မာန်အောင်မြို့နယ်၊မျှော်တော်ဦးရေတပ်စခန်းအပါအဝင် သူတို့တပ်စခန်းရှိရာနေရာတွေမှာ စစ်ကောင်စီတပ်တွေက မိုင်းထောင်တာတွေ ကို ဆက်တိုက် လုပ်ဆောင်နေတာတွေ ရှိနေတယ်လို့ ဒေသခံတွေဆီကသိရပါတယ်။
မာန်အောင်မှာမျှော်တော်ဦးရေတပ်စခန်း ၊ကမုံတောင် ခမရ (၃၄၄) ဆိုတဲ့ တပ်ရင်းတွေအပြင် မာန်အောင်မြို့ နယ်ရဲစခန်း၊သစ်ပုံရဲကင်းစခန်း၊ကမားရဲကင်းစခန်း နဲ့ ဆားချက်ရဲကင်းစခန်းဆိုပြီး စစ်ကောင်စီတပ်စခန်းတွေ ရှိပြီး အဲဒီတပ်စခန်းတွေမှာ စစ်ကောင်စီတပ်တွေက မိုင်းထောင်တာတွေကို ဆက်တိုက်လုပ်ဆောင်နေတာဖြစ်တယ်လို့ မာန်အောင်ဒေသခံတစ်ဦးကပြောပါတယ်။
“အခုမျှော်တော်ဦးရေတပ်ကိုဆိုရင်ခြံ နှစ်ထပ်ကာထားတယ်။ပြီးတော့ မိုင်းတွေထောင်ထားတယ်။ ကမုံတောင်တပ်အနီးကနေရာ တွေ လည်း ဒီအတိုင်းပဲ မိုင်းတွေတော်တော်ထောင်တာတွေ လုပ်နေတယ် ။နောက်ပြီးတော့ ရဲစခန်းတွေမှာလည်း ဒီအတိုင်းပါပဲ မိုင်းထောင်တာ တွေတော့ တော်တော်လုပ်ထားတယ်။ဘန်ကာတွေလည်းသေသေချာချာဆောက်ထားတာတွေ ရှိတယ်လို့ ”သူကပြောပါတယ်။အဲဒီလို မိုင်းထောင်တာတွေ အပြင် တစ်ဖက်ကလည်း မာန်အောင်ကျွန်းပတ်လည်က ပင်လယ်ပြင်မှာ စစ်ကောင်စီက ရေတပ်သင်္ဘော ၁၀ စီးထက်မနည်းဒီလအထဲမှာ အင်အားတိုးချ ထားတာတွေကိုလည်း စစ်ကောင်စီက လုပ်ဆောင်ထားတာတွေ ရှိနေတယ်လို့ ဒေသခံ တွေ ကပြောပါတယ်။
အဲဒီလို စစ်ကောင်စီတပ်တွေက သူတို့နေထိုင်ရာ တပ်စခန်းအနီးတွေမှာ မိုင်းထောင်တာတွေ ရှိနေတာကြောင့် ဒေသခံပြည်သူတွေမှာ စိုးရိမ်ကြောက်လန့်မှုတွေလည်း ရှိနေကြရတယ်လို့ နောက်ထပ် မာန်အောင်ဒေသခံ တစ်ဦးကပြောပါတယ်။
“စိုးရိမ်မှုတွေ ရှိလားဆိုတော့ စိုးရိမ်မှုတွေတော့ ရှိတာပေါ့ ကျနော်တို့က ဒီအနီးအနားမှာနေရတာ အခုသူတို့ ရှိတဲ့ နေရာတွေကိုဆိုရင် ကျနော်တို့ မသွားရဲဘူး သေနတ်တွေကိုင်ပြီးမြင်တော့ပိုကြောက်တယ်။ပြီးတော့ အခုသူတို့နေထိုင်တဲ့ နေရာနားတွေမှာ မိုင်းထောင်တာ တွေ ပြီးသွားရင် ကျန်တဲ့ နေရာတွေ မှာထောင်မလာနိူင်ဘူးလို့ မပြောနိုင်ဘူး။ဒီအတွက်လည်း ကျနော်တို့က စိုးရိမ်ရတယ်လို့” သူကပြောပါတယ်။မာန်အောင်မြို့နယ်ဟာ ရခိုင်မှာ တိုက်ပွဲဖြစ်ပွါးတာ စစ်ရေးတင်းမာတာတွေ မရှိပေမယ့် စစ်ကောင်စီကတော့ ရခိုင်တကျော့ပြန်တိုက်ပွဲ စတင်ချိန်ကတည်းကပင် စစ်ကောင်စီက တပ်အင်အားတိုးချဲ့တာ၊လက်နက်အင်အားတိုးချဲ့တာတွေ အပြင် ပြည်သူတွေ ဝင်ထွက်သွား လာမှု နဲ့ ငါးဖမ်းလုပ်ငန်း လုပ်ကိုင်ခွင့်တွေကို စစ်ကောင်စီက ပိတ်ထားခဲ့တဲ့ မြို့နယ် တစ်ခုလည်း ဖြစ်ပါတယ်။
အဲဒီလို စစ်ကောင်စီက ပိတ်ဆို့ထားတာကြောင့် ဒေသခံတွေဟာ ကုန်းဈေးနူန်းမြင့်တက်မှုဒဏ် နဲ့ စားဝတ်နေရေးခက်ခဲမှုဒဏ်တွေကို အပြင်းအထန်ရင်ဆိုင်နေရတဲ့ မြို့နယ် တစ်ခုလည်း ဖြစ်ပါတယ်။
CNA၊ လင်းသုတ။
