မတူပီမြို့သိမ်းတိုက်ပွဲက သိမ်းဆည်းရမိတဲ့ လက်နက် နဲ့ လူအင်အားစာရင်းကို သွားယူတဲ့ အေအေ တပ်ဖွဲ့ဝင် နှစ်ဦးကို ချင်း အမျိုးသားတပ်မတော်က ဖမ်းဆီထား

ချင်းအမျိုးသားတပ်မတော် (CNA) ဖမ်းဆီး ရမိထားတဲ့ အေအေ စစ်သုံးပန်းတွေရဲ့ ထွက်ဆိုချက် ဆိုတဲ့ ခေါင်းစဉ်ဟာ Chinland Information Center က မနေ့က သြဂုတ်လ ၁ ရက်နေ့မှာ အင်တာဗျူး တစ်ခုကို ထုတ်လွှင့်ခဲ့ပါတယ်။

Chinland Information Center အင်တာဗျူး ထုတ်ပြန်ချက် အရ အဲဒီ အေအေ တပ်သား နှစ်ဦးဟာမတူပီမြို့ သိမ်းတိုက်ပွဲ က သိမ်း ဆည်းရမိတဲ့ လက်နက် နဲ့ လူအင်အားစာရင်းကို သွားယူချိန်မှာ ဖလမ်းမြို့အကျော် ငလိုင်မှာ ချင်းအမျိုးသား တပ်မတော် (CNA ) တပ်တွေ နဲ့ တွေ့ကာ ဖမ်းဆီးခံခဲ့ရတယ်လို့ ဖမ်းဆီးခံထားရတဲ့ အေအေ တပ်ဖွဲ့ဝင် တစ်ဦးရဲ့ ထွက်ဆို ချက် အရသိရပါတယ်။

“ကျနော်တို့ကို စာရင်းသွားယူခိုင်းတာ။မတူပီးတိုက်ပွဲမှာ လက်နက်ခဲယမ်းတွေ သိမ်းဆည်းရမိတော့ ကျနော်တို့ကို စာရင်းသွား ယူခိုင်းတာ။ မတူပီမြို့ရောက်တော့ အဲမှာ ကိုယ့်ရုံးတစ်ရုံးရှိတယ်။ တပ်ရင်းမှူးဘယ်မှာလဲမေးတယ်။ မဟာ မိတ်တပ်ဖွဲ့ဝင်အချို့က တပ်ရင်း မှူး ဖလန်း မှာဆိုလို့ ဖလန်းမြို့ကို ဆက်သွားတယ်။ကျနော်တို့မှာ လက်နက် လည်းမပါ ဘူးလေ ဗျူဟာမှူးကလည်း လက်နက်ယုူ သွားလို့ မပြောဘူး ဖုန်းနဲ့ စာအုပ်ဘောပင် ယူသွားလို့ ပြောတော့ လက်နက် တွေလည်း မယူခဲ့ဘူး။ဖလန်းကိုရောတော့ အဲဒီဘောလုံးကွင်းနားမှာ ဘယ်သူမှ မရှိဘူး။ ဖလန်းရွာသာ ဆုံးသွားတယ်။ တပ်ရင်းမှူး ရှာမတွေ့ဘူး။ တစ်ခေါက်လာတာ မတွေ့ ရင်မကောင်းဘူး အဆူခံရမှာစိုးလို့ နည်းနည်းသွားတော့ ဖလန်းအကျော်က ငလိုင်ကိုရောက်တော့ CDF Stop ဆိုပြီးတော့ စာရေးထားတာတော့ တွေ့ခဲ့တယ် သတိမထားခဲ့ မိဘူး။ အဲဒါနဲ့ CNA အဖွဲ့ နဲ့ တွေ့ပြီး ဘယ်ကလည်း ဆိုတော့ ကျနော်တို့ ညာလို့ မရတာ နဲ့ ရခိုင် အေအေ ကဆိုပြီးပြောတော့ ဖမ်းခံရ တာ ဖြစ်တယ်။ကျနော်တို့လာရတဲ့ ရည်ရွယ်ချက်ကတော့ စာရင်းလာယူတာ ကျန်တာဘာမှ မရှိဘူးလို့” အဲဒီ CNA ဖမ်းဆီးတာကို ခံထားရတဲ့ တပ်သားတစ်ဦးက အင်တာဗျူးမှာ ဖြေဆိုထားပါတယ်။

အဲဒါတွေ အပြင် ချင်းပြည်နယ်ထဲကို အေအေ ဝင်ရောက်လာတာ နဲ့ ပတ်သက်ပြီး ဒေသခံတွေပြောဆိုချက်တွေကို အဲဒီ အင်တာဗျူးမှာ ထည့်သွင်း ဖော်ပြထားတာတွေကိုလည်းတွေ ရသလို ချင်းပြည်အတွင်းက အမျိုးသမီးတွေကို AA တပ်ဖွဲ့ဝင် တွေက စိတ်ကြွဆေးတွေ သုံးပြီး မုဒိမ်းကျင့်တာတွေလည်း ရှိနေတဲ့ ဆိုတဲ့ ကန်ပက်လက်ကောင်စီအဖွဲ့ ဦးထန်းဟုန်းရဲ့ စွပ်စွဲပြောဆိုချက်တွေကိုလည်း ဖော်ပြထားတာ တွေ့ ရပါတယ်။

ဒါ့အပြင် Chinland Information Center က CNA က ဖမ်းဆီးရမိထားတဲ့ AA တပ်သားတွေကို စစ်သုံ့ပန်းဆိုတဲ့ အသုံးအနူန်းတွေ နဲ့ သုံးနူန်းထားတာတွေကိုတွေ့ ရသလို ဖမ်းဆီးခံရသူ နှစ်ဦးကိုလည်း အကျဉ်းသားဝတ်စုံ နဲ့ လက်ထိပ်ခတ် ထားတာတွေကို လည်းရုပ်သံ ဖိုင်မှာ တွေ့ရပါတယ်။

လက်ရှိ ဖမ်းဆီးခံထားရတဲ့ အေအေ တပ်ဖွဲ့ဝင် နှစ်ဦး ကိစ္စ နဲ့ ပတ်သက်ပြီးတော့ အာရက္ခတပ်တော် အေအေ က တစ်စုံတရာ ထုတ်ပြန် ထားတာတွေ မတွေ့ရသလို သူတို့ နှစ်ဦးဟာ အေအေ တပ်ဖွဲ့ဝင်တွေ ဟုတ်မဟုတ်ဆိုတာကို CNA သတင်းဌာန အနေ နဲ့ အတည်မပြု နိုင်တာကြောင့် အာရက္ခတပ်တော် အေအေ ပြောခွင့်ရ ဦးခိုင်သုခကို ဆက်သွယ်မေးမြန်းနေဆဲ ဖြစ်ပါတယ်။

အာရက္ခတပ်တော် အေအေ ဟာချင်းပြည်အတွင်းကို ကျင်ဒွေးမြို့သိမ်းတိုက်ပွဲအတွင်းမှာ ချင်းညီနောင်အဖွဲ့တွေ ရဲ့ စစ်ကူတောင်း မှုကြောင့် ဝင်ရောက်လာတာ ဖြစ်ပြီး အဲဒီမှ တဆင့် မတူပီမြို့သိမ်းတိုက်ပွဲကို ရောက်ရှိလာခဲ့တာ ဖြစ်တယ်လို့ အေအေ ရဲ့ တပ်ဖွဲ့ဝင် တစ်ဦးက ချင်းပြည်အတွင်းကို အေအေဝင်ရောက်လာပုံ နဲ့ ရှင်းလင်းပြောဆိုထားပါတယ်။

“CDF တွေက စစ်ကူလာတောင်းတော့ ကျနော်တို့ကလည်း မသိတဝက် သိတစ်ဝက်တွေပေါ့။အဲဒီလို စစ်ကူလာတောင်းတော့ ဗျူဟာမှူး မောင်မောင်စိုး နဲ့ အတူ စစ်ကူဆိုပြီးတော့ လာခဲ့တာပါ။သဘောတူညီမှုကတော့ ကျင်ဒွေးတိုက်ပွဲမှာ ရတဲ့ လက်နက်ခဲယမ်းတွေကို ကျနော်တို့ ယူမယ်ဆိုပြီးတော့သဘောတူတာ ညီတာဖြစ်တယ်”လို့ CNA ရဲ့ဖမ်းဆီးခြင်းကို ခံထားရတဲ့ နောက်ထပ် အေအေ တပ်ဖွဲ့ဝင် တစ်ဦးက ထွက်ဆိုထားပါတယ်။

ဒါတွေ အပြင် ရှေ့တန်းစစ်မျက်နှာပြင်မှာ တိုက်ပွဲတိုက်ရချိန်တွေ မှာ တပ်သားတွေကို မူးယစ်ဆေးဝါး သုံးစွဲပြီး စစ်တိုက်ခိုင်းတာတွေလည်း ရှိတယ်လို့ အဲဒီ CNA ရဲ့ဖမ်းဆီးခြင်းကို ခံထားရတဲ့ အေအေ တပ်သားဆိုသူ တစ်ဦးက ထွက်ဆိုထားတာတွေကိုလည်းတွေ့ ရပါတယ်။

လက်ရှိ အဲဒီ တပ်သားပြောဆိုချက်၊ ကန်ပက်လက်ကောင်စီအဖွဲ့ ဦးထန်းဟုန်းရဲ့ စွပ်စွဲပြောဆိုချက်တွေနဲ့ ပတ်သက်ပြီး အေအေ ရဲ့ တုန့်ပြန်ဖြေကြားမှုကို အေအေ ပြောခွင့်ရ ဦးခိုင်သုခ ဆီကို ဆက်သွယ်မေးမြန်းနေဆဲ ဖြစ်ပါတယ်။