ရခိုင်တွေ ရဲ့ဘိုးဘွားပိုင်း နယ်မြေတွေကို တိုကခိုက်သိမ်းယူတာမလုပ်ဖို့ အင်္ဂါဂြိုက လာရောက်ပြောဆိုရင်လည်းရမှာမဟုတ်ဘဲ တိုက်ခိုက်သိမ်းယူသွားမှာ ဖြစ်တယ်လို့ ဧရာဝတီ သတင်းဌာန နဲ့ သီးသန့်အင်တာဗျူးတစ်ခုမှာ အာရက္ခတပ်တော် အေအေ ရဲ့ တပ်မှူးချုပ် ဗိုလ်ချုပ်ထွန်းမြတ်နိုင်က ပြတ်ပြတ်သားသားပြောဆိုလိုက်ပါတယ်။
ဘူးသီးတောင် နဲ့ မောင်တောဒေသတွေကိုအာရက္ခတပ်တော် ဝင်ရောက်လာတာကို မွတ်ဆလင်(ရိုဟင်ဂျာ)အရေးတက်ကြွလှုပ်ရှားသူတွေက လိုလားမှု မရှိတဲ့ အပေါ်မှာ အာရက္ခတပ်တော် အေအေရဲ့ တပ်မှူးချုပ် ဗိုလ်ချုပ်ထွန်းမြတ်နိုင်က အခုလို ပြတ်ပြတ်သားသား ပြောဆိုလိုက်တာလည်း ဖြစ်ပါတယ်။
“ဘူးသီးတောင်ကို အေအေ ဝင်လာတာကို သူတို့က လုံးဝမရှုစိမ့်ဘူး။မရှု့စိမ့်တာကတော့ သူတို့တွေရဲ့ အပိုင်းပါပဲ။ရခိုင်ပြည်မှာ လူတွေ နေလို့ ရပါတယ် ငြိမ်းငြိမ်းချမ်းချမ်း နဲ့ နေလို့ရပါတယ်။ဒါကလည်း ကျနော်တို့ ဘိုးဘွားပိုင်တဲ့နယ်မြေပဲ။ကျနော်တို့ကတော့ဘယ်သူ ဘာပြောပြောသိမ်းမှာပဲ။အင်္ဂါဂြိုကလာပြောရင်လည်း သိမ်းမှာပဲ။သိမ်းတာကတော့ မယုံမရှိနဲ့။ကာကွယ်ပေးသင့်သလိုမျိုး ကျနော်တို့ အစိုးရတရပ်အနေ နဲ့ ခံယူပြီးတော့လည်း ပြည်သူ တစ်ဦးတစ်ယောက်ချင်းစီကို မခွဲခြားပဲ ကူညီပေးခဲ့တာပဲလို့” သူကပြောဆိုလိုက်ပါတယ်။မွတ်ဆလင်(ရိုဟင်ဂျာ)အရေးတက်ကြွလှုပ်ရှားသူတွေဟာဘူးသီးတောင် နဲ့ မောင်တောမြို့နယ်တွေကို Safe Zone အဖြစ်သတ်မှတ်ပေးဖို့ လိုလားနေကြတာဖြစ်ပြီး အဲဒီလို လိုလားနေတဲ့ အပေါ်မှာ အခုလို ပြတ်ပြတ်သားသား ပြောဆိုလိုက်တာလည်း ဖြစ်ပါတယ်။
မွတ်ဆလင်(ရိုဟင်ဂျာ)အရေးတက်ကြွလှုပ်ရှားသူတွေဟာ မောင်တော့ နဲ့ ဘူးသီးတောင်မြို့ကို အာရက္ခတပ်တော် အေအေ က မြို့သိမ်းတိုက်ပွဲ စတင်ဆင်နွဲချိန်ကတည်းကပင် လူ့အခွင့်အရေး ရှုထောင့်မျိုးစုံကနေ အာရက္ခတပ်တော် အေအေကို တိုက်ခိုက်တာတွေကိုလည်း လုပ်ဆောင်ခဲ့ကြပါတယ်။
အဲဒါတွေ အပြင် ၂၀၂၄ ခုနှစ်၊ ဩဂုတ်လ ၅ ရက်နေ့ က ရခိုင်ပြည်မောင်တောမြို့ နတ်မြစ်ကမ်းခြေက နေ ဘင်္ဂလားဒေ့ရှ်နိုင်ငံဘက်ကို ထွက်ပြေးဖို့ လုပ်နေကြတဲ့ မွတ်ဆလင်တွေကို အာရက္ခတပ်တော်အေအေ က ဒရုန်းနဲ့ တိုက်ခိုက်ခဲ့တာကြောင့်မွတ်ဆလင် ၂၀၀ ထက်မနည်းသေဆုံးခဲ့ရတယ်လို့ အာရက္ခတပ်တော်အေအေ ကို စွပ်စွဲ ပြောဆိုတာတွေလည်း ရှိခဲ့ပါတယ်။
အာရက္ခတပ်တော် အေအေဟာ မွတ်ဆလင်တွေ ရဲ့ အကျင့်ကို သိတာကြောင့် ဘူးသီးတောင် နဲ့ မောင်တောမြို့ မြို့သိမ်းတိုက်ပွဲ တွေမှာ မြို့သိမ်းတိုက်ပွဲ မစတင်မှီ ပြည်သူတွေ အနေ နဲ့ ဘေးလွတ်ရာကို ထွက်ပြေးကြဖို့ ကို အေအေ အနေ နဲ့ အသိပေးစာ ထုတ်ပြန် တာတွေကိုလည်း အာရက္ခတပ်တော် အေအေ က ဆက်တိုက် လုပ်ဆောင်ခဲ့တာတွေကိုလည်း လုပ်ဆောင်ခဲ့ပါတယ်။
အဲဒီလို မြို့သိမ်းတိုက်ပွဲ ဆင်နွဲမယ့် ရက်တွေကို အေအေ အနေ နဲ့ ထုတ်ပြန်သတိပေးတာဟာ ရခိုင်ပြည်ထဲမှာ မောင်တော နဲ့ ဘူးသီးတောင် မြို့နယ် ၂ ခုသာ ရှိခဲ့ပြီး ကျန်ရှိတဲ့ မြို့နယ်တွေက မြို့သိမ်းတိုက်ပွဲတွေ မှာ မြို့သိမ်းတိုက်ပွဲ ဆင်နွဲမယ့် အကြောင်းကို သတင်းပေါက်ကြားမှာ စိုးရိမ်တဲ့ အတွက် ပြောဆိုခဲ့တာ မရှိခဲ့ဖူးဘူးလို့ လည်း အာရက္ခတပ်တော် တပ်မှူးချုပ်က ပြောဆိုပါတယ်။.
“ကျနော်တို့ ရခိုင်ရွာတွေမှာဆိုရင် မြို့တစ်မြို့ကို မတိုက်ခင် ကြိုပြီးတော့ မပြောဘူး။သတင်းပေါက်ကြားမှာစိုးလို့ တိုက်ခါနီးတော့မှပဲ မြန်မြန်ပြေးတော့ဆိုပြီးအဝတ်တစ်ထည်ကိုယ်တစ်ခု နဲ့ ပြေးရတာ များတယ်။မွတ်ဆလင်တွေ အများနေတဲ့ ဒေသတွေ မှာဆိုရင် အဲဒီလိုမျိုး အတင်းအကြပ်ရွှေ့ပြောင်းတယ် သေနတ်ပစ်ပြီးမှ စစ်ပွဲမှာ ပိတ်မိနေတယ်လို့ အပြစ်ဖော်ပြီးတိုက်ခိုက်မှာကိုစိုးရိမ်လို့ ကြိုပြီးမှာ အသိပေးတာအဲဒီ ၂ မြို့ပဲ ရှိတယ်။ကျနော်တို့ မြို့ပေါင်းများစွာကို တိုက်ခဲ့တယ် မတိုက်ခင်ထွက်ပြေးကြပါ ကျေးဇူးရှင်တော့ရယ်ဆိုပြီး ပြောခဲ့တာ အဲဒီ ၂ မြို့ပဲ ။ဘာဖြစ်လို့ လည်းဆိုတော့ သူတို့ အကြောင်းကို သိနေလို့ ”ဖြစ်တယ်လို့ ဆိုပါတယ်။အဲဒီလို ထုတ်ပြန်သိပေးချက်အပေါ်မှာ ဘယ်ကို ပြေးရမလဲဆိုတဲ့ မေးခွန်းတွေလည်း မွတ်ဆလင်(ရိုဟင်ဂျာ)အရေးတက်ကြွလှုပ်ရှားသူတွေကမေးမြန်းတာတွေ ရှိနေတဲ့အပေါ်မှာလည်း အာရက္ခတပ်တော် အေအေ တပ်မှူးချုပ်က အခုလို တုန့်ပြန်ပြောဆိုထားပါတယ်။
“ကျနော်တို့ တော်လှန်ရေးလုပ်တာ ရဲဘော်တွေမှာတောင်ဘောင်းဘီ ဖင်အပေါက် နဲ့ သေနတ်ပစ်တိုက်နေရတာ သူတို့ မှာခေါင်းအုံးတောင်မရှိဘူး။အဲဒီအချိန်မျိုးမှာ လူအခွင့်အရေးအရ ဘယ်ကိုရွှေ့ရမလဲ ဆိုတာက အသက်မသေတဲ့ နေရာကိုရွှေ့ရမှာပေါ့ဗျာ။အသက်လုပြီးပြေးပါ တိုက်ပွဲ မရှိတဲ့နေရာကို ရောက်တဲ့ နေရာမှာ ကျနော်တို့မှာ ရှိတဲ့ဟာ နဲ့ ဖြေရှင်းပေးပါမယ် ။ဆန်ရှိရင်ဆန်၊ရေမရှိရင်ရေ ကျန်းမာရေးမကောင်းရင် ဆေးကုပေးပါမယ်။အဲဒီမောင်တောတစ်ခုတည်းမဟုတ်ဘူး ကျန်တဲ့ မြို့တွေ မှာလည်းဒီပုံစံ နဲ့ဖြေရှင်းခဲ့ရတယ်။ဒီအပေါ်မှာတော့ ကျနော်တို့ အများကြီး အတိုက်အခံတွေနဲ့ ရင်ဆိုင်ခဲ့ရပါတယ်”လို့ ဆိုပါတယ်။ဒါ့အပြင် အာရက္ခတပ်တော် အေအေဟာ ဘူးသီးတောင် နဲ့ မောင်တောမြို့ တိုက်ပွဲတွေကြားမှာ ပိတ်မိနေတဲ့ စစ်ပွဲ ဧရိယာအတွင်းက မွတ်ဆလင် ၂၆,၀၀၀ ကျော်ကို လည်း ဘေးလွတ်ရာ နေရာတွေကိုကယ်ထုတ်ပေးခဲ့တာတွေ ရှိသလို လက်ရှိ ကျန်ရှိနေသေးတဲ့ မွတ်ဆလင်တွေကို အာရက္ခတပ်တော် အေအေ အနေ နဲ့ ကယ်ထုတ်နိုင်ဖို့ ကြိုးပမ်းနေတယ်လို့ ထုတ်ပြန်ပြောဆိုထားပါတယ်။
