တိုက်ပွဲတစ်စုံတရာ ဖြစ်ပွါးတာ မရှိတဲ့ တောင်ကုတ်မြို့နယ် အတွင်းက ကျေးရွာတွေကို စစ်ကောင်စီဟာ ဒီရက်ပိုင်း အတွင်းမှာ လေကြောင်းတိုက်ခိုက်တာကို မကြာခဏဆိုသလို လုပ်ဆောင်လာနေတာတွေတွေ့ နေရတယ်လို့ ဒေသခံတွေကပြောပါတယ်။
ပြီးခဲ့တဲ့ သြဂုတ်လ ၁၆ ရက်နေ့ကလည်း တောင်ကုတ်မြို့ နဲ့ ၉ မိုင်းခန့် အကွာမှာ ရှိတဲ့ မိုးပညာဒါနကျောင်းကို စစ်ကောင်စီက လေကြောင်းတိုက်ခိုက်တာ ရှိခဲ့သလို ဩဂုတ် ၁၉ ရက်နေ့မှာလည်း တောင်ကုတ်မြို့နယ် အတွင်းက ကျောက်ကြီးပေါက်ကျေးရွာကိုလေကြောင်းတိုက်ခိုက်တာကိုလုပ်ဆောင်ခဲ့တာတွေ ရှိခဲ့တယ်လို့ဆိုပါတယ်။
အဲဒီလို စစ်ကောင်စီက လေကြောင်းတိုက်ခိုက်တာလုပ်ဆောင်ခဲ့တာကြောင့် မိုပညာဒါနကျောင်း အတွင်းက ကျောင်းစာသင်ခန်း နဲ့ ကျောင်းသုံးပစ္စည်းတွေများစွာ ပျက်စီးသွားခဲ့ရသလို ကျောက်ကြီးပေါက်ကျေးရွာအတွင်းမှာလည်း လူနေအိမ် ၁၀ ဆောင်ထက်မနည်းဟာ ပျက်စီးမှုတွေ ရှိခဲ့ရတယ်လို ဒေသခံတွေကပြောပါတယ်။
အဲဒီလိုဘဲ သြဂုတ်လ ၂၀ ရက်နေ့ ညနေ မှာ စစ်ကောင်စီက တန်းလွဲချောင်းဖျားတောင်တန်းတလျှောက်ကို ထပ်မံ လေကြောင်းတိုက်ခိုက်တာ ရှိခဲ့ပြီး အခုလို ကြောင်းတိုက်ခိုက်မှု မကြာခဏ လုပ်ဆောင်နေတာကြောင့် ဒေသခံပြည်သူတွေ အနေ နဲ့ နေအိမ်အတွင်းကို ဘယ်နေ့ လက်နက်ကြီးကျည် ကျရောက်မလဲ ဆိုတာကို စိုးရိမ်နေရတယ်လို့ ဒေသခံတစ်ဦးကပြောပါတယ်။
“မနေ့ကလည်း တန်းလွဲချောင်းဖျားက တောင်တန်းတွေကို လေကြောင်းတိုက်ခိုက်တာရှိတယ်။ဘာကြောင့်လုပ်တယ်ဆိုတာတော့မသိဘူး။ကျနော်တို့က တော့ လေကြောင်းက တိုက်ခိုက်နေတယ်ဆိုတော့ ဘယ်နေ့ ကိုယ့်အိမ်ကို ကျမလဲ ဆိုတာကိုတွေးပြီးကြောက်နေရတယ်လို့ ”တောင်ကုတ် ဒေသခံ တစ်ဦးက ပြောဆိုပါတယ်။တောင်ကုတ်မြို့နယ် အတွင်းမှာ စစ်ကောင်စီတပ်တွေ နဲ့ အာရက္ခတပ်တော် အေအေတို့ဟာ နှစ်ဖက်စစ်ရေးတင်းမာမှုတွေ ရှိနေပြီး စစ်ကောင်စီတပ်တွေဟာ တောင်ကုတ်မြို့နယ် အတွင်းက အထပ်မြင့်အဆောက်အဦးတွေမှာ စစ်ရေးအတွက် နေရာယူတာ၊စစ်အင်အား ဖြည့်တင်းတာ လမ်းသွားလမ်းလာပြည်သူတွေကို စစ်ဆေးမေးမြန်းဖမ်းဆီးတာတွေကိုလည်း လုပ်ဆောင်နေတာတွေတော့ ရှိနေတယ်လို့ ဒေသခံတွေရဲ့ ပြောဆိုချက်အရ သိရပါတယ်။
လက်ရှိစစ်ကောင်စီက ကျေးရွာတွေကို မကြာခဏာဆိုသလို လေကြောင်းတိုက်ခိုက်နေတာဟာလည်း စစ်ကောင်စီသတင်းပေးတွေက အဲဒီနေရာတွေမှာ အာရက္ခတပ်တော် အေအေ ရှိတယ်လို့ ထင်ကြေးပေး သတင်းပို့တာတွေ ရှိတာကြောင့် အခုလို လေကြောင်းတိုက်ခိုက်တာတွေကို လုပ်ဆောင်နေတာ ဖြစ်နိုင်တယ်လို့ တောင်ကုတ်ဒေသခံ တစ်ဦးက သုံးသပ်ပြောဆိုပါတယ်။
“ဖြစ်နိုင်တာက စကစ သတင်းပေးတွေက ဒီနေရာတွေမှာ အေအေ ရှိတယ်ဆိုပြီး သတင်းပေးလို့ အခုလိုလေကြောင်းတိုက်ခိုက်တာတွေကို လုပ်နေတယ်လို့ သုံးသပ်တယ်။ဒါပေမယ့် အခုစကစတိုက်ခိုက်တဲ့နေရာတွေက အေအေ ရှိတဲ့ နေရာတွေမဟုတ်ပဲ ရွာသူရွာသားတွေ ရှိတဲ့ နေရာတွေ ဖြစ်နေတယ်။အခုလို သတင်းပေးတွေ ရှိတယ်ဆိုရင်လည်း သတင်းပေးက သေသေချာချာ လေ့လာပြီး သတင်းပေးဖို့လိုတယ်။အခု ပြည်သူတွေပဲ ထိခိုက်အောင်သတင်းပေးတာတော့ မဖြစ်သင့်ဘူးလို့” သူကပြောပါတယ်။ဒါ့အပြင် စစ်ကောင်စီအနေ နဲ့ တိကျခိုင်လုံမှု မရှိတဲ့ သတင်းပေးတွေ ရဲ့ ပြောဆိုမှုတွေကို ယုံကြည်ကာ အရပ်သားပြည်သူတွေ ရှိရာနေရာတွေကို လေ ကြောင်းတိုက်ခိုက်မှု ပြုလုပ်နေတာဟာ စစ်ရာဇဝတ်မှုကို ကျူးလွန်နေတာ ဖြစ်တယ်လို့လည်း ဒေသခံပြည်သူတွေကပြောဆိုကြပါတယ်။
