ရခိုင်ပြည်၊ဂွမြို့နယ်အတွင်းက ကျိန္တလီမြို့ကို အာရက္ခတပ်တော် အေအေက ထိန်းချုပ်လိုက်ပြီးနောက် ဂွမြို့အနီးက နေရာ ၂ ခုမှာ စစ်ကောင်စီတပ်တွေ နဲ့ အာရက္ခတပ်တော်အေအေတို့ဟာ နှစ်ဖက်တိုက်ပွဲတွေ ဆက်လက်ဖြစ်ပွါးနေတာတွေ ရှိနေတယ်လို့ ဂွဒေသခံတွေကပြောပါတယ်။
အဲဒီလို တိုက်ပွဲဖြစ်ပွါးနေတဲ့ နေရာတွေကတော့ ကုလားပြင် တံတား အနီး နဲ့ကြွေချိုင်ကမ်းခြေ အနီးက နေရာတွေမှာ ဆက်လက်တိုက်ပွဲဖြစ်ပွါးနေတာ ဖြစ်တယ်လို့ ကုလားပြင် ကျေးရွာဒေသခံ တစ်ဦးကပြောပါတယ်။
“တိုက်ပွဲဖြစ်တာကတော့ ဒီနေ့တော့ ပစ်ခတ်တာနည်းနည်း နည်းတယ်ပြောရမယ်။မနေ့က ဆို စစ်ကောင်စီက လေကြောင်း၊ရေကြောင်းကနေ အဆက် မပြတ်ပစ်ခတ်တာတွေ ရှိတယ်။ ဒီနေ့က နည်းနည်းငြိမ်နေတယ် ဘာတွေ ဖြစ်လာမလဲ ဆိုတာတော့ မသိသေးဘူးလို့”သူကပြောပါတယ်။
အာရက္ခတပ်တော် အေအေဟာ ကျိန္တလီမြို့နယ် အတွင်းက စစ်ကောင်စီတပ်စခန်းတွေကိုပြီးခဲ့တဲ့ သြဂုတ်လ ၁၀ ရက်နေ့မှာ ထိုးစစ်ဆင်တိုက်ခိုက်ခဲ့ပြီးနောက် သြဂုတ်လ ၁၃ ရက်နေ့မှာ အပြီးသတ်ထိန်းချုပ်နိုင်ခဲ့ပါတယ်။
အဲဒီနောက် ကျိန္တလီမြို့နယ် အတွင်းက အသက်ရှင်ထွက်ပြေးသွားတဲ့ စစ်ကောင်စီတပ်သားတွေဟာ ရတနာမြိုင် အနီးမှာ တပ်စွဲနေထိုင်နေတဲ့ စစ်ကောင်စီ တပ်သားတွေ နဲ့ သွားရောက်ပူပေါင်းပြီး အာရက္ခတပ်တော် အေအေ ကို ခုခံနိုင်ဖို့ ခံစစ် အနေအ ထားနဲ့ လုပ်ဆောင်နေတာတွေရှိနေတယ်လို့ လည်း မျက်မြင်ဒေ သခံတွေကပြောပါတယ်။
“ကျိန္တလီက ထွက်ပြေးလာတဲ့ စစ်ကောင်စီတပ်တွေက ရတနာမြိုင်မှာ ရှိတဲ့ တပ်တွေ နဲ့လာပြီးပူးပေါင်းနေတယ်။ခံစစ်အနေအထားနဲ့တော့ သေသေချာချာ လုပ်ထားတယ်။ပြောသံကြားတာတော့ တံတားတွေကိုတောင်မိုင်းခွဲ ဖျက်ဆီးဖို့ လုပ်ထားတယ်လို့ ကြားရတယ်လို့”သူကပြောပါတယ်။
ဒါတွေအပြင် အဲဒီရတနာမြိုင်ကျေးရွာက ဒေသခံ ၁၀၀ နီးပါးကို ပြီးခဲ့တဲ့ သြဂုတ်လ ၁၅ ရက်နေ့က ဖမ်းဆီတာ ရှိခဲ့သလို အဲဒီဖမ်းဆီးခံရသူတွေရဲ့ ဖုန်းတွေကို သိမ်းယူကာ သြဂုတ်လ ၁၆ ရက်နေ့မနက်ပိုင်းမှာ ပြန်လွတ်ပေးခဲ့တာ ရှိခဲ့ပြီး ကျေးရွာသားတွေ အနေ နဲ့ နေအိမ်ကနေ အပြင်ကို ထွက်မသွားဖို့ကိုလည်း စစ်ကောင်စီတပ်တွေက ပြောဆိုလိုက်တာ ရှိတယ်လို့ သိရပါတယ်။
