တိုက်ပွဲတစ်စုံတစ်ရာ ဖြစ်ပွားတာမရှိဘဲ စစ်အင်အားအကန့်အသတ်မရှိဖြည့်တင်း နေတဲ့ မာန်အောင်မှာ စက်သုံးဆီပြတ်လပ်နေတာကြောင့် ဖုန်းလိုင်း အင်တာနက်လိုင်းတွေ ပြတ်တောက်နေတယ်လို့ ဒေသခံတွေကပြောပါတယ်။
မာန်အောင်မြို့နယ်ဟာရခိုင်က မြို့နယ်တွေထဲက တိုက်ပွဲတစ်စုံတရာ ဖြစ်ပွားတာ မရှိသေးတဲ့မြို့နယ်တစ်ခုဖြစ်ပေမယ့် ရခိုင်တိုက်ပွဲစတင်ဖြစ်ပွားချိန်က တည်းကပင် စစ်ကောင်စီက သွားလာခွင့်တွေ နဲ့ ရိက္ခာသယ်ယူခွင့်တွေ အ ပြင် အစစအရာရာကို တားမြစ်ပိတ်ပင်ခံထားရတဲ့ မြို့နယ်တစ်ခုလည်းဖြစ်ပါတယ်။
အဲဒီလို အစစ အရာရာကို စစ်ကောင်စီက ပိတ်ပင်ခံထားရတာကြောင့် မြို့ နယ်အတွင်းမှာ စက်သုံးဆီတွေပြတ်လပ်ကာ အခုလို ဖုန်းလိုင်းအင်တာနက်လိုင်းတွေ ပြတ်တောက်နေရတာဖြစ်တယ်လို့ မာန်အောင်မြို့ခံတစ်ဦးကပြောပါတယ်။
"ဖုန်းလိုင်းတွေ မရတာက စက်သုံးဆီမရတာကြောင့်လို့ သိရတယ်။တာဝါတိုင်တွေမှာဖြည့်ဖို့ ဆီဝယ်မရတော့ တာဝါတိုင်တွေက မလည်ပတ်နိုင်တော့ဘူး။ဆိုလာစနစ်နဲ့ လည်ပတ်ဖို့ကလည်း မိုးရာသီဆိုတော့ လည်ပတ်နိုင်လောက်တဲ့အထိ ဆိုလာအားမရှိဘူးလို့"သူကပြောပါတယ်။မာန်အောင်မြို့နယ်အတွင်းမှာ ရှိတဲ့ ဖုန်းတာဝါတိုင်တွေဟာ ဖုန်းလိုင်း အင်တာနက်လိုင်းတွေ ရရှိနိုင်ဖို့အတွက် မီးစက်နဲ့ လည်ပတ်ရတာလည်းဖြစ်ပါတယ်။
ဒါ့အပြင်အခုလိုဖုန်းလိုင်းအင်တာနက်လိုင်းတွေ ပြတ်တောက်နေတာကြောင့် ပြည်သူတွေ အနေ နဲ့ ဆက်သွယ်ရေးပိုင်းတွေမှာ များစွာခက်ခဲကြုံနေကြရသလို၊စီးပွားရေး လုပ်ငန်းရှင်တွေအနေ နဲ့လည်း ငွေကြေးလွဲပြောင်းရေး ကိစ္စတွေမှာ အခက်အခဲတွေ နဲ့ ရင်ဆိုင်နေကြရတယ်လို့ မာန်အောင်ဒေသခံတစ်ဦးကပြောပါတယ်။
"ဒီရက်ပိုင်းပိုဆိုးတယ်။ဖုန်းတောင်ကောင်းကောင်းပြောမရဘူး။ငွေလွဲငွေထုတ်တွေလည်းထုတ်မရ လွဲမရတော့ တော်တော် အခက်အခဲဖြစ်နေတယ်။အကုန်လုံးနဲ့လည်း အဆက်အသွယ် ပြတ်နေတယ်လို့"သူကပြောပါတယ်။ဒါ့အပြင် စစ်ကောင်စီက ငါးဖမ်းခွင့်၊သွားလာခွင့်တွေကိုပါ နှစ်ရှည်လများ တားမြစ်ခံထားရတာကြောင့် ဒေသအတွင်းမှာ နေထိုင်ကြတဲ့ ပြည်သူတွေဟာလည်း စားဝတ်နေရေး အခက်အခဲများစွာနဲ့ ရင်ဆိုင်နေကြရတယ်လို့ ဆိုပါတယ်။
ဒါ့အပြင် မြို့ နယ်အတွင်းမှာ ဆေးဝါးပြတ်လပ်တာတွေကြောင့်လည်း ကျန်းမာရေး ဆိုင်ရာ ကိစ္စရပ်တွေအတွက်လည်း အခက်အခဲများစွာနဲ့ ရင်ဆိုင်နေရတယ်လို့ ဆိုပါတယ်။
အခုလို ပြည်သူတွေအတွက်အစစ အရာရာကိုပိတ်ပင်ခံထားရတဲ့ မာန်အောင်မြို့မှာ စစ်တပ်အတွက် ရိက္ခာသယ်ယူတာ နဲ့ စစ်အင်အားဖြည့်တင်းတာတွေကိုတော့ တံခါးမရှိ ဓားမရှိလုပ်ဆောင်တာတွေတော့ ရှိနေတယ်လို့လည်းဆိုပါတယ်။
