ရခိုင်ပြည်နယ်၊စစ်တွေမြို့၊ရွှေပြားရပ်ကွက်၊မိဇံရပ်ကွက်၊အနောက်စံပြရပ်ကွက်က ဒေသခံအမျိုးသား ၈၀ ကျော်ကို မနေ့က စက်တင်ဘာ လ ၁၃ ရက်၊ညနေ ၄ နာရီအချိန်ခန့်က စစ်ကောင်စီက ဖမ်းဆီးခေါ်ဆောင်သွားတယ်လို့ သိရပါတယ်။
ဖမ်းဆီးခေါ်ဆောင်ခံရသူတွေကို ဧည့်စာရင်းစစ်မယ်လို့ဆိုကာ စစ်သားဝတ်စုံ၊နယ်ခြားစောင့်ဝတ်စုံ၊ရဲဝတ်စုံတွေဝတ်ဆင်ထားတဲ့ သူတွေက ကားတွေနဲ့ လာ ရာက်ဖမ်းဆီးသွားတာဖြစ်လို့ ဒေသခံတွေက ပြောပါတယ်။
"ညနေ ၃ နာရီ ၄နာရီ အချိန်က ဧည့်စာရင်းစစ်မယ်ဆိုပြီးတော့ ကားတွေနဲ့လာပြီးတော့ ခေါ်သွားပါတယ်။လူပေါင်း ၈၀ လောက်ပါသွား တယ်လို့ သိရပါတယ်။ဘယ်ကိုခေါ်သွားတယ်ဆိုတာက အတိအကျ မသိရဘူး"လို့သူက ပြောပါတယ်။ဖမ်းဆီးခေါ်ဆောင်ခံရသူတွေအထဲမှာ အသက်အရွယ်အပိုင်းအခြားလိုက် ဆယ်ကျော်သက်အရွယ်ကနေ အသက် ၄၀ ကျော်အရွယ်ထိ ပါဝင်ပြီး၊ဘယ်နေရာကို ခေါ်သွားလည်း ဆိုတာကို အတိအကျမသိရသေးဘူးလို့လည်းပြောပါတယ်။
နောက်ထပ်ဒေသခံတစ်ဦးက "Save the children ရုံးတွေကိုလည်း ဝင်ရောက်စစ်ဆေးသွားတယ်လို့သိရတယ်။မြောက်စံပြရွာက ပဆိတ်ပိုက်ကြတဲ့လူတွေ၊ဖဲကစားနေကြတဲ့ လူတွေကိုလည်း ဖမ်းဆီးသွားတယ်လို့သိရတယ်"လို့ပြောပါတယ်။ပြီးခဲ့တဲ့မေလအတွင်းကလည်း စစ်တွေဒေသခံ ၇၀၀ ကျော်ကို ဖမ်းဆီးခေါ်ဆောင်ခဲ့ပြီး ၃၀၀ ကျော်ကို ပြန်လွှတ်ကာ ၄၀၀ ကျော်ကို ပုဒ်မအမျိုးမျိုးတပ်ပြီး စစ်ကောင်စီရဲ့ တရားစွဲဆိုခြင်းကို ခံထားရပါတယ်။
ပြီးခဲ့တဲ့ မေလ ၂၉ ရက်နေ့ကနေ ဇွန်လ ၁ ရက်နေ့အထိ စစ်တွေမြို့နယ်၊ဗျိုင်းဖြူကျေးရွာက ဒေသခံ အမျိုးသား၊အမျိုးသမီး စုစုပေါင်း ၇၆ ဦးကို စစ်ကောင်စီက ဖမ်းဆီးသတ်ဖြတ်ခဲ့သလို ဒေသခံပြည်သူ၂၄၃ ကိုလည်း ပုဒ်မ အမျိုးမျိုးတပ်ကာ တရားစွဲဆိုပြီးနောက် အလုပ်ကြမ်းနဲ့ထောင်ဒဏ် ၃ နှစ်စီ ချမှတ်ခဲ့ပါတယ်။
ရခိုင်မှာစစ်ကောင်စီက တိုက်ပွဲကာလအတွင်းအကြောင်းအမျိုမျိုးပြပြီး အမျိုးသမီးနဲ့ အသက်မပြည့်သေးတဲ့ ကလေးများအပါအဝင် ဒေသခံ ထောင်နဲ့ချီပြီးဖမ်းဆီးခံထားရတာတွေလည်း ရှိနေပါတယ်။
သတင်း-သုတဇော်။
