ပြီးခဲ့တဲ့ ဇူလိုင်လ ၂၃ ရက်နေ့ညက စစ်တွေမြို့နယ် ပါတလိတ်မှာ တပ်စွဲထားတဲ့ စစ်ကောင်စီတပ်ရင်းက ပုဏ္ဏားကျွန်းမြို့ နယ် အတွင်းကို လက်နက်ကြီး နဲ့ ပစ်ခတ်ခဲ့လို့ လက်နက်ကြီး ကျရောက်ပေါက်ကွဲကာ မိသားစုဝင် ၅ ဦးထဲက တစ်ဦးမှာ သေဆုံးခဲ့ရပြီး ကျန် ၄ ဦးမှာ အပြင်းအထန် ဒဏ်ရာ ရရှိ သွားခဲ့ရတယ်လို့ ဒေသခံတွေက ဆိုပါတယ်။
အဲဒီစစ်တွေမြို့ ပါတလိတ်မှာ ရှိတဲ့ စစ်ကောင်စီတပ်ရင်းက ဇူလိုင်လ ၂၃ ရက်နေ့ ညမှာ အတွဲလိုက်ဒုံး နဲ့ ၁၄ လုံးထက်မ နည်းပစ်ခတ်တာကို လုပ်ဆောင်ခဲ့ပြီး အဲဒီထဲက လက်နက်ကြီး ကျည်တစ်လုံးဟာ ပုဏ္ဏားကျွန်းမြို့နယ် အတွင်းက ကျွဲထိုး ရွာထဲက နေအိမ်တစ်အိမ်ထဲကို ကျရောက်ပေါက်ကွဲကာ မိသားစုဝင် ၅ ဦးထဲက တစ်ဦးဟာ သေဆုံးခဲ့ရပြီး ၄ ဦးဟာ အပြင်း အထန် ဒဏ်ရာ ရရှိခဲ့ရတာ ဖြစ်တယ်လို့ ပုဏ္ဏားကျွန်းဒေသခံ တစ်ဦးကပြောပါတယ်။
“သူတို့ထမင်းစားနေချိန်မှာ အဲဒီက ပစ်ခတ်လိုက်တဲ့ လက်နက်ကြီး ကျည်က သူတို့ အိမ်ကို ကျရောက်ပေါက်ကွဲခဲ့တာ။အဲဒီ မှာ တစ်ဦးသေပြီး ကျန်တဲ့ ၄ ဦးက ဒဏ်ရာ အပြင်းအထန် ရသွားခဲ့တယ်။ဒဏ်ရာ ရတဲ့ သူတွေကိုတော့ အခုဆေးကုသပေး နေတယ်။ဒဏ်ရာတွေကတော့ ပြင်းထန်တယ်လို့” သူကပြောပါတယ်။သေဆုံးသွားသူမှာ အသက် (၇၃) နှစ်အရွယ် ဒေါ်မကျော့ဆိုသူ ဖြစ်ပြီး နောက်ထပ် ဒဏ်ရာ ရရှိသွားတဲ့ သူ ၄ ဦးမှာ အသက် (၁၇) နှစ်အရွယ် မောင်နေမျိုးလင်း၊အသက် (၂၃) နှစ်အရွယ် မောင်နေမျိုးဦး၊အသက် (၃၅) နှစ်အရွယ်ဒေါ်စိန်ကျော့နု နဲ့ အသက် (၄၅ ) နှစ်အရွယ် ဒေါ်အေးခိုင်ညွန့်တို့ ဖြစ်ကြပြီး အဲဒီထဲက မောင်နေမျိုးလင်း မှာ ဒဏ်ရာ ရရှိမှု ပြင်းထန်တာ ကြောင့် စိုးရိမ်ရတဲ့ အနေအထားမှာရှိတယ်လို့လည်း ဒေသခံတွေက ဆိုပါတယ်။
ပုဏ္ဏားကျွန်းမြို့နယ်ဟာ အာရက္ခတပ်တော် အေအေ ကအပြီးသတ်သိမ်းပိုက်ထားမြို့ မြို့နယ် တစ်ခုဖြစ်ပေမယ့် စစ်ကောင်စီ တပ်တွေ ဟာ မကြာခဏဆိုသလို လက်နက်ကြီးတွေ နဲ့ပစ်ခတ်တာ လေကြောင်းတိုက်ခိုက်တာတွေကို ရည်ရွယ်ချက် ရှိရှိ နဲ့ မကြာခဏ ဆိုသလို လုပ်ဆောင်ခံနေရ သေးတဲ့ မြို့နယ် တစ်ခုလည်း ဖြစ်ပါတယ်။
ပြီးခဲ့တဲ့ ဇူလိုင်လ ၄ ရက်နေ့ကလည်း စစ်ကောင်စီက ပုဏ္ဏားကျွန်း မြို့နယ် အတွင်းက ခမောင်းတောကျေးရွာကို ဒရုန်းနဲ့ လာရောက်တိုက်ခိုက်ခဲ့တာကြောင့် ဘုန်းတော်ကြီးကျောင်းနဲ့ နေအိမ်အများအပြားမီးလောင်ပျက်စီးခဲ့ရပါတယ်။
အခုလို အာရက္ခတပ်တော် အေအေက သိမ်းပိုက်ထားတဲ့ မြို့တွေက ပြည်သူတွေကို စစ်ကောင်စီ အနေနဲ့ နည်းလမ်းမျိုး စုံနဲ့ တိုက်ခိုက်နေတာဟာ အလွန် ရွံ့ရှာ စက်ဆုပ်ဖွယ်ကောင်းတဲ့ လုပ်ရပ် တစ်ခု ဖြစ်သလို ဒီလို လုပ်ရပ်အပေါ်မှာလည်း ပြင်းပြင်းထန်ထန်ကန့်ကွက် ရှုံ့ချတယ်လို့ ပုဏ္ဏားကျွန်းလူငယ်များအစည်းအရုံးက ထုတ်ပြန်ပြောဆိုထားပါတယ်။
