စစ်ကောင်စီ ရဲ့ နောက်ဆုံးလက်ကျန်ရေတပ်စခန်းတစ်ခုသာ ကျန်ရှိတော့တဲ့ သံတွဲမြို့နယ် ငပလီမြို့အတွင်းက ကွင်းဝိုင်းရေတပ်စခန်း မကျရှုံးရအောင် စစ်ကောင်စီ တပ်တွေက လေကြောင်း နဲ့ ရေကြောင်း တိုက်ခိုက်မှုတွေကို ဒီရက်ပိုင်းမှာ ဆက်တိုက်လုပ်ဆောင်နေတာတွေ ရှိနေတယ်လို့ သံတွဲမြို့ စစ်ရေးလေ့ လာစောင့်ကြည့်သူတွေကပြောပါတယ်။
လက်ရှိမှာ စစ်ကောင်စီရဲ့ လက်ကျန် စခန်းတစ်ခု ဖြစ်တဲ့ ကွင်းဝိုင်းရေတပ်စခန်းကို အပြီးသတ် သိမ်းပိုက်နိုင်ဖို့ အတွက် စစ်ကောင်စီတပ်တွေ နဲ့ အာရက္ခတပ်တော်အေအေတို့ဟာ နှစ်ဖက်တိုက်ပွဲတွေ အပြင်းအထန် ဖြစ်ပွါးနေတာ ရှိနေပြီး စစ်ကောင်စီကလည်း ရေကြောင်း လေကြောင်းကနေ အပြင်းအထန် ခုခံတို က်ခိုက်နေတာ ဖြစ်တယ်လို့ သံတွဲမြို့ စစ်ရေးလေ့လာစောင့်ကြည့်သူ တစ်ဦးကပြောပါတယ်။
“ကွင်းဝိုင်းရေတပ်စခန်းအထိတော့ ဝင်မတိုက်ရသေးဘူး အဲဒီအနားမှာ ရှိတဲ့ စစ်ကောင်စီတပ်တွေ နဲ့ တိုက်ပွဲ ဆက်တိုက်ဖြစ်နေတာတော့ ရှိတယ် အဲဒီနေရာကို စစ်ကောင်စီနေဗီကလည်း ဆက်တိုက် လက်နက်ကြီး ပစ်ကူပေးတာတွေ ရှိနေတယ်။လေကြောင်းတိုက်ခိုက်မှုလည်း ရက်ဆက်လုပ်နေတယ်လို့ ” သူကပြောပါတယ်။စစ်ကောင်စီတပ် နဲ့ အာရက္ခတပ်တော် အေအေ တို့ဟာ လက်ရှိမှာ သဗြုချိုင်၊ဂျိတ္တော နဲ့ ရေဖြူအိုင် အနီးဝန်းကျင်မှာ ဆက်လက်တိုက်ပွဲ ဖြစ်ပွါးနေတာ ဖြစ်ပြီး စစ်ကောင်စီ ရေတပ်သင်္ဘောက လက်နက်ကြီးတွေ နဲ့ ပစ်ခတ်တိုက်ခိုက်ခဲ့တာကြောင့် မနေ့က သဗြုချိုင်ကျေးရွာ အတွင်းကို လက်နက်ကြီးကျဉ် ကျရောက် ပေါက်ကွဲခဲ့တာကြောင့် နေအိမ်အဆောက်အဦး ပျက်စီးတာတွေ လည်း ရှိခဲ့တယ်လို့ အဲဒီစစ်ရေး အခြေအနေကို စောင့်ကြည့်လေ့လာနေသူတွေ ကပြောပါတယ်။
ဒီနေ့မှာလည်း စစ်ကောင်စီဟာ ငပလီကမ်းခြေတစ်လျှောက်ကို လေကြောင်းက အဆက်မပြတ်ဗုံးကြဲတိုက်ခိုက်တာတွေ ရှိနေပြီး အဲဒီတိုက်ခိုက်မှုကြောင့် လူ နဲ့ အဆောက်အဦးအထိအခိုက် အပျက်စီးအခြေအနေတွေကိုတော့ မသိရှိရသေးဘူးလို့ သံတွဲဒေသခံတစ်ဦးကပြောပါတယ်။
“ဒီနေ့လည်း လေကြောင်းတိုက်ခိုက်တာ ဆက်တိုက်လုပ်တယ် တိုက်လေယာဉ်အသံတွေရော၊ဟတ်စကီးအသံတွေရော ဆက်တိုက်ကြားနေရတယ်။ဘယ်နေရာတွေကို ကျလဲဆိုတာတော့ ကျနော်တို့လည်း ထွက်မကြည့်ရဲဘူး သေချာတာကတော့ ငပလီကမ်းခြေတစ်လျှောက်ကို ဗုံးကြဲတာဖြစ်တယ်။ထိခိုက်မှု တွေ ကို မသိရဘူးလို့ ” သူကပြောပါတယ်။သံတွဲမြို့နယ် အတွင်းမှာ အာရက္ခတပ်တော် အေအေ နဲ့ စစ်ကောင်စီတပ်တွေ တိုက်ပွဲ ဖြစ်ပွါးနေတာဟာ ၃ လကျော်ကြာ ကြာမြင့်လာနေပြီး အာရက္ခတပ်တော် အေအေ က သံတွဲမြို့ နဲ့ သံတွဲ လေဆိပ်အပါအဝင် စစ်ကောင်စီတပ်ရင်းတွေ ဖြစ်ကြတဲ့ ခလရ – ၅၅ တပ်ရင်း နဲ့ ခမရ – ၅၆၆ တပ်ရင်းတွေကိုလည်း အပြီးသတ် ထိန်းချုပ်ထားနိုင်ပြီး ဖြစ်ပါတယ်။
