တောင်ကုတ်မြို့နယ် အတွင်းက ကျေးရွာတချို့ကို စစ်ကောင်စီက ဒီရက်ပိုင်းအတွင်းမှာ စစ်ကြောင်းထိုးဝင်ရောက်နေတာတွေ ရှိနေပြီး စစ်ကောင်စီအခြေစိုက် စကခ (၅)က လက်နက်ကြီးတွေ နဲ့ ပစ်ခတ်တာတွေကို ဆက်တိုက်လုပ်ဆောင်နေတယ်လို့ ဒေသခံတွေဆီက သိရပါတယ်။
အမှတ် (၅) စစ်ဆင်ရေးကွပ်ကဲမှုဌာနချုပ် (စကခ-၅) က အင်အား ၁၀၀ ဝန်းကျင်ရှိတဲ့ စစ်ကောင်စီ စစ်ကြောင်း တစ်ကြောင်းဟာ တောင်ကုတ်မြို့ရဲ့အ ေနာက်ဘက်မှာ ရှိတဲ့ ဝဲကြီး၊ ဝက်ကျိတ်၊ မှိုဟင်းတော နဲ့ ရွှေလင်းယုန်ဆိပ်ကမ်းများတွေ အနီးကို နေ့စဉ် စစ်ကြောင်းထိုး ဝင်ရောက်နေတာတွေ ရှိသလို အဲဒီ (စကခ – ၅) ကလည်း လက်နက်ကြီးတွေ နဲ့ မကြာခဏဆိုသလို ရမ်းသမ်းပစ်ခတ်တာတွေ ရှိနေတယ် လို့ တောင်ကုတ်ဒေသခံ တစ်ဦးကပြောပါတယ်။
“စစ်ကောင်စီကတော့ ကင်းလှည့်တဲ့ သဘောနဲ့ ကျေးရွာတွေကို စစ်ကြောင်းထိုးဝင်ရောက်တာတွေတော့ ရှိနေတယ် ဒီရက်ပိုင်းတွေ မှာ ပြီးတော့ လက်နက်ကြီးတွေလည်း ပစ်ခတ်နေတာတွေ ရှိတယ် ။ ရွှေလင်းယုန်ဆိပ်ကမ်းဘက်မှာ ဆိုရင် သူတို့ ကင်းပုန်းဝပ်တာတွေ ရှိနေတယ်။ပြီးတော့ မြို့ရဲ့နေရာတော်တော်များများမှာလည်း စစ်ကောင်စီက တပ်စွဲနေရာယူထားတာတွေ ရှိတယ်လို့”သူကပြောပါတယ်။တောင်ကုတ် နဲ့ တဆက်တည်းမှာ ရှိနေတဲ့ သံတွဲမြို့ကို အာရက္ခတပ်တော် အေအေက ထိန်းချုပ်လိုက်ပြီးနောက်ပိုင်းမှာ စစ်ကောင်စီ တပ်တွေဟာ တောင်ကုတ်မြို့တွင်းမှာ အင်အားတိုးချတာ လူနေအိမ် နဲ့ အဆောက်အဦးအမြင်နေရာတွေမှာ စစ်စခန်း အဖြစ်နကြ နေရာယူထားတာတွေ ရှိနေတယ်လို့ တောင်ကုတ်ဒေသခံတွေကပြောပါတယ်။
အဲဒါတွေ အပြင် တောင်ကုတ်မြို့နယ်အတွင်းက သွားလာသူတွေကို ဖမ်းဆီးတာတွေကိုလည်း စစ်ကောင်စီက ဆက်တိုက်လုပ်ဆောင်နေ တာတွေ ရှိနေတယ်လို့ တောင်ကုတ်ဒေသခံ တစ်ဦးကပြောပါတယ်။
“စစ်ကောင်စီက ကိုင်ရှည်တံတားမှာ စစ်ဆေးရေးဂိတ်ချထားတာရှိတယ် အဲဒီမှာ ဖုန်းတွေ လူတွေ ကုန်ပစ္စည်းတွေကိုအကုန်စစ်တယ်။ ပြီးတော့ ဖုံညိုစစ်ဆေးရေး ဂိတ်မှာလည်း စစ်ဆေးတယ် ဖမ်းတာတွေ ရှိတယ်။စစ်ကောင်စီက သံတွဲမြို့ကို လက်လွတ်လိုက်ရပြီးနောက်ပိုင်းမှာ အဲဒီလို လုပ်တာ တော်တော်များများ လုပ်လာနေတာတွေ့နေရတယ်။ပြည်သူတွေလည်း ဘယ်မှတောင်မသွားရဲတော့ဘူးလို့”သူကပြောပါတယ်။ပြီးခဲ့တဲ့ သြဂုတ်လ ၄ ရက်နေ့ကလည်း တောင်ကုတ်မြို့အတွင်းက ခရိုင်ကျေးရွာကို သွားတဲ့ ပြည်သူ ၃ ဦးကို စစ်ကောင်စီစစ်ဆေးရေး ဂိတ် တစ်ခုဖြစ်တဲ့ ဖုံးညိုစစ်ဆေးရေး ဂိတ်မှာ ဖမ်းဆီးခံခဲ့ရပြီး လက်ရှိအချိန်ထိ အဲဒီဒေသခံတွေကို ပြန်လွတ်ပေးတာ မရှိသေးသလို စစ်ကောင်စီတပ်တွေက မိသားစုဝင်တွေ နဲ့လည်းတွေ့ခွင့် ဆက်သွယ်ခွင့်မပေးသေးဘူးလို့လည်း ဒေသခံတွေကပြောပါတယ်။
အဲဒီတွေ အပြင် ပြီးခဲ့တဲ့ ဇူလိုင်လ တစ်လအတွင်းမှာလည်း အဲဒီဖုံညို စစ်ဆေးရေးဂိတ်ကို ဖြတ်သွားတဲ့ သူတွေ ထဲက အရပ်သားပြည်သူ ၃၀ ဦးထက်မနည်းကို စစ်ကောင်စီက ဖမ်းဆီးခဲ့တာတွေ ရှိခဲ့ပြီး တချို့မှာ လက်ရှိအချိန်ထိ မိသားစုတွေ နဲ့ အဆက်အသွယ် မရပဲ ဖမ်းဆီး ခံထားရဆဲ ဖြစ်တယ်လို့လည်း သိရပါတယ်။
