သံတွဲမြို့နယ် ၊ငပလီမြို့စစ်ကောင်စီအခြေစိုက် တပ်ရင်းတွေအပါအဝင် ရေတပ်စခန်းကိုပါ လက်လွတ်ဆုံးရှုံးလိုက်ရတဲ့ စစ်ကောင်စီဟာ သံတွဲမြို့ ကို အငြိုးအတေးတွေ နဲ့ လေကြောင်းတိုက်ခိုက်မှု လုပ်ဆောင်ခဲ့တာကြောင့် ဒေသခံပြည်သူ တစ်ဦးသေဆုံးကာ နေအိမ်တွေလည်း ပျက်စီးသွားခဲ့ရပြီး ဒဏ်ရာ ရရှိသူတွေ လည်း ရှိတယ်လို့သိရပါတယ်။
ပြီးခဲ့တဲ့ စက်တင်ဘာလ ၇ ရက်နေ့ ညမှာ ဒီစစ်ကောင်စီ လေကြောင်းကနေတဆင့် ဗုံး ၅ လုံးထက်မနည်း ကြဲချတိုက်ခိုက်ခဲ့တာ ရှိပြီး အဲဒီထဲက ဗုံးသီးတစ်လုံးဟာ သံတွဲမြို့ အံတော် ၈ ရပ်ကွက် ၇ လမ်း အတွင်းမှာ ရှိတဲ့ ကျောင်းဆရာ ဦးသိန်းဇံရဲ့ နေအိမ်အတွင်းကို ကျရောက်ပေါက်ကွဲခဲ့တာဖြစ်ပြီး ဦးသိန်းဇံမှာ ဗုံးစထိမှန်ကာ နေရာတွင်ပွဲချင်းပြီး သေဆုံးသွားခဲ့ရတယ်လို့ သံတွဲမြို့ နဲ့ အဆက်အသွယ် ရရှိသူ သံတွဲဒေသခံ တစ်ဦးကပြောပါတယ်။
“ဆရာကြီးကတော့ ပွဲချင်းပြီးသေသွားခဲ့ရတယ်လို့ သိရတယ်။ကျန်နေရာတွေကို ဗုံးသီးတွေ ကျတယ် ဒဏ်ရာ ရတာတွေ ရှိတယ်လို့ သိရတယ်။နေအိမ်တွေလည်း ပျက်စီးသွားတယ်လို့ သိရတယ် ။ဒဏ်ရာ ရတဲ့ သူတွေ စာရင်းကိုတော့ မသိရသေးဘူးလို့ ”သူကပြောပါတယ်။သေဆုံးသွားတဲ့ ကျောင်းဆရာ ဦးသံဇံဟာ ရမ်းဗြဲဇာတိဖြစ်ပြီး သံတွဲမြို့အတွင်းမှာ အိမ်ထောင်ကျနေသူ တစ်ဦးဖြစ်တယ်လို့လည်း သိရပါတယ်။
အာရက္ခတပ်တော် အေအေဟာ သံတွဲမြို့ နဲ့ ငပလီမြို့ မဇင်လေဆိပ်အပါအဝင် စစ်ကောင်စီတပ်ရင်းတွေကို ပြီးခဲ့တဲ့ ဇူလိုင် (၁၆) ရက်နေ့မှအပြီး သတ်ထိန်းချုပ်ထားနိုင်ခဲ့ပြီး လက်ကျန် ရေတပ်စခန်းတစ်ခုဖြစ်တဲ့ မောင်ရွှေလေး၊ကွင်းဝိုင်းရေတပ်စခန်းကို လည်း ပြီးခဲ့တဲ့ စက်တင်ဘာလ ၅ ရက်နေ့မှာအပြီးသတ်ထိန်းချုပ်နိုင်ခဲ့တယ်လို့ အေအေ ကထုတ်ပြန်ထားပါတယ်။
အဲဒီလို မြို့တစ်ခုလုံးကို လက်လွတ်လိုက်ရတဲ့ စစ်ကောင်စီဟာ တိုက်ပွဲဖြစ်ပွါးတာ မရှိတော့ဘဲ ပြည်သူတွေကိုအငြိုးအတေးထားကာ အခုလို လေကြောင်းကနေတဆင့် ဗုံးလာရောက်ကြဲချတိုက်ခိုက်ခဲ့တာ ဖြစ်တယ်လို့ သံတွဲ ဒေသခံ တစ်ဦးကပြောပါတယ်။
“ကျနော့်အမြင်ကတော့ မစားရတဲ့ အမဲသဲနဲ့ပက်တယ်လို့မြင်တယ်။သူတို့ က ပြည်သူတွေကိုသက်သက်လာသတ်တာ တိုက်ပွဲ ဖြစ်နေချိန်မှာ ကြဲတာကတော့ အော်ဒါက လာကျတာဆိုတာကို တွေးလို့ ရတယ် အခုဟာက တမင်သက်သက်လာပြီးပြည်သူတွေကို လုပ်တာ။ဒီလို လုပ်တာကတော့ မဖြစ်သင့်ဘူး ။ ဒီမှာ တစ်ခုတည်းလုပ်နေတာတော့ မဟုတ်ဘူး စစ်ကောင်စီက ကျန်တဲ့နေရာတွေမှာလည်း လုပ်နေတယ်။ဒီကိစ္စကိုတော့ နိုင်ငံ တကာက စစ်ကောင်စီကို တားသင့်တယ်လို့ သူကပြောပါတယ်။စစ်ကောင်စီဟာ ရခိုင်က သူတို့လက်လွတ်လိုက်ရတဲ့ မြို့နယ်တွေကို လက်နက်ကြီးတွေနဲ့ ရမ်းသမ်းပစ်ခတ်တာ၊လေကြောင်းတိုက်ခိုက်တာ စတာတွေကို ဆက်တိုက်ပြုလုပ်ကာ စစ်ရာဇဝတ်မှု ကျူးလွန်တာတွေ ရှိနေပါတယ်။
ပြီးခဲ့တဲ့ ၊ စက်တင်ဘာလ (၆) ရက်နေ့ကလည်း စစ်တွေမြို့မှာ ရှိတဲ့ စစ်ကောင်စီတပ်စခန်းတစ်ခုဖြစ်တဲ့ စစ်တွေ၊ အမှတ် (၁၂) ရဲတပ်ရင်း နဲ့ စစ်တွေ၊ ပွိင့်ရေတပ်စခန်းက ပေါက်တောမြို့ကို လက်နက်ကြီးတွေ နဲ့ ပစ်ခတ်တိုက်ခိုက်ခဲ့တာကြောင့် ပေါက်တောမြို့တွင်းက ကျေးရွာတွေကို လက်နက်ကြီးကျည်ကျရောက်ပေါက်ကွဲကာ လူနေအိမ်အချို ပျက်စီးခဲ့ ရသလို ဒေသခံတချို့ဟာလည်း ထိခိုက်ဒဏ်ရာ ရတာတွေ ရှိခဲ့ရပါတယ်။
