွေ ရှိနေတယ်လို့”သူကပြောပါတယ်။သံတွဲမြို့နယ် အတွင်းမှာ စစ်ကောင်စီတပ်တွေ နဲ့ အာရက္ခတပ်တော် အေအေ တို့ ရဲ့ နှစ်ဖက်တိုက်ပွဲ ဖြစ်ပွါးမှု ၃ လကျော် ကာလအတွင်းမှာ အာရက္ခတပ်တော် အေအေ က ငပလီမြို့ မဇင်လေဆိပ်အပါအဝင် စစ်ကောင်စီတပ်စခန်းတွေဖြစ်တဲ့ ခလရ – ၅၅ တပ်ရင်း နဲ့ ခမရ – ၅၆၆ တပ်ရင်းတွေကိုပါ အပြီးသတ်သိမ်းပိုက် ရရှိနိုင်ပြီး ဖြစ်သလို သံတွဲမြို့ကိုပါ ထိန်းချုပ်ထားနိုင်ခဲ့ပြီလည်း ဖြစ်ပါတယ်။
