ဂွမြို့နယ်၊ကျိန္တလီမြို့အတွင်းမှာ ရှိတဲ့ ဂန့်ဂေါ်တောင်ဆည် အနီးမှာ စစ်ကောင်စီ နဲ့ အာရက္ခတပ်တော် အေအေတို့ဟာ နှစ်ဖက်တိုက်ပွဲတွေဆက် လက်ပြင်းထန်နေဆဲ ဖြစ်နေတယ်လို့ ဒေသခံတွေဆီက သိရပါတယ်။
စစ်ကောင်စီတပ်တွေ နဲ့ အာရက္ခတပ်တော် အေအေတို့ဟာ အဲဒီဂန့်ဂေါ်တောင် ဆည်အနီးမှာ ပြီးခဲ့တဲ့ စက်တင်ဘာလ ၄ ရက်နေ့ည ကတည်းကပင် တိုက်ပွဲတွေဖြစ်ပွါးနေတာ ဖြစ်ပြီး စစ်ကောင်စီက လက်နက်ကြီးပစ်ကူပေးတာ၊ဒရုန်းနဲ့တိုက်ခိုက်တာ စတာတွေကို ဒီနေ့မှာလည်း အဆက် မပြတ် လုပ်ဆောင်နေတယ်လို့ အဲဒီအနီးအနားမှာ ရှိတဲ့ ဒေသခံတစ်ဦးကပြောပါတယ်။
“တိုက်ပွဲကတော့ ပြင်းထန်နေတုန်းပါပဲ။ရတနာမြိုင်(ကုလားပြင်)ကလည်း လက်နက်ကြီးပစ်ကူတွေ ဆက်တိုက်ပေးနေတယ်။ဒီနေ့တော့ လေ ယာဉ် နဲ့လာတိုက်ခိုက်တာတော့ မရှိဘူး။ဒါပေမယ့် ဒရုန်း နဲ့တော့ တနေကုန်တိုက်ခိုက်တာ ရှိတယ်။ဒရုန်းနဲ့ တိုက်လို့ ကိုယ့်လူကိုထိတာလည်း ရှိတယ်လို့သိရတယ်လို့ ” သူကပြောပါတယ်။ပြီးခဲ့တဲ့ ရက်ပိုင်းတွေမှာ စစ်ကောင်စီက တိုက်ပွဲဖြစ်ပွါးရာနေရာတွေကို လေကြောင်းတိုက်ခိုက်မှုတာတွေ ဆက်တိုက်လုပ် ဆောင်ခဲ့တာ ရှိပြီး ဒီနေ့မှာ လေယာဉ်နဲ့ လာရောက်တိုက်ခိုက်တာ မဟုတ်တော့ပဲ ဒရုန်းတွေ နဲ့ သာ တိုက်ခိုက်တော့တာ ဖြစ်တယ်လို့လည်း အဲဒီဒေသခံကပြောပါတယ်။
ဒါ့အပြင် ပြီးခဲ့တဲ့ ရက်ပိုင်းက လေကြောင်းတိုက်ခိုက်မှု လုပ်ဆောင်တဲ့နေရာမှာ စစ်ကောင်စီတပ်သားတွေ ရှိရာနေရာတွေကို မှားယွင်းစွာဗုံးကြဲတိုက်ခိုက်ခဲ့တာကြောင့် စစ်ကောင်စီတပ်သားတွေ သေဆုံးတာရှိခဲ့တယ်လို့ ဒေသ သတင်းအရင်းအမြစ်တွေက ဆိုပါတယ်။
လက်ရှိမှာ စစ်ကောင်စီတပ်သားတွေဟာ တိုက်ပွဲ အတွင်းမှာ အကျအရှုံးများတာကြောင့် စစ်မတိုက်ရဲတော့ပဲ ထွက်ပြေးတာတွေရှိနေပြီး အဲဒီထွက်ပြေးနေတဲ့ စစ်ကောင်စီတပ်သားတွေကို ပြန်လည်ဖမ်းဆီးကာ တိုက်ပွဲ အတွင်းကို ပို့ဆောင်ရတာတွေ ရှိနေတယ်လို့ စစ်ရေးအခြေအနေသိသူ ဒေသခံ တစ်ဦးက ဆိုပါတယ်။
“စစ်ကောင်စီတပ်သားတွေက စစ်မတိုက်ရဲလို့ ထွက်ပြေးနေကြပြီး အဲတာကို သူတို့ ပြန်ဖမ်းပြီးတော့ စစ်မြေပြင်ကို ပို့နေရတယ်။စစ်ကောင်စီတပ်တွေက လက်နက်ကြီးပစ်ကူ လေကြောင်းပစ်ကူရှိလို့သာတိုက်နေကြရတာ။မဟုတ်ရင် ပြေးတာကြာနေပြီ လို့”သူကဆိုပါတယ်။အဲဒီတိုက်ပွဲဖြစ်နေတဲ့ နေရာကို ဂွအခြေစိုက် စစ်ကောင်စီတပ်ရင်းတစ်ခု ဖြစ်တဲ့ ခမရ – ၅၆၃ တပ်ရင်းက စစ်ကူပို့ပေးနေတာတွေလည်း ရှိနေ ဒဏ်ရာရ စစ်ကောင်စီတပ်သားတွေကို ရတနာမြိုင်(ကုလားပြင်)ကျေးရွာ အတွင်းမှာ ဆေးကုသပေးနေတာတွေလည်း ရှိနေတယ်လို့ဆိုပါတယ်။
အာရက္ခတပ်တော် အေအေ နဲ့ စစ်ကောင်စီတပ်တို့ဟာ ပြီးခဲ့တဲ့ သြဂုတ်လ ၁၀ ရက်နေ့ကတည်းကဂွမြို့နယ်အတွင်း မှာရှိတဲ့ ကျိန္တလီမြို့မှာ နှစ်ဖက်တိုက် ပွဲတွေ အပြင်းအထန်ဖြစ်ပွားပြီးနောက် အာရက္ခတပ်တော်အေအေက ကျိန္တလီမြို့ကို သြဂုတ်လ ၁၃ ရက်နေ့မှာ ထိန်းချုပ်နိုင်ခဲ့ပြီး ကျိန္တလီတစ်မြို့လုံးကို ထိန်းချုပ်နိုင်ဖို့အတွက် ဆက်လက်ထိုးစစ်ဆင်တိုက်ခိုက်နေတာလည်းဖြစ်ပါတယ်။
