ဂွမြို့နယ် အတွင်းက ရတနာမြိုင်(ကုလားပြင်)နဲ့ ကျွဲခြံကွင်းကျေးရွာတွေကစစ်ဘေးရှောင်ပြည်သူတွေကို စစ်ကောင်စီတပ်တွေ နဲ့ ကြံခိုင်ရေးပါတီဝင်တွေက ဧည့်စာရင်းဝင်ရောက်စစ်ဆေးတာတွေ လုပ်ဆောင်နေတယ်လို့ ဒေသခံသတင်းအရင်းအမြစ်တွေကပြောပါတယ်။
ပြီးခဲ့တဲ့ စက်တင်ဘာလ ၂ ရက်နေ့ ညမှာ စစ်ကောင်စီတပ်တွေ နဲ့ ကြ့ခိုင်ရေးပါတီဝင်တွေက ကျေးရွာ အတွင်းမှာ နေထိုင်ကြတဲ့ ပြည်သူတွေ နဲ့ သံတွဲမြို့နယ်အတွင်းက စစ်ဘေးရှောင်လာကြတဲ့ ပြည်သူတွေ အခုလိုဧည့်စာရင်းဝင်ရောက်စစ်ဆေးခဲ့တာ ဖြစ်တယ်လို့ ဒေသခံ တစ်ဦးကပြောပါတယ်။
“မနေ့က ကျွဲခြံကုန်းက ပြည်သူတွေ နဲ့ စစ်ဘေးရှောင်တွေကို စစ်ကောင်စီတပ်တွေ နဲ့ကြံခိုင်ရေးပါတီဝင်တွေက ဧည့်စာရင်းဝင်စစ်တယ်။ဖမ်းတာတော့မရှိဘူး။ဒါပေမယ့် လူတွေနာမည်စာရင်းတွေကိုတော့ မှတ်သွားတယ်လို့”သူကပြောပါတယ်။အဲဒီလို ဝင်ရောက် စစ်ဆေးတဲ့ အထဲမှာ ကြံခိုင်ရေး ပါတီဝင်တွေ ဖြစ်ကြတဲ့ အုပ်ချုပ်ရေးမှူး ဦးကိုသန်း ရဲ့သားဖြစ်သူ ရီမွန်ဌေး၊ငတာကြီး၊ ချစ်ဆန်းမောင်တို့က ဦးဆောင်ကာ ဝင်ရောက် စစ်ဆေးခဲ့တာ ဖြစ်တယ်လို့လည်း ဒေသခံ တွေ ကပြောပါတယ်။
ဒါ့အပြင် လက်ရှိမှာ အဲဒီ ကြံခိုင်ရေးပါတီဝင်တွေ နဲ့ စစ်ကောင်စီတပ်တွေဟာပြည့်သူစစ်ဖွဲ့ဖို့ အတွက် အခုလိုဧည့်စာရင်းဝင်ရောက်စစ်ဆေးနေတာ ဖြစ်တယ်ဆိုတဲ့ သတင်းတွေ ထွက်ပေါ်နေတာကြောင့် ဒေသခံတွေ အနေ နဲ့ စိုးရိမ်မှုတွေလည်းရှိနေရတယ်လို့ နောက်ထပ်ဒေသခံ တစ်ဦးကပြောပါတယ်။
“ကျနော်တို့ ကြားရသလောက် အဲဒီအဖွဲ့တွေက ပြည့်သူ့စစ်ဖွဲ့ဖို့ဆိုပြီး ပြန်လာတာလို့ သိထားရတယ်။အဲဒီ ရီမွန်ဌေး၊ငတာကြီး၊ ချစ်ဆန်းမောင် တို့ဟာ ရွာကထွက်ပြေးသွားတာကြာပြီ အခုမှ ပြန်လာကြတာ။သူ့တို့ မိသားစုတွေကတော့ ပြည်မဘက်မှာ ကျန်ခဲ့တယ်လို့ သိရတယ်လို့” သူကပြောပါတယ်။ပြီးခဲ့တဲ့ ရက်ပိုင်းကလည်း ဂွမြို့နယ် ရေကျော်ကျေးရွာကို စစ်ကောင်စီတပ်တွေ ဝင်ရောက်လာပြီး အဲဒီကျေးရွာ အတွင်းမှာစစ်ဘေးရှောင်ဖို့ရောက်နေကြတဲ့ သံတွဲမြို့နယ်၊ငပလီမြို့ ဂျိတ္တောရပ်ကွက်က စစ်ဘေးရှောင် အမျိုးသား ၁၂ ဦးကို စစ်ကောင်စီတပ်တွေက ကားနဲ့ဖမ်းဆီးကာခေါ်ဆောင်သွားခဲ့တာ ရှိခဲ့တယ်လို့လည်း ဒေသခံတွေပြောစကားတွေ အရ သိရပါတယ်။
