စစ်ကောင်စီရဲ့လက်ကျန်စခန်းတစ်ခုသာကျန်တော့တဲ့ မောင်တောမှာ တိုက်ပွဲအပြင်းအထန်ဖြစ်ပွားနေပြီး စစ်ကောင်စီတပ်က လက်နက်ကြီး၊ ဒရုန်း ပစ်ခတ်မှုတွေ ရက်ဆက်လုပ်နေတာကြောင့် အရပ်သားထိခိုက်သေဆုံးမှုဟာလည်း တိုးလာတယ်လို့ ဒေသခံတွေက ပြောပါတယ်။
နယ်စပ်တစ်လျှောက်နဲ့ မောင်တောမြို့ နယ်တစ်ခုလုံးနီးပါးကို သိမ်းပိုက်ထားတဲ့ အာရက္ခတပ်တော် AA ဟာ လက်ကျန်စခန်းဖြစ်တဲ့ မောင်တောမြို့ရှိ အ မှတ်(၅)နယ်ခြားစောင့်တပ်ဖွဲ့ခွဲ(နခခ ၅ မြို့သူကြီး)ကို ထိုးစစ်ဆင်နေတာပါ။
"တိုက်ပွဲက နေ့တိုင်းဖြစ်တာပါပဲ၊ တပ်တော်(AA)က အဝေးပစ်တွေနဲ့ တိုက်နေတာ၊ ဒီနေ့တော့ နည်းနည်း ပိုပြင်းတယ်၊ နခခ ၅ ထဲတောင် တိုက်ပွဲရောက်နေပြီကြားတယ်"လို့ ဒေသခံသတင်းရင်းမြစ်တစ်ဦးက ပြောပါတယ်။အဲဒီလိုတိုက်ခိုက်ခံနေရချိန် စစ်ကောင် စီတပ်ကလည်း မြို့ပေါ်ရပ်ကွက်တွေနဲ့ မြို့နီးဝန်းကျင် အရပ်သားလူနေရွာတွေဆီ လက်နက်ကြီး၊ ဒရုန်းတွေနဲ့ ဆက် တိုက်ပစ်ခတ်နေတယ်လို့ ဒေသခံတွေက ပြောကြပါတယ်။
"ဒရုန်းတွေ၊ လက်နက် ကြီးတွေနဲ့ ရွာတွေကို နေ့တိုင်းပစ်တယ်၊ ဒဏ်ရာရတာ၊ သေတာ ဆက်တိုက်ရှိတယ်၊ လူတွေ နေလို့မရတော့ဘူး၊ ထွက်ပြေးဖို့ လည်း မလွယ်ကြဘူး"လို့ ဘင်္ဂလားဒေရှ့်နိုင်ငံမှာနေထိုင်တဲ့ မောင်တောဒေသခံ မူဆလင်တစ်ဦးက ပြောပါတယ်။ပြီးခဲ့တဲ့ ဇူလိုင်လ ၂၈ ရက်နေ့ကလည်း စစ်ကောင်စီတပ်က ပစ်ခတ်တဲ့ လက်နက်ကြီးကျည်အချို့ မောင်တောမြို့နဲ့ လေးမိုင် ဝန်းကျင်အကွာမှာ ရှိတဲ့အထက်ကံသာယာရွာသို့ ကျရောက် ပေါက်ကွဲခဲ့ပြီး ၁၂ နှစ်အရွယ်မိန်းကလေးတဦး၊ အမျိုးသမီးနှစ်ဦးအပါအဝင် ငါးဦးဒဏ်ရာရခဲ့ပါတယ်။
ဒါ့အပြင် မောင်တောမြို့နယ်အတွင်း စစ်ကောင်စီတပ်ရဲ့ လက်နက်ကြီး၊ ဒရုန်း၊ လေကြောင်းပစ်ခတ်၊ ဗုံးကြဲမှုတို့ကြောင့် နိုင်ငံတကာကူညီရေးအဖွဲ့ရုံးခန်းတွေနဲ့ အရပ်သားနေအိမ်အများအပြားဟာလည်း ပျက်စီးကြရတယ်လို့ ဒေသခံတွေက ဆိုပါတယ်။
အဲဒီလိုစစ်ကောင်စီတပ်က လေကြောင်း၊ လက်နက်ကြီးပစ်ခတ်မှုတွေ ဆက်တိုက်လုပ်နေတာကြောင့် မောင်တောမြို့ပေါ်နဲ့ အနီးဝန်းကျင်ရွာတွေမှ ဒေသခံတွေဟာ ဘေးလွှတ်ရာနေရာတွေကို တိမ်းရှောင်နေကြရပြီး တချို့ကတော့ တိုက်ပွဲကြားထဲ ပိတ်မိနေကြဆဲဖြစ်တယ်လို့ ဒေသခံတွေက ပြောကြပါတယ်။
"မြို့ထဲမှာ လူသုံးပုံတစ်ပုံလောက်ကျန်အုံးမယ်၊ မြို့ထဲက အမျိုးတွေနဲ့ အ ဆက်အသွယ် မရတာကြာပြီ"လို့ မောင်တောမြို့ခံတစ်ဦးက ပြောပါတယ်။မောင်တောမြို့ထဲ ပိတ်မိနေတဲ့ အရပ် သားပြည်သူတွေကို အာရက္ခတပ်တော် AA က ကယ်ထုတ်ပေးနေပေမယ့် စစ်ကောင်စီတပ်ရဲ့ လေကြောင်းနဲ့ ကြားဖြတ်တိုက်ခိုက်မှုကြောင့် အားလုံးကို ကယ်ထုတ်ပေးနိုင်ခြင်းမရှိသေးဘူးလို့ ဒေသတွင်းသတင်းရင်းမြစ်တွေက ပြောကြပါတယ်။
AA ဟာ မောင်တောမြို့နယ်တစ်ခုလုံးကို အပြီးသတ်သိမ်းပိုက်နိုင်ဖို့ မြို့နီးဝန်းကျင်ရှိ လက်ကျန်စခန်းတွေကို စတင်ထိုးစစ်ဆင်တိုက်ခိုက်နေခဲ့တာ နှစ်လဝန်းကျင်ရှိပြီဖြစ်ပါတယ်။
ရခိုင်ပြည်နယ် ဘူးသီးတောင်၊ ရသေ့တောင်၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ပေါက်တော၊ မြေပုံ၊ ရမ်းဗြဲနဲ့ ချင်းပြည်နယ် ပလက်ဝမြို့နယ်တို့ကို အလုံးစုံသိမ်းပိုက်ထိန်းချုပ်ထားတဲ့ AA ဟာ မောင်တောနဲ့ သံတွဲမြို့နယ်တို့ကို တပြိုင်တည်း ထိုးစစ်ဆင်နေပြီး အပြီးသတ်သိမ်းပိုက်နိုင်ဖို့ လက်တစ်ကမ်းသာလိုတော့တယ်လို့ ဒေသတွင်းစစ်ရေးလေ့လာသူတွေက ပြောကြပါတယ်။
