အာရက္ခတပ်တော် အေအေ က သံတွဲအကျဉ်းထောင်က အကျဉ်းသား ၃၇၂ ဦးကို ဘေးလွတ်ရာ နေရာတွေကို ကယ်ထုတ်နိုင်ခဲ့ပြီး အဲဒီထဲက နိုင်ငံရေး အကျဉ်းသား ၄၁ ဦး ကို ပြီးခဲ့တဲ့ သြဂုတ်လ ၆ ရက်နေ့မှာ မိသားစုတွေဆီကို လွဲပြောင်းပေးအပ် ခဲ့ပြီး ဖြစ်တယ်လို့ အေအေ က ဒီနေ့မှာ သတင်းထုတ်ပြန်လာပါတယ်။
သံတွဲမြို့နယ်အတွင်းက ငပလီ (မဇင်လေဆိပ်)၊ သံတွဲဟိုတယ်ဇုန်အပါအဝင် နေရာအများစုကို အာရက္ခတပ်တော်က ၂၀၂၄ ခုနှစ်၊ ဇူလိုင် (၁၆) ရက်နေ့၊ ညနေ (၅) နာရီ (၃၀) မိနစ်အချိန်မှာ အပြီးသတ်သိမ်းပိုက်ရရှိခဲ့ပြီးနောက် သံတွဲကျဉ်းထောင်မှာ ပိတ်မိနေတဲ့ အကျဉ်း သား (၃၇၂) ဦးကို အာရက္ခတပ်တော်က ဘေးကင်းလုံခြုံရာနေရာသို့ ကယ်ထုတ်နိုင်ခဲ့တယ်လို့ ဆိုပါတယ်။
အဲဒီလို ကယ်ထုတ်လာနိုင်ခဲ့တဲ့ အကျဉ်းသားတွေ ထဲက နိုင်ငံရေးအကျဉ်းသားတွေကို အာရက္ခတပ်တော် အေအေ အနေ နဲ့ ” ပြီးခဲ့တဲ့ရက်တွေမှာ ရန်သူတွေဟာ ပင်လယ်ပြင်ကနေ လက်နက်ကြီးတွေနဲ့ ပစ်ခတ်တိုက်ခိုက်တာတွေအပြင် ထွက်ပြေးလွတ်မြောက် နေတဲ့ စစ်ကောင်စီတပ်ဖွဲဝင်တွေကို လိုက်လံရှင်းလင်း နေရတာတွေ လတ်တလော ရေကြီးနေတဲ့ အခြေအနေတွေကြောင့် နိုင်ငံရေး အကျဉ်းသားများအားလုံးကို ဘေးကင်းလုံခြုံရာနေရာတွေမှာ ခေတ္တနေရာချထားခဲ့ရပြီး လက်ရှိမှာ လုံခြုံရေးအာမခံချက် အတိုင်းအ တာတစ်ခုထိ ရရှိနေပြီး ဖြစ်တာကြောင့် အဲဒီနိုင်င်ငံရေးအကျဉ်းသားတွေကို သူတို့နေအိမ်တွေ နဲ့ မိသားစုတွေဆီကို ၂၀၂၄ ခုနှစ်၊ ဩဂုတ်လ (၆) ရက်နေ့မှာ ပို့ဆောင်ခဲ့ပြီး ဖြစ်တယ်လို့” ဆိုပါတယ်။
အဲဒါတွေအပြင် အကျဉ်းသား (၄၁) ဦးကို ရက္ခိုင်အမျိုးသားအဖွဲချုပ်/အာရက္ခတပ်တော် (ULA/AA) က ရဲဘက်၊ အုပ်ချုပ်ရေးဘက်ဆိုင်ရာ တာဝန်ရှိသူတွေက အချက်အလက်တွေကို ကောက်ယူစိစစ်ပြီးနောက် လူသားချင်း စာနာထောက်ထားမှုဆိုင်ရာ စံနှုန်းတွေ အရ လိုအပ်တဲ့ ကျန်းမာရေးစောင့်ရှောက်မှုတွေ နဲ့ အရေးပေါ် လိုအပ်နေတဲ့ စားဝတ်နေရေး ထောက်ပံ့ကူညီမှုတွေ ပေးထားခဲ့တယ်လို့လည်း ဖော်ပြထားပါတယ်။
အာရက္ခတပ်တော် အေအေ က ကယ်ထုတ်လာခဲ့တဲ့ အကျဉ်းသား (၃၇၂) ဦးထဲ (၇) ဦးမှာ ကယ်ထုတ်နေစဉ် အတွင်းမှာ စစ်ကောင်စီက လက်နက်ကြီးတွေ နဲ့ ပစ်ခတ်ခဲ့တာကြောင့် လက်နက်ကြီးထိမှန်သေဆုံးခဲ့ရပြီး သေဆုံးသွားတဲ့ အထဲမှာ နိုင်ငံရေး အကျဉ်းသား ၂ ဦးပါဝင်သွားခဲ့တယ်လို့ ဆိုပါတယ်။
အဲဒီထဲက ကျန်ရှိနေသေးတဲ့ ခိုးမှု၊ လုယက်မှု၊ လူသတ်မှု၊ မူးယစ်ဆေးဝါးမှုစတဲ့ ရာဇဝတ်မှုအသီးသီး ကျူးလွန်ပြီး ပြစ်ဒဏ်ကျခံနေကြရတဲ့ အကျဉ်းသားတွေကိုလည်း အာရက္ခတပ်တော် အေအေ အနေ နဲ့ ဆက်လက် ထိန်းသိမ်းထားပြီး အကျဉ်းသားတွေရဲ့ ကျူးလွန်ခဲ့တဲ့ ပြစ်မှုတွေကို ပြန်လည်စစ်ဆေးပြီး တရားနည်းလမ်းကျကျ ကိုင်တွယ်ဆောင်ရွက်သွားမှာ ဖြစ်တယ်လို့လည်း အေအေ ကထုတ်ပြန်ပြော ဆိုထားပါတယ်။
