သံတွဲမြို့နယ် နဲ့ ဂွမြို့နယ် အတွင်းမှာ စစ်ကောင်စီက တစ်ပတ်အတွင်းမှာ တံတား ၃ စင်းထိမိုင်းခွဲဖျက်ဆီးတာတွေ ကိုလုပ် ဆောင်ခဲ့တယ် လို့ သံတွဲ နဲ့ ဂွဒေသခံတွေ ကဆိုပါတယ်။
ပြီးခဲ့တဲ့ ဇူလိုင်လ ၁၉ ရက်နေ့ကလည်း သံတွဲမြို့ နဲ့ ဂွ ကားလမ်းမကြီးထက် သံတွဲမြို့ နဲ့ ဆယ်မိုင်အကွာ စစ်ကောင်စီရေ တပ်စခန်းကို သွားရာလမ်း ဇလွန် – ကွင်းဝိုင်း အနီးက သရက်ပင်ကွင်း တံတားနဲ့ ဆင်ဒင်လေး တံတား နှစ်စင်းတို့ကို စစ်ကောင်စီတပ်တွေက မိုင်းခွဲဖျက်စီးတာတွေကို လုပ်ဆောင်ခဲ့တယ်လို့ သံတွဲ မြို့ စစ်ရေး အခြေအနေကို လေ့လာစောင့် ကြည့်နေသူ တစ်ဦးကပြောပါတယ်။
“ပြီးခဲ့တဲ့ ဇူလိုင်လ ၁၉ ရက်တွေကလည်း သံတွဲမြို့တွင်းမှာ စစ်ကောင်စီတပ်တွေက ဆင်ဒင်လေး တံတား နဲ့ သရက်ပင်ကွင်း တံတားနှစ်စင်း မိုင်းခွဲဖျက်ဆီးခဲ့တာတွေ ရှိခဲ့တယ်။ အဲဒီတံတားတွေကတော့ သံတွဲမြို့ နဲ့ ဂွ ကားလမ်း မကြီးထက် သံတွဲမြို့ နဲ့ ဆယ်မိုင်အကွာ ဇလွန်ရွာမှာ လမ်းခွဲရှိတယ် အဲဒီ ဇလွန် – ကွင်းဝိုင်း ရေတပ်စခန်းရှိတဲ့ လမ်းမထက်မှာရှိတဲ့ တံတားတွေ ဖြစ်တယ်။အဓိကတော့ အဲဒီတံတားတွေက စစ်ကောင်စီရေတပ်ကို သွားလို့ ရတဲ့ တံတား တွေ ဖြစ်တဲ့ အတွက် ဇလွန်က စစ်ကောင်စီတပ်တွေ တပ်ဆုတ်လာချိန်မှာ သူတို့က အေအေ မဝင်လာနိုင်အောင် လို့ လုပ်ထား ခဲ့တာ ဖြစ်တယ်လို့”သူကပြောပါတယ်။
အဲဒါတွေ အပြင် မနေ့ ဇူလိုင်လ ၂၄ ရက်နေ့ ညနေမှာလည်း စစ်ကောင်စီတပ်ဖွဲ့တွေဟာ သံတွဲ့ နဲ့ ကျိန္တလီကို သွားလာ ရေးမှာ အဓိက အရေးပါတဲ့ တံတားတစင်းဖြစ်တဲ့ ချင်းကွင်းတံတားကို မိုင်းခွဲ ဖျက်ဆီးတာတွေ ကို လုပ်ဆောင်ခဲ့ပါတယ်။
အဲဒီတံတားကို မိုင်းခွဲဖျက်ဆီးလိုက်တာကြောင့် သံတွဲ ၊ကျိန္တလီ နဲ့ ဂွ မြို့နယ် တွေ ထဲက စစ်ဘေးရှောင်တွေအတွက် သွားလာရေး အခက်အခဲ ဖြစ်သွားသလို ကျန်းမာရေး ဆိုင်ရာ ကိစ္စတွေ နဲ့ သံတွဲ မြို့တွင်းက စစ်ဘေးရှောင်တွေ အတွက် စားနပ်ရိက္ခာသယ်ယူရေးတွေ မှာလည်း အခက်ကြုံတွေ သွားရတာ ဖြစ်တယ်လို့ စစ်ဘေးရှောင်အရေး ကူညီပေးနေသူ တစ်ဦးကပြောပါတယ်။
“အရင်ကတည်းကပင်လည်း သူတို့ စစ်ဆေးရေး ဂိတ်တွေမှာ ဆန်တွေ စားသောက်ဖွယ်ရာတွေသယ်ရင် ဖမ်းဆီးထိန်းသိမ်း ထားလိုက်တာတွေ အများကြီ။ဒါပေမယ့် အငတ်မခံနိုင်တော့ အဆင်ပြေသလို သွားပြီးတော့ သယ်ယူပြီး စစ်ရှောင်တွေကို ပြန်လှူဒါန်းနိုင်ကြတယ်။အခုက တံတားကကျိုးသွားတော့ စစ်ရှောင်တွေ အတွက် ဘာမှ လုပ်လို့ မရတော့။နောက်ပြီးတော့ ကျန်းမာရေး ကိစ္စတွေ နဲ့လည်းဘယ်လိုမှ သွားလို့ မရတော့ဘူး ပြည်သူတွေ အတွက် တော်တော် ခက်ခဲသွားရမှာဖြစ်တယ်”လို့ သူကပြောပါတယ်။
လက်ရှိမှာလည်း စစ်ကောင်စီတပ်တွေဟာ အဲဒီတံတား အနီးမှာ တပ်စခန်း အခိုင်အမာတည်ဆောက်နေတာတွေ ရှိတဲ့ အတွက် ဒေသခံတွေ အနေ နဲ့ တံတားရဲ့ ပျက်စီးမှု အခြေအနေတွေကို သွားရောက်ကြည့်ရှုနိုင်တာ မရှိသေးဘူးလို့ ဆိုပါ တယ်။
စစ်ကောင်စီတပ်တွေဟာ ရခိုင်တကျော့ပြန်တိုက်ပွဲစတင်ချိန်ကတည်းကပင် တောင်ကုတ်၊စစ်တွေ၊ဘူးသီးတောင် နဲ့ မောင်တောမြို့နယ်တွေ အပါအဝင် တစ်ခြားမြို့နယ်တွေထဲက အရပ်သားပြည်သူ အသုံးပြု သွားလာနေကြတဲ့ တံတား ၁၁ စင်းထက် မနည်းက မိုင်းခွဲ ဖျက်ဆီး ခဲ့ပြီး ဖြစ်ပါတယ်။
