သံတွဲမြို့ နဲ့ တစ်မိုင်ခန့်အကွာမှာရှိတဲ့ ကျားအို တံတားကျိုးကျလို့ စစ်ရှောင်ကားတစ်စီး ရေထဲမျောပါသွား

(လူအသေအပျောက်ရှိမရှိ မသိရသေး)

ဒီနေ့မနက်ပိုင်းက သံတွဲမြို့ကနေ စစ်ဘေးရှောင်ဖို့ ထွက်ခွါလာတဲ့ ကားတစ်စီးဟာ သံတွဲမြို့ နဲ့ တစ်မိုင်ခန့်အကွာမှာ ရှိတဲ့ ကျားအိုတံတား အဖြတ်မှာတံတားကျိုးကျပြီး စစ်ရှောင် တွေလိုက်ပါလာတဲ့ ကားရေထဲမျောပါသွားခဲ့ရတယ်လို့

ဒေသခံတွေရဲ့ သတင်းအရင်းအမြစ်တွေ ကပြောပါတယ်။

အဲဒီဖြစ်စဥ်ဟာ ဒီနေ့မနက် ၁၀ နာရီလောက်မှာ ဖြစ်ပွားခဲ့တာ ဖြစ်ပြီး ခရီး သည် ၁၀ ဦးခန့် ပါလာတဲ့ ကားတစ်စီးဟာ အဲဒီတံတားအဖြတ်မှာ တံတား ကျိုးကျပြီး ကားနဲ့ အတူ ရေထဲမျောပါသွားခဲ့ရတာ ဖြစ်တယ်လို့ သံတွဲ ဒေသခံတစ်ဦးက အတည်ပြုပြောပါတယ်။

“ဒီနေ့မှာတဲ့ စစ်ရှောင်ကားတွေ ဖြတ်ချိန်မှာ တံတားပြိုကျပြီး ကားတစ်စီးပါသွားတယ်လို့တော့ ကနဦး သိရတယ် ။ကားမှာလည်း လူ ၁၀ ဦးလောက်ပါတယ်လို့ ပြောတယ်။လူအသေအပျောက် ရှိ/မရှိကိုတော့ မသိရသေးဘူးလို့” သူကပြောပါတယ်။

အဲဒီကျားအိုတံတား ဟာ သံတွဲမြို့အတွက် တစ်မိုင်ခန့်အကွာ မြုံပြင် ကျေး ရွာ နဲ့ ကျားအို ကျေးရွာ အကြားမှာ တည်ရှိတဲ့ တံတားတစ်စင်းဖြစ်ပြီး အဲဒီတံတားဟာ ဆောက်လက်စ တံတားတစ်စင်းဖြစ်တယ်လို့လည်း ဆိုပါတယ်။

ပြီးခဲ့တဲ့ ဇူလိုင်လ ၂၅ ရက်နေ့မှာ သံတွဲမြိုနယ် အတွင်းရေကြီးမှုတွေ ဖြစ်ပွား ခဲ့ပြီး တံတားအောက်ခြေအား ရေတိုက်စားတာကို ခံထားရတာကြောင့် ကားများ ဖြတ်သွားဖြတ်လာ ပြုလုပ်ချိန်မှာ အခုလို ပြိုကျသွားခဲ့ရတာ ဖြစ်တယ်လို့ ဒေသခံ တစ်ဦးကပြောပါတယ်။

"တံတားကတော့ဆောက်လက်စတံတား။မပြီးသေးဘူး ပြီးခဲ့တဲ့ ရက်က ရေကြီးပြီးတော့ ရေတိုက်စားထားတာကြောင့် တံတားအောက်ခြေက မခုိင်တဲ့ အနေအထားမှာ ရှိနေလို့ အခုလို ကားဖြတ်သွားချိန်မှာ ပြိုပျက်သွားခဲ့ရတာ ဖြစ်တယ်လို့ အဲဒီဒေသခံတွေကပြောပါတယ်။

ဒီနေ့ သံတွဲမြို့နယ် အတွင်းက စစ်ဘေးရှောင်ဖို့ ကားတွေ နဲ့ ထွက်ခွါလာတဲ့ အထဲမှာ မိသားစုဝင်တွေပါဝင်လာသူ တစ်ဦးကလည်း “တံတားပြိုကျပြီး ကားပါသွားတယ်လို့ သိရတယ်။ဘယ်သူတွေ ပါသွားတာလဲ ။ဘယ်နှစ်ယောက်ပါသွားတာလဲ ကျနော်လည်း အတိအကျမသိရသေးဘူး။ကျနော့် မိသားစုတွေကိုလည်း ဖုန်းဆက်လို့ မရဘူး ကျနော်အရမ်းစိုးရိမ်နေရတယ်လို့” သူကပြောပါတယ်။

လက်ရှိ တံတားပြိုကျပြီး ကားတစ်စီးပါသွားတယ် ဆိုတဲ့ အခြေအနေအသေးစိတ် CNAသတင်းဌာနအနေနဲ့လည်း အတည်ပြုနိုင်ဖို့ ဆက်လက်ကြိုးစားနေဆဲ ဖြစ်ပါတယ်။

အလားတူပဲ ဒီနေ့မနက်မှာ ပြီးခဲ့တဲ့ ဇူလိုင်လ ၂၅ ရက်နေ့ ညနေက စစ်ကောင် စီက မိုင်းခွဲဖျက်ဆီးခဲ့တာရှိခဲ့ပြီးနောက် မပျက်စီးပဲ ကျန်ရှိနေခဲ့တဲ့ ချင်းကွင်းတံတားဟာလည်း ပြိုပျက်သွားခဲ့ရပြီး ဖြစ်တယ်လို့ သံတွဲဒေသခံတွေကပြောပါတယ်။

သံတွဲမြို့နယ် နဲ့ ငပလီမှာ စစစ်ကောင်စီတပ်တွေ နဲ့ အာရက္ခတပ်တော် အေအေတို့ဟာ နှစ်ဖက်တိုက်ပွဲတွေ ဆက်လက်ဖြစ်ပွားနေတာကြောင့် ဒေသခံပြည်သူတွေဟာ စစ်ပွဲ နဲ့ ဘေးလွတ်ရာ နေရာတွေကို ထွက်ပြေးနေကြရသလို သဘာဝဘေးအန္တရာယ် ဖြစ်တဲ့ ရေဘေးဒဏ်ကြောင့်လည်း ဘေးလွတ်ရာ နေရာတွေကို ရွေ့ပြောင်း ထွက်ပြေးနေကြရတာလည်း ဖြစ်ပါတယ်။