တိုက်ပွဲကာလအတွင်းမှာအိမ်တွင်း သိမ်းဆည်းထားတဲ့ပစ္စည်း နဲ့ ဝှက်ထားတဲ့ ပစ္စည်းပျောက်ဆုံးပါက သက်ဆိုင်ရာနယ်မြေဒေသ အုပ်ချုပ်ရေးမှူးတွေထံမှာ တိတိကျကျ အကြောင်းကြားကာ တိုင်ကြားနိုင်တယ်လို့ အာရက္ခတပ်တော် အေအေက ပြည်သူတွေကို အသိပေးထုတ်ပြန်လာပါတယ်။
အာရက္ခတပ်တော် အေအေ နဲ့စစ်ကောင်စီတို့ နှစ်ဖက်တိုက်ပွဲ ဖြစ်ပွါးချိန်ကတည်းကပင် အာရက္ခဒေသမှာ ရှိကြတဲ့ ပြည်သူတွေဟာ မိမိတို့ အိမ်တွင်းရှိ ဆိုင်ကယ်၊ကား၊မီးခံသေတ္တာ အစရှိတဲ့ လေးလံပြီးရွှေ့ပြောင်းသယ်ယူဖို့ အဆင်မပြေတဲ့ပစ္စည်းတွေကို မိမိတို့ အိမ်တွင်းမှာ ဝှက်ထားခဲ့ရပြီး ရွှေငွေတချို့ဟာ ပျက်စီးယုံသာမကာ တိုက်ပွဲဖြစ်ပွါးနေချိန်အတွင်း ပျောက်ဆုံးခဲ့ရသလို တိုက်ပွဲ ဖြစ်ပွါးပြီး နောက်ပိုင်းတွေမှာလည်း ပျောက်ဆုံးမှု များစွာလည်း ရှိနေခဲ့ကြရပါတယ်။
အဲဒီပျောက်ဆုံးမှု အခြေအနေတွေကို ဒေသခံပြည်သူတွေ ရဲ့ တိုင်ကြားချက်အရ အာရက္ခတပ်တော်ရဲ့ ထောက်လှမ်းရေးအဖွဲ့က စုံးစမ်းထောက် လှမ်းမှုတွေပြုလုပ်ကာ ထိုက်ထန်တဲ့ အပြစ်ပေးအရေးယူဆောင်ရွက်မှုတွေ ပြုလုပ်ထားပြီး ဖြစ်သလို ခိုးယူထားတဲ့ ပစ္စည်းတွေကိုလည်း ပြန် လည်သိမ်းဆည်းကာ ပိုင်ရှင်အစစ်အမှန်ထံကို ပြနလည်ပေးအပ်ထားပြီးဖြစ်တယ်လို့ဆိုပါတယ်။ဒါ့အပြင် မပြီးပြတ်သေးတဲ့ပျောက်ဆုံးမှုတွေကိုလည်း ဆက်လက် စစ်ဆေးနေဆဲ ဖြစ်တယ်လို့ ဆိုပါတယ်။
အဲဒါကြောင့် မိဘပြည်သူများ အနေ နဲ့ တိုက်ပွဲ အတွင်းနဲ့ တိုက်ပွဲ ပြီးဆုံးချိန်အတွင်းမပျက်စီးပဲ ပျောက်ဆုံးနေတဲ့ ပစ္စည်းများ ရှိခဲ့ရင် သက် ဆိုင်ရာ ဒေသ၊ နယ်မြေ အုပ်ချုပ်ရေးမှူး တွေဆီကို မှန်မှန်ကန်ကန် သတင်းပေးတိုင်ကြားဖို့ကို အာရက္ခတပ်တော် အေအေက အခုလို တိုက်တွန်းထားပါတယ်။
“မိဘပြည်သူများအနေဖြင့် မိမိတို့၏ အဖိုးတန်ပစ္စည်းများ၊ ရွှေ၊ ငွေ၊ လက်ဝတ်ရတနာများသည် တိုက်ပွဲအတွင်း ရှာဖွေ၍မရအောင် ပျက်စီး ဆုံးရှုံးသွားခြင်းမျိုးမဟုတ်ဘဲ အိမ်တွင်သိမ်းဆည်းထားခဲ့ခြင်း၊ ဝှက်ထားခဲ့သောပစ္စည်းများကို တွေ့ရှိခြင်းမရှိပါက မိမိတို့၏ သက်ဆိုင်ရာ ဒေသ၊ နယ်မြေ အုပ်ချုပ်ရေးမှူး များထံတွင် မှန်မှန်ကန်ကန် သတင်းပေးပို့ကြစေလိုပါသည်။ သတင်းများပေးပို့ကြပါရန်ကိုလည်း တိုက်တွန်း အပ်ပါသည်”လို့ တိုက်တွန်းထားပါတယ်။
အာရက္ခပြည်သူ့တော်လှန်ရေးအစိုးရဟာ ပြည်သူ့လုံခြုံရေး နဲ့ တရားဥပဒေစိုးမိုးရေးအတွက် “Department of Law Enforcement and Public Security (DLEPS)” ပြည်သူ့လုံခြုံရေး နဲ့ တရားဥပဒေစိုးမိုးရေးဌာနကိုဖွဲ့စည်းကာ တပ်ဖွဲ့ဝင်အသစ်များကို ခေါ်ယူပြီး ဌာနကို တိုးချဲ့ဖွဲစည်းဆောင်ရွက်သွားဖို့လည်း ပြင်ဆင်နေတယ်လို့ ဆိုပါတယ်။
ဒါ့အပြင် ပြည်သူလူထုများနဲ့ ပူးပေါင်းကာ ပိုမိုလုံခြုံစိတ်ချရတဲ့ အနေအထားမျိုးကို ရရှိလာနိုင်ဖို့အတွက်လည်း ယခုထက် ပိုမို အားစိုက် လုပ်ဆောင်သွားမှာ ဖြစ်တယ်လို့ အေအေ ကပြောဆိုထားပါတယ်။
