ဂွမြို့နယ်အတွင်းက ကုလားပြင်(ရတနာမြိုင်)ကျေးရွာထဲမှာ တိုက်ပွဲအတွင်းက ဒဏ်ရာရရှိလာတဲ့ ရာနဲ့ချီတဲ့ စစ်ကောင်စီတပ်ဖွဲ့ဝင်တွေကို စစ်ကောင်စီက ဆေးကုသပေးနေတာတွေ ရှိနေတယ်လို့ ဒေသသတင်းအရင်းအမြစ်တွေကပြောပါတယ်။
အဲဒီဆေးကုသခံနေရတဲ့ စစ်ကောင်စီတပ်ဖွဲ့ဝင်တွေဟာ ကျိန္တလီတိုက်ပွဲအတွင်းကနေ ဒဏ်ရာရရှိလာကြတဲ့ တပ်ဖွဲ့ဝင်တွေ ဖြစ်ကြပြီး ကုလားပြင်(ရတနာမြိုင်)ကျေးရွာအတွင်းက စစ်ဘေးရှောင်တွေရဲ့ နေအိမ်ထဲမှာ ထားကာ ဆေးကုသပေးနေတာ ဖြစ်တယ်လို့ ဒေသသတင်းအရင်းအမြစ်က ဆိုပါတယ်။
“နေအိမ် ၇လုံးကို ဖောက်ပြီးတော့ သူတို့ စစ်ကောင်စီတပ်သားတွေကို ဆေးကုသပေးနေတယ်။အဆင်မြင့်ကျန်းမာရေးရုံးဆိုပြီးတော့လည်း ဖွင့်ထားတယ် အဲဒီမှာလည်း စစ်သားတွေ အများကြီး ဆေးကုသပေးနေတာတွေ။ညဖက်ဆိုရင်လည်း အော်သံတွေ ကြားရတယ်။ပြောသံကြားရသလောက် ဆိုရင် ဆေးဝါး မလုံလောက်လို့ တချို့သေသွားတဲ့ သူတွေလည်း အများကြီး ရှိတယ်လို့ကြားရတယ်လို့”သူကပြောပါတယ်။စစ်ကောင်စီတပ်တွေဟာ ကုလားပြင်(ရတနာမြိုင်)ကျေးရွာအဝင်က တံတား ၊ကုလားပြင်(ရတနာမြိုင်)ရဲစခန်း အတွင်းမှာ အေအေ ရဲ့ထိုးစစ်ကို ခုခံကာကွယ်ဖို့ တွက်လက်နက်ကြီးတွေတပ်ဆင်တာတွေကို လုပ်ဆာင်ထားသလို ကျေးရွာ အတွင်းက နေအိမ်တွေထဲမှာလည်း တပ်စွဲနေထိုင်နေတာတွေရှိနေပြီး ပြည်သူပိုင်ပစ္စည်းတွေကိုလည်း ဖောက်ထွင်းခိုးယူနေတာတွေရှိနေတယ်လို့ ဒေသသတင်းရင်းမြစ်တွေကပြောပါတယ်။
ပြီးခဲ့တဲ့ သြဂုတ်လ ၁၅ ရက်နေ့မှာ စစ်ကောင်စီတပ်တွေဟာ ကုလားပြင်(ရတနာမြိုင်)ကျေးရွာက ရာနဲ့ချီတဲ့ ဒေသခံတွေကို အပြစ်မဲ့ ဖမ်းဆီးစစ်ဆေးတာ လုပ်ဆောင်ခဲ့ပြီးနောက်မှာ ပြန်လွတ်ပေးတာလုပ်ဆောင်ခဲ့ပါတယ်။အဲဒီနောက် စစ်ကောင်စီတပ်တွေဟာ ကျေးရွာအတွင်းမှာ လက်နက်ငယ်ပစ်ဖောက်တာတာတွေကို လုပ်ဆောင်ခဲ့တာကြောင့် ပြည်သူတွေဟာ ကျေးရွာအတွင်းမှာ မနေရဲကြတော့ပဲ ဘေးလွတ်ရာနေရာတွေကို ထွက်ပြေးသွားခဲ့ရတယ်လို့ ဒေသ သတင်းအရင်းအမြစ်က ပြောပါတယ်။
“ဖမ်းတုန်းကဘာတွေမေးလဲဆိုတော့ ရွာကဘာလို့ထွက်မသွားတာလည်း။အေအေ နဲ့ အဆက်အသွယ်ရှိလား အဲဒါတွေမေးတယ်။ပြီးတော့ဖုန်းတွေကိုတောင်းတယ်ပြီးတော့ ဖုန်းဆင်းကဒ်တွေ အကုန်လုံးကိုယူထားလိုက်တယ်။အဲဒီနေ့ကတည်းကပင် ရွာမှာ စစ်ကောင်စီက သေနတ်ပစ်ခတ်တာတွေကိုလုပ်တယ်။အဲဒီလိုလုပ်တော့ ရွာသားတွေကလည်း မနေရဲတော့ အကုန်ထွက်ပြေးကြရတယ်။အခုတော့ တစ်ရွာလုံးက စစ်ဘေးရှောင်နေအိမ်တွေကို ဖောက်ပြီး ပစ္စည်းတွေ အကုန်ယူတယ် ။ပြီးတော့ အိမ်တွေမှာ တပ်စွဲပြီးတော့ နေနေကြတယ်”လို့ ဖမ်းဆီးခံခဲ့ရပြီး ပြန်လည်လွတ်ပေးလိုက်သူ တစ်ဦးကပြောပါတယ်။အဲဒီလိုစစ်ကောင်စီတပ်တွေက ဖောက်ထွင်းခိုးယူနေတာကြောင့် ကျေးရွာအတွင်းက နေအိမ်အများစုဟာ စစ်ကောင်စီတပ်တွေရဲ့ ဖောက်ထွင်းခိုးယူတာတွေကို ဆက်တိုက်ခံနေကြရတယ်လို့ ဒေသ သတင်းအရစ်အမြစ်တွေကပြောပါတယ်။
ကုလားပြင်(ရတနာမြိုင်)ကျေးရွာဟာ ကျိန္တလီမြို့နဲ့ ၆ မိုင်ခန့် အကွာမှာ ရှိတဲ့ ကျေးရွာတစ်ခုဖြစ်ပြီး လက်ရှိ အာရက္ခတပ်တော် နဲ့ စစ်ကောင်စီတပ်တို့ နှစ်ဖက်တိုက်ပွဲဖြစ်ပွါးနေတဲ့ ကျောက်ပါးစပ်ကျေးရွာအနီသို့ လက်နက်ကြီးပစ်ကူ နဲ့ ဒရုန်းတွေလွတ်ကာ စစ်ကူပေးနေတဲ့ နေရာတစ်ခုလည်း ဖြစ်ပါတယ်။
