၁၀၂၇ စစ်ဆင်ရေးကို အားပေးထောက်ခံခဲ့ကြတဲ့ အဖိနှိပ်ခံ မြန်မာပြည်သူ တစ်ရပ်လုံးကို ညီနောင်မဟာမိတ်တပ်တွေ ဖြစ်ကြတဲ့ AA၊MNDAA၊TNLA အဖွဲ့တွေက အလေး အနက် ကျေးဇူးတင်တယ်လို့ သတင်းထုတ်ပြန်ပြောဆိုလာခဲ့ပါတယ်။
ဒါတွေ အပြင် စစ်အာဏာရှင်ပြုတ်ကျရေးအတွက် ဒီနေ့အထိ အကြမ်းမဖက်တဲ့ နည်းလမ်းတွေ နဲ့ ငြိမ်းချမ်းစွာ ဆန္ဒထုတ်ဖော်ပြီး တော်လှန်ရေးကို စဉ်ဆက်မပြတ် ဝိုင်းရံပေးနေကြတဲ့ ရဲရင့်တဲ့ မြန်မာပြည်သူ တစ်ရပ်လုံးရဲ့ တော်လှန်စိတ်ဓာတ်ကိုလည်း ညီနောင်မဟာမိတ် (၃) ဖွဲ့ အနေ နဲ့ အလေးနက်ထား ချီးကျူးဂုဏ်ပြုတယ်လို့ လည်း ညီနောင် ၃ ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။
ဆက်လက်ပြီးတော့လည်း ကြံ့ကြံ့ခံတဲ့စိတ်ဓာတ်၊ နောက်မဆုတ်တဲ့ စိတ်ဓာတ်တွေ နဲ့ စစ်အာဏာရှင်စနစ် အမြစ်ပြုတ်တဲ့ အထိ ဟန်ချက်ညီညီ ဆက်လက်တိုက်ပွဲဝင်ကြဖို့ကိုလည်း ညီနောင် ၃ ဖွဲ့က တိုက်တွန်းထားပါတယ်။
မိမိတို့ ညီနောင်မဟာမိတ် (၃) ဖွဲ့ဟာ ၁၀၂၇ စစ်ဆင်ရေးကို ၂၀၂၃ ခုနှစ် အောက်တိုဘာလ ၂၇ ရက်နေ့မှာ စတင်ခဲ့တာဖြစ်ပြီး အဲဒီစစ်ဆင်ရေးရဲ့ ရည်ရွယ်ချက်ဟာ ပြည်သူလူထုရဲ့ အသက်၊ အိုးအိမ်၊ စည်းစိမ်များကို ကာကွယ်နိုင်ရေး၊ မိမိကိုယ်မိမိ ခုခံကာကွယ်နိုင်ရေး၊ မိမိတို့ ဒေသကို မိမိတို့ အနေ နဲ့ ဒီထက် ပိုမိုထိန်းချုပ်နိုင်ရေး၊ မိမိတို့အဖွဲ့အစည်းများ အပေါ် စစ်ကောင်စီက လေကြောင်း၊ လက်နက်ကြီးတွေ နဲ့ နေ့၊ ည အချိန်မရွေး ပစ်ခတ်တိုက်ခိုက်နေတာတွေကို ဟန့်တားနိုင်ရေး၊ မြန်မာပြည်သူတစ်ရပ်လုံးရဲ့ လိုလားချက်ဖြစ်တဲ့ စစ်အာဏာရှင်စနစ် အမြစ်ပြတ်ရေး၊ လက်ရှိ တရုတ်-မြန်မာ နယ်စပ်အပါအဝင် မြန်မာနိုင်ငံအတွင်းမှာ ကျယ်ပြန့်လာနေတဲ့ အွန်လိုင်းလောင်းကစား လိမ်လည်မှု ပပျောက်ရေး၊ Online Game (ကျဖျင်) ကုမ္ပဏီတွေ နဲ့ ဒီလုပ်ငန်းကို လုပ်ကိုင် နေကြတဲ့ စစ်ကောင်စီ နဲ့ ပြည်သူ့စစ်အဖွဲ့တွေကို နှိမ်နင်းနိုင်ရေး စသည့်ရည်ရွယ်ချက်တွေ နဲ့ စတင်ခဲ့တာလည်း ဖြစ်ပါတယ်။
