ဂွမြို့နယ် ရေကျော်ကျေးရွာကို စစ်ဘေးရှောင်ဖို့ရောက်နေကြတဲ့ သံတွဲမြို့နယ်၊ငပလီမြို့ ဂျိတ္တောရပ်ကွက်က စစ်ဘေးရှောင် အမျိုးသား ၁၂ ဦးကို စစ်ကောင်စီတပ်တွေက ကားနဲ့ဖမ်းဆီးကာ ဒီနေ့ညနေမှာ ခေါ်ယူသွားခဲ့တယ်လို့ ဒေသခံ သတင်းအရင်းအမြစ် တွေ ကပြောပါတယ်။
ဒီနေ့ နေ့လယ် ၁ နာရီလောက်မှာ ရေကျော်ကျေးရွာအတွင်းကို အင်းအား ၅၀ ဝန်းကျင်ရှိတဲ့ စစ်ကောင်စီတပ်တွေဟာ ဝင်ရောက်လာပြီးနောက် စစ်ဘေးရှောင်တွေကို ခေါ်ယူစစ်ဆေးမေးမြန်းတာတွေ လုပ်ဆောင်ပြီးနောက် အဲဒီထဲက အမျိုးသား ၁၂ ဦးကို ကားပေါ်တင်ခေါ်ယူသွားတာဖြစ်တယ်လို့ အဲဒီဒေသ သတင်းအရင်းအမြစ်ကပြောပါတယ်။
“စစ်ရှောင်တွေက စာသင်ကျောင်း နဲ့ ဘုန်းကြီးကျောင်းတွေမှာ နေကြတော့ သူတို့ရောက်လာပြီး အကုန်ကို ခေါ်တယ်။ မလာတဲ့ သူတွေကို ပစ်သတ်မယ်ဆိုပြီးခြိမ်းခြောက်ပြီးခေါ်တယ်။နောက်ပြီးတော့ မိန်းမတွေကို ပြန်ခိုင်းတယ်။ ယောင်္ကျားတွေကို ဒူးတွေမှာ အမာရွတ်တွေရှိလားဆိုပြီး စစ်ဆေးတယ်။ပြီးတော့ အဲဒီ အမျိုးသား ၁၂ ဦးကို ကားနဲ့ ညနေ ၆ နာရီလောက်မှာ ခေါ်သွားတယ်။ကျန်တဲ့လူတွေကိုတော့ ပြန်လွတ်ပေးလိုက်တယ်လို့” သူကပြောပါတယ်။အဲဒီကျေးရွာအတွင်းမှာ သံတွဲမြို့နယ် နဲ့ ကျိန္တလီမြို့နယ်အတွင်းက စစ်ဘေးရှောင်ဖို့ ရောက်နေသူဦးရေ ၄၀၀ ကျော်လောက် ရှိပြီး အခုလို စစ်ရှောင် ၁၂ ဦးကို ဘာကြောင့် ဘယ်ကိုခေါ်ယူသွားတယ်ဆိုတာ မသိရသေးဘူးလို့လည်း အဲဒီဒေသသတင်း အရင်းမြစ်ကပြောပါတယ်။
“ခေါ်သွားတဲ့ သူ ၁၂ ဦးကတော့ ဂျိတ္တောကဖြစ်တယ်။ အမည်တွေကိုတော့ စာရင်းကောက်နေတုန်း။ဘာကြောင့်ခေါ်တယ်ဆို တာကိုတော့ မသိဘူး။ဘယ်သူမှလည်း မမေးရဲ မပြောရဲဘူး ။ခေါ်ကတည်းကပင် မလာရင်ပစ်သတ်မယ် ပြောထားတော့ အကုန်က ကြောက်နေကြရတယ်။ဘယ်ကိုခေါ်သွားတာလည်း ဆိုတာကိုလည်း မသိရသေးဘူးလို့ ” သူကပြောပါတယ်။အဲဒီ ရေကျော်ကျေးရွာဟာ လက်ရှိစစ်ကောင်စီက တပ်စွဲနေထိုင်နေတဲ့ ရတနာမြို့ (ကုလားပြင်)ကျေးရွာ နဲ့ မနီးမဝေးမှာ တည်ရှိနေတဲ့ ကျေးရွာ တစ်ရွာ ဖြစ်ပြီး လက်ရှိ မှာလည်း စစ်ကောင်စီတပ်သားတချို့ဟာ အဲဒီကျေးရွာ အနီးမှာ စခန်းချ နေထိုင်ကာ စောင့်ကြည့်နေတာတွေ ရှိနေတယ်လို့လည်း ဒေသသတင်းအရင်းအမြစ်တွေကပြောပါတယ်။
ဒီနေ့မှာ စစ်ကောင်စီတပ်တွေ နဲ့ အာရက္ခတပ်တော် အေအေတို့ဟာ ကျီန္တလီမြို့နယ်အတွင်းမှာ ရှိတဲ့ ကျောက်ပါးစပ်ကျေးရွာ အနီးမှာ နှစ်ဖက်တိုက်ပွဲတွေ ဖြစ်ပွါးနေတာတွေ ရှိနေပြီး စစ်ကောင်စီက လေကြောင်းဗုံးကြဲတိုက်ခိုက်တာတွေကို ဆက်တိုက်လုပ်ဆောင်နေတာတွေ လည်း ရှိနေတယ်လို့ သိရပါတယ်။
