ဂွမြို့နယ်အတွင်းက စစ်ကောင်စီတပ်ရဲ့ ကင်းစခန်းငယ်တစ်ခုကို အာရက္ခတပ်တော် အေအေက ထိုးစစ်ဆင်ဝင်ရောက်တိုက်ခိုက်ခဲ့တာကြောင့် နှစ်ဖက်တိုက်ပွဲတွေ ဖြစ်ပွါးနေတာရှိနေတယ်လို့ ဂွဒေသခံတွေဆီကသိရပါတယ်။
အာရက္ခတပ်တော် အေအေ ဟာ ပြီးခဲ့တဲ့ သြဂုတ်လ ၈ ရက်နေ့ ညနေကတည်းကပင် စစ်ကောင်စီတပ်ရဲ့ကင်းစခန်းငယ် တစ်ခုဖြစ်တဲ့ ချင်းကွင်းကျေးရွာ အနီးက စစ်ကောင်စီကင်းစခန်းကို ဝင်ရောက်တိုက်ခိုက်ခဲ့တာဖြစ်ပြီး ဒီနေ့မှလည်း နှစ်ဖက်တိုက်ပွဲတွေ ဖြစ်ပွါးနေတာတွေ ရှိနေတယ်လို့ ဆိုပါတယ်။
“တိုက်ပွဲဖြစ်နေတာကတော့ ၈ ရက်နေ့ ကတည်းကဖြစ်နေတာ။အေအေက ထိုးစစ်ဆင်ဝင်ရောက်တိုက်ခိုက်တာ စခန်းငယ်ဆိုပေမယ့် စစ်ကောင်စီ တပ်တွေ အဲဒီမှာ သေသေချာချာ ခုခံဖို့ အတွက်လုပ်ထားတာတွေ ရှိနေတယ်လို့လည်း။စစ်ကောင်စီကလည်း လေကြောင်း စစ်ကူပေးနေတာ ရှိတယ်လို့”သူကပြောပါတယ်။အဲဒီတိုက်ပွဲ အခြေအနေတွေ ကြောင့် ချင်းကွင်းကျေးရွာ အနီးတဝိုက် က ကျေးရွာဒေသခံ စစ်ရှောင်ထောင်ချီဟာ ဘေးလွတ်ရာနေရာတွေကို ထွက်ပြေး တိန်းရှောင်နေကြရတယ်လို့လည်း ဆိုပါတယ်။
“စစ်ရှောင်တွေကတော့ ချင်းကွင်းအနီးတဝိုက်ကကျေးရွာတွေ စစ်ဘေးရှောင်နေကြရတယ်။စစ်ကောင်စီက လေကြောင်းတိုက်ခိုက်တာတွေ ရှိနေတော့ ။စစ်ရှောင်တွေကတော့ ပုသိမ်၊ငွေဆောင်၊မကျာည်းငူ တွေဖက်ကို ရှောင်နေကြတယ်။တစ်ချို့ကတော့ ဒေသတွင်းက ဘေးလွတ်ရာနေရာတွေမှာလည်း ရှောင်နေ ကြတာတွေ အများကြီးတော့ ရှိနေတယ်လို့” သူကပြောပါတယ်။အဲဒါတွေအပြင် ဂွမြို့နယ် ခွဲတစ်ခုဖြစ်တဲ့ ကျိန္တလီမြို့နယ်အတွင်းမှာလည်း စစ်ကောင်စီ တပ်တွေ နဲ့ အာရက္ခတပ်တော် အေအေ တို့ဟာ နှစ်ဖက် စစ်ရေးတင်းမာမှု တွေ ရှိနေပြီး ကျိန္တလီမြို့နယ် အတွင်းက ဒေသခံပြည်သူ အများအပြည်းဟာလည်း ဘေးလွတ်ရာနေရာတွေကို စစ်ဘေးရှောင်ထွက်နေကြရတယ်လို့ ဒေသခံတွေကပြောပါတယ်။
“လက်ရှိကတော့ အစိုးရရုံးတွေ အကုန်ပြောင်းနေကြပြီ။ သံတွဲ နဲ့ ငပလီက တပ်ဆုတ်လာတဲ့ စစ်ကောင်စီတပ်တော်တော်များများဟာ ကျိန္တလီကစစ်ဘေးရှောင်နေအိမ်တွေမှာ တပ်စခန်းအဖြစ်နဲ့ နေပြီးတော့ အေအေ ရဲ့ထိုးစစ်ကို ခုခံဖို့ လုပ်ထားတာတွေ ရှိနေတယ်။ကျိန္တလီမှာလည်း စစ်ရေး တင်းမာမှုတွေ ရှိနေပြီး တိုက်ပွဲက ဖြစ်လာတော့မယ့် အခြေအနေမှာ ရှိနေတယ်လို့” သူကပြောပါတယ်။စစ်ကောင်စီတပ်တွေ ဟာ သံတွဲမြို့ နဲ့ ငပလီမြို့ကို လက်လွတ်တော့ရမယ့် အနေအထားရောက်ရှိလာတာကြောင့် သံတွဲ မြို့ နဲ့ ငပလီမြို့နယ်တွေက တပ်ဆုတ် ထွက်ပြေးသွားတဲ့ စစ်ကောင်စီတပ်တွေ ဟာ ဂွမြို့နယ် နဲ့ ကျိန္တလီမြို့နယ် အတွင်းက ကျေးရွာ အများစုမှာ တပ်စွဲ နေထိုင်ကာ အေအေ ရဲ့ ထိုးစစ်ကို ခုခံနေတာတွေ ရှိသလို ဂွ နဲ့ ကျိန္တလီ မြို့နယ် အတွင်းက အစိုးရ ရုံးတွေကိုလည်း ဧရာဝတီတိုင်း ရေကြည်မြို့နယ် ထဲကို ပြောင်းရွှေ့တာတွေ ရှိနေတယ် လို့ ဂွဒေသခံတွေကပြောပါတယ်။
အာရက္ခတပ်တော် အေအေ ဟာ သံတွဲမြို့နယ် ၊ငပလီမြို့ အတွင်းက စစ်ကောင်စီရဲ့လက်ကျန်စခန်းတစ်ခုဖြစ်တဲ့ မောင်ရွှေလေးရေတပ်စခန်းကို အပြီးသတ် သိမ်းပိုက်နိုင်ဖို့ ထိုးစစ်ဆင် တိုက်ခိုက်နေချိန်မှာပဲ ဂွမြို့နယ်အတွင်းက စစ်ကောင်စီတပ်တွေ့ ရဲ့ ကင်းစခန်းငယ်တွေကို သိမ်းပိုက် နိုင်ဖို့ အတွက်စတင်ထိုးစစ်ဆင် တိုက်ခိုက်လာနေတာလည်း ဖြစ်ပါတယ်။
