အာရက္ခတပ်တော် အေအေ နဲ့ စစ်ကောင်စီတပ်တို့ နှစ်ဖက်တိုက်ပွဲဖြစ်ပွါးနေတဲ့ ကျိန္တလီမြို့တွင်းမှာ ဖုန်းလိုင်းအင်တာနက်လိုင်းတွေ ဖြတ်တောက်ခံထားရတာကြောင့် တိုက်ပွဲကြား ပိတ်မိကျန်နေခဲ့တဲ့ မိသားစုဝင်တွေ နဲ့ အဆက်အသွယ်မရဘဲ ဖြစ်နေတယ်လို့ ကျိန္တလီမြို့ တိုက်ပွဲကြားကနေ ထွက်ပြေးလွတ်မြောက်လာတဲ့ ဒေသခံပြည်သူတွေကပြောပါတယ်။
ကျိန္တလီမြို့ အတွင်း တိုက်ပွဲပြင်းထန်လာတာနဲ့ အတူဒေသခံ ပြည်သူတွေဟာစစ်ပွဲနဲ့ ဘေးလွတ်ရာနေရာတွေကို ထွက်ပြေးတိမ်းရှောင်လာခဲ့ကြပေမယ့် မြို့ တွင်းမှာ ပြည်သူအများစုဟာ ထွက်ခွါခွင့် မရဘဲ ပိတ်မိကျန်နေခဲ့သူတွေလည်း အများအပြား ရှိနေခဲ့တယ်လို့ ဆိုပါတယ်။
အဲဒီလို ပိတ်မိနေသူတွေကို လက်ရှိမှာ ဖုန်းလိုင်း အင်တာနက်လိုင်းတွေ မရတော့တာကြောင့် မိသားစုဝင်တွေ အနေ နဲ့ စိုးရိမ်မှုတွေလည်း ရှိနေရတယ်လို့ ကျိန္တလီမြို့နယ်အတွင်းက စစ်ပွဲ နဲ့ ဘေးလွတ်ရာကို ထွက်လာနိုင်တဲ့သူ စစ်ရှောင်တစ်ဦးကပြောပါတယ်။
“ကျမတို့မှာလည်း မိသားစုဝင်တွေ ကျန်နေခဲ့သေးတယ်။အကိုတို့ မိသားစုက ထွက်မရပဲ ပိတ်မိကျန်နေခဲ့တယ် ၁၁ ရက်နေ့ ညနေထိတော့ ဖုန်းလိုင်းက ရလိုက်တယ် နောက်မရတော့ဘူး။ဘာဖြစ်နေကြလဲ ဆိုတာကိုလည်း မသိရတော့ဘူး။ မြို့တွင်းမှာ ကျန်နေခဲ့တဲ့ သူတွေ အတွက်လည်း အရမ်းစိုးရိမ်နေရတယ်။ တိုက်ပွဲကတော့ ပစ်ခတ်သံတွေ ကြားနေရတယ်။ မနေ့ က ညနေအထိလို့” သူကပြောပါတယ်။ကျိန္တလီမြို့နယ် အတွင်းမှာ စစ်ကောင်စီတပ်တွေ နဲ့ အာရက္ခတပ်တော် အေအေတို့ဟာ ပြီးခဲ့တဲ့ သြဂုတ်လ ၁၀ ရက်နေ့ ကတည်းကပင် ချင်းကွင်းကျေးရွာ အနီးမှာ နှစ်ဖက်တိုက်ပွဲစတင်ဖြစ်ပွါးခဲ့တာဖြစ်ပြီးနောက် သြဂုတ်လ ၁၁ ရက်နေ့ မှာ ကျိန္တလီမြို့တွင်းအထိ နှစ်ဖက်တိုက်ပွဲတွေ ပြင်းပြင်းထန်ထန်ဖြစ်ပွါးလာခဲ့တာလည်းဖြစ်ပါတယ်။
ပြီးခဲ့တဲ့ သြဂုတ်လ ၁၂ ရက်နေ့ ညမှာ စစ်ကောင်စီက ကျိန္တလီမြို့ကို ရေကြောင်း၊လေကြောင်းကနေ အပြင်းအထန်တိုက်ခိုက်တာတွေ ရှိတဲ့ အတွက် မြို့တွင်းမှာ ထိခိုက် ပျက်စီးမှု အပြားအပြား ရှိနိုင်တယ်လို့လည်း စစ်ဘေးရှောင်တွေက သုံးသပ် ပြောဆိုကြပါတယ်။
“စစ်ကောင်စီက လေကြောင်း၊ရေကြောင်းက ဆက်တိုက် ပစ်ခတ်မှုတွေ လုပ်ခဲ့တယ်။ပစ်ခတ်သံတွေကိုလည်း ကျနော်တို့ ကြားနေရတယ် မြို့တွင်းမှာ အပျက်အစီးကတော်တော် များနိုင်တယ်။မြို့နဲ့ ကျေနော်တို့ စစ်ရှောင်နေတဲ့ နေရာတွေ နဲ့ ဘယ်လောက်မှ မဝေးတော့ ကြားနေ မြင်နေရတယ်။ကျနော်တို့ နေတဲ့ နေရာလည်း ဖုန်းလိုင်းဘဲ ရတာ အင်တာနက်က သစ်မရဘူး။ပျက်စီးမှုတွေတော့ တော်တော် ရှိနိုင်တယ်လို့”သူကပြောပါတယ်။လက်ရှိမှာ စစ်ကောင်စီတပ်တွေ နဲ့ အာရက္ခတပ်တော် အေအေ တို့ဟာ ကျိန္တလီမြို့တွင်းမှာ ပစ်ခတ်မှု အနည်းငယ် ငြိမ်သက်သွားပြီး ရတနာမြိုင်ကျေးရွာ အနီးမှာတိုက်ပွဲ ဆက်လက် ဖြစ်ပွါးနေတာတွေ ရှိနေတယ်လို့ ဆိုပါတယ်။
အဲဒါတွေ အပြင် စစ်ကောင်စီတပ်တွေဟာ ကျိန္တလီမြို့နဲ့ ဂွလမ်းကြောတစ်လျှောက်က ရွာတွေ ဖြစ်ကြတဲ့ ကုလားပြင်၊သဗြုချောင်း စတဲ့ ကျေးရွာတွေမှာစစ်ကောင်စီတပ်တွေက ခံစစ်အနေအထား နဲ့ လက်နက်ကြီးတပ်ဆင်တာ၊စစ်အင်အားဖြည့်တင်းတာတွေကို လုပ်ဆောင်နေတာတွေလည်းရှိနေတယ်လို့ ဒေသခံတွေဆီက သိရပါတယ်။
