(စစ်ကောင်စီက လေကြောင်းပစ်ခတ်မှုတွေ ဆက်တိုက်လုပ်ဆောင်နေတယ်လို့ဆို)
ရခိုင်ပြည် ဂွမြို့နယ်၊ကျိန္တလီမြို့နယ်အထဲက ဆားချက်ကျေးရွာ နဲ့ ကိုင်းခုံကျေးရွာ အနီးတဝိုက်မှာ စစ်ကောင်စီတပ်တွေ နဲ့ အာရက္ခတပ်တော် အေအေတို့ ဒီနေ့ မနက် ၉ နာရီလောက်ကတည်းကပင် နှစ်ဖက်တိုက်ပွဲတွေ အပြင်းအထန်းဖြစ်ပွါးနေပြီး စစ်ကောင်စီက လေကြောင်းတိုက်ခိုက်တာတွေကို ဆက်တိုက်လုပ်ဆောင်တာတွေ ရှိနေတယ်လို့ ဒေသသတင်းအရင်းမြစ်တွေကပြောပါတယ်။
ဒီနေ့မနက် ၉ နာရီလောက်ကတည်းကပင် ဆားချက်ကျေးရွာ နဲ့ ကိုင်းခုံကျေးရွာ ကြားမှာ ရှိတဲ့ ဦးမောင်ညို နဲ့ ဦးလူလှ တို့ရဲ့ လယ်အနီးဝန်းကျင်မှာ စစ်ကောင်စီတပ်တွေ နဲ့ အာရက္ခတပ်တော် အေအေတို့ ဟာ တိုက်ပွဲ ဖြစ်ပွါးနေတာ ဖြစ်ပြီး မနက် ၁၁ နာရီလောက်မှာ စစ်ကောင်စီက လေကြောင်း ပစ်ခတ်တိုက်ခိုက်တာကို ဆက်တိုက်လုပ်ဆောင်ပေးနေတာ ဖြစ်တယ်လို့ အဲဒီကျေးရွာ အနီးမှာရှိတဲ့ ဒေသခံ တစ်ဦးကပြောပါတယ်။
“မနက် ၉ နာရီလောက်မှာ တိုက်ပွဲက စပြီးဖြစ်တာ။ ၁၁ နာရီလောက်မှာတော့ တိုက်ပွဲက ပိုပြီးပြင်းထန်လာတယ်။စစ်ကောင်စီကလည်းလေကြောင်းတိုက်ခိုက်တာကို ဆက်တိုက်လုပ်နေတယ်။အဲဒီနားမှာတိုက်ပွဲဖြစ်နေတာတော့ ကြာနေပြီး ဒီနေ့တော့ တော်တော်ပြင်းပြင်းထန်ထန်ဖြစ်နေတာ လို့ သိရတယ်။ကျမတို့ နေတဲ့ နေရာက လက်နက်သံတွေလည်း ဆက်တိုက်ကြားနေရတယ် လေယာဉ်တွေ ပျံပြီး ပစ်နေတာကိုလည်း မြင်နေရတယ်လို့ ” သူကပြောပါတယ်။လက်ရှိလေကြောင်း ပစ်ခတ်တိုက်ခိုက်မှုကြောင့် ဆားချက်ကျေးရွာ နဲ့ ကိုင်းခုံကျေးရွာ အနီးကို လက်နက်ကြီး ကျရောက်ပေါက်ကွဲတာတွေလည်း ရှိနေတယ်လို့သိရှိရပြီး ပြည်သူ ထိခိုက်မှု ရှိမရှိကိုတော့ မသိရဘူးလို့ နောက်ထပ် ဒေသသတင်းအရင်းအမြစ်တစ်ဦးကပြောပါတယ်။
“စစ်ကောင်စီတပ်တွေအဲဒီနားမှာ အင်အားတော်တော် ရှိတာ။ဒီဖက်က ရတနာမြိုင်(ကုလားပြင်)ကစစ်ကူတွေ ပို့တယ်။ဒီနေ့လေေကြောင်းတိုက်ခိုက်တာကတော့ ရွာတွေကိုလည်း ကျတယ်လို့ သိရတယ်။အသေးစိတ်ကတော့ မသိရသေးဘူး။ဘယ်သူမှာလည်း အပြင်မထွက်ရဲဘူး။ဒေသခံတွေကတော့ ရှိသေးတယ်။အကုန်ထွက်မှ မပြေးသေးတာလို့”သူကပြောပါတယ်။အာရက္ခတပ်တော် အေအေ နဲ့ စစ်ကောင်စီတပ်တို့ဟာ ပြီးခဲ့တဲ့ သြဂုတ်လ ၁၀ ရက်နေ့ကတည်းကပင် ဂွမြို့နယ်အတွင်း မှာရှိတဲ့ ကျိန္တလီမြို့မှာ နှစ်ဖက်တိုက် ပွဲတွေ အပြင်းအထန်ဖြစ်ပွားပြီးနောက် အာရက္ခတပ်တော်အေအေက ကျိန္တလီမြို့ကို သြဂုတ်လ ၁၃ ရက်နေ့မှာ ထိန်းချုပ်နိုင်ခဲ့တယ်လို့ ဒေသ သတင်းအရ င်းမြစ်တွေကအတည်ပြုပြောဆိုထားပါတယ်။
အဲဒီနောက် ကျိန္တလီမြို့နယ်အတွင်းက ထွက်ပြေးသွားတဲ့ စစ်ကောင်စီတပ်တွေကို အာရက္ခတပ်တော် အေအေက လိုက်လံရှင်းလင်းတိုက်ခိုက်တာတွေ လုပ်ဆောင်နေပြီး ကျိန္တလီ – ဂွ သွားရာလမ်းတစ်လျှောက်က နေရာတွေမှာ စစ်ကောင်စီတပ်တွေ နဲ့ အာရက္ခတပ်တော် အေအေ တို့ဟာ နှစ်ဖက်တိုက်ပွဲတွေ ဆက်လက်ဖြစ်ပွါးနေတာဖြစ်ပြီး စစ်ကောင်စီတပ်တွေကလည်း ကျိန္တလီမြို့ တစ်ခုလုံး အာရက္ခတပ်တော် လက်ထဲ မကျရောက် သွားရလေအောင် စစ်ကူ နဲ့ လက်နက်အင်အားတွေပို့ဆောင်ကာ ကြည်း၊ ရေ၊ လေ ပူးပေါင်းပြီး အပြင်းအထန် ခုခံတိုက်ခိုက်နေတာ လည်း ဖြစ်တယ်လို့ ဒေသ သတင်းအရင်းမြစ်တွေဆီက သိရပါတယ်။
