ရခိုင်တကျော့ပြန်တိုက်ပွဲ စတင်ပြီး ၉လ ကျော်အကြာမှာ ရက္ခိုင့်တပ်တော်အေအေ ဟာ ရခိုင်မှာ ရှိတဲ့တရုတ်စီမံကိန်း ၁၁ ခုထဲက ၉ ခုရဲ့ တစ်စိတ်တစ်ပိုင်းကို ထိန်းချုပ်မှု ရှိလာနေတယ်လို့ ISP Myanmar ရဲ့ သြဂုတ်လ ၁၉ ရက်နေ့ထုတ် အစီရင်ခံစာမှာ ဖော်ပြထားပါတယ်။
အာရက္ခတပ်တော် အေအေ နဲ့ စစ်ကောင်စီတပ်တွေ ဟာ ရခိုင်မှာ ၂၀၂၃ ခုနှစ် နိုဝင်ဘာလ ၁၃ ရက်နေ့ကတည်းကပင် တကျော့ပြန်တိုက်ပွဲ စတင်ခဲ့ပြီးနောက် ရခိုင်က မြို့နယ် ၉ ခု နဲ့ ချင်းပြည်နယ် ပလက်ဝမြို့နယ်တွေကို အေအေ ကသိမ်းပိုက်နိုင်ခဲ့ပါတယ်။
အဲဒီလို ရခိုင်က မြို့နယ် ၉ ခု နဲ့ ပလက်ဝမြို့နယ်တွေကို အေအေ က သိမ်းပိုက်လိုက်ပြီးနောက်မှာ ၂၀၂၄ ခုနှစ် သြဂုတ်လ (၁၈) ရက်နေ့ အထိ ၉ လကျော်ကြာတိုက်ပွဲမှာ အခုလို တရုတ်စီမံကိန်း ၁၁ တစ်ခုထဲက ၉ ခုရဲ့တစ်စိတ်တစ်ပိုင်းကို ထိန်းချုပ်လာနိုင်တာလည်း ဖြစ်ပါတယ်။
အဲဒီလို အေအေရဲ့ တစိတ်တစ်ပိုင်း ထိန်းချုပ်လိုက်တဲ့ စီမံကိန်း ၉ ခုမှာ သဘာဝဓာတ်ငွေ့ပိုက်လိုင်း၊ ကျောက်ဖြူ – အမ်းရထားလမ်း၊ မန္တလေး – ကျောက်ဖြူရထားလမ်း၊ မန္တလေး – ကျောက်ဖြူကားလမ်း၊ရေနံပိုက်လိုင်း၊ ကျောက်ဖြူရေနက်ဆိပ်ကမ်း နဲ့အထူးစီးပွါးရေးဇုန်၊ကျောက်ဖြူသဘာဝဓာတ်ငွေ့သုံးစွမ်းအင်စီမံကိန်း၊ကျောက်ဖြူ-နေပြည်တော်ကားလမ်း နဲ့ သံတွဲလေအား လျှပ်စစ်စီမံကိန်းတို့ ဖြစ်ကြတယ်လို့ ဖော်ပြထားပါတယ်။
အဲဒီထဲက သဘာဝဓာတ်ငွေ့ပိုက်လိုင်းစီမံကိန်းရဲ့တန်ဖိုးဟာ ကန်ဒေါ်လာ ၁၀၉၀သန်း ၊ မန္တလေး – ကျောက်ဖြူရထားလမ်းစီမံကိန်းဟာ ၁၁၀၀၀သန်း၊ရေနံပိုက်လိုင်းရဲ့ စီမံကိန်းတန်ဖိုးဟာ ၁၅၀၀သန်း၊ကျောက်ဖြူရေနက်ဆိပ်ကမ်း နဲ့အထူးစီးပွါးရေးဇုန်တန်ဖိုးဟာ ၉၆၀၀သန်း၊ကျောက်ဖြူသဘာဝဓာတ်ငွေ့သုံးစွမ်းအင်စီမံကိန်းစီမံကိန်းတန်ဖိုးဟာ ၁၈၀သန်းရှိပြီး စုစုပေါင်းဒီစီမံကိန်း ၅ ခုရဲ့တန်ဖိုးဟာ ကန်ဒေါ်လာ ၂.၃ ဘီလီယံအထက်ရှိနေတာကိုလည်း ISP Myanmar ရဲ့ ဖော်ပြချက်မှာ တွေ့ရပါတယ်။
ဒါ့အပြင် အဲဒီထဲက ကျောက်ဖြူ – အမ်းရထားလမ်းစီမံကိန်း၊မန္တလေး – ကျောက်ဖြူကားလမ်းစီမံကိန်း၊ကျောက်ဖြူ-နေပြည်တော်ကားလမ်းစီမံကိန်း နဲ့သံတွဲလေအား လျှပ်စစ်စီမံကိန်းတို့ ရဲ့တန်ဖိုးတွေဟာ မသိရရှိရသေးဘူးလို့ ISP Myanmar က ဖော်ပြထားပါတယ်။
