ဂွမှာ စစ်မတိုက်ရဲတော့လို့ ထွက်ပြေးနေတဲ့ စစ်ကောင်စီတပ်သားတွေကို စစ်တပ်က ပစ်ခတ်သတ်ဖြတ်တာတွေရှိနေ

ဂွမြို့နယ်အတွင်းက တိုက်ပွဲတွေမှာ စစ်မတိုက်ရဲလို့ ထွက်ပြေးနေတဲ့ စစ်ကောင်စီတပ်သားတွေကို စစ်ကောင်စီတပ်က ဖမ်းဆီးကာ သတ်ဖြတ်တာတွေ ရှိနေတယ်လို့ဒေသခံတွေကပြောပါတယ်။

ပြီးခဲ့တဲ့ စက်တင်ဘာလ ၁၆ ရက်နေ့က ဂွမြို့နယ် ကျိန္တလီမြို့ ဂန့်ဂေါ်တောင်ဆည်အနီးက တိုက်ပွဲမှာ စစ်မတိုက်ရဲလို့ ထွက်ပြေးလာတဲ့ စစ်ကောင်စီတပ် သား ၄ ဦးကို စစ်ကောင်စီတပ်တွေက လိုက်လံဖမ်းဆီးတဲ့နေရာမှာ သေနတ်နဲ့ ပစ်ခတ်ဖမ်းဆီးခဲ့တာဖြစ်တယ်လို့ စစ်တပ်နဲ့ နီးစပ်သူ တစ်ဦးကပြောပါတယ်။

“ပြီးခဲ့တဲ့ ရက်ပိုင်းတွေကတော့ တိုက်ပွဲတွေပြင်းပြင်းထန်ထန်ဖြစ်ခဲ့တယ်။ဒီရက်ပိုင်းတော တိုက်ပွဲငြိမ်နေတယ်။အဲဒါ စစ်မတိုက်ချင်တော့လို့ ထွက် ပြေးလာတဲ့ စစ်ကောင်စီတပ်သား ၄ ဦးကို လိုက်ဖမ်းတာ သေနတ်နဲ့ ပစ်ပြီးတော့ ဖမ်းတယ်။ဖမ်းမိတာကတော့ ကုလားပြင်တံတားထိပ်မှာဖမ်းမိတာ။သေနတ် နဲ့ ပစ်ဖမ်းတော့ ၃ ဦးကတော့ ပွဲချင်းပြီးသေတယ်။နောက်တစ်ယောက်ကတော့ အရှင်ဖမ်းလို့ရပြီးတော့ ကုလားပြင်(ရတနာမြိုင်) ရဲစခန်းမှာ ပစ်သတ်လိုက်တာလို့ သိရတယ်လို့”သူကပြောပါတယ်။

အဲဒီသေဆုံးသွားတဲ့ စစ်ကောင်စီတပ်သားတွေရဲ့ အလောင်းကိုတော့ စက်တင်ဘာလ ၁၇ ရက်နေ့မှာ ကုလားပြင်(ရတနာမြိုင်)ကျေးရွာသုသန်မှာ မြေမြုပ်သင်္ဂြိုတာတွေ လုပ်ဆောင်ခဲ့တယ်လို့ အဲဒီစစ်တပ်နဲ့ နီးစပ်တဲ့ သတင်းအရင်းအမြစ်ကပြောပါတယ်။

စက်တင်ဘာလ ၄ ရက်နေ့ကလည်း ဂန့်ဂေါ်တောင်ဆည်တိုက်ပွဲပြင်းထန်နေချိန်မှာ စစ်ကောင်စီတပ်သားတွေထွက်ပြေးတာရှိခဲ့တာကြောင့် အဲဒီ ထွက်ပြေးနေတဲ့ စစ်ကောင်စီတပ်သားတွေကို စစ်ကောင်စီတပ်တွေက ပြန်လည်ဖမ်းဆီးအကျဉ်းချထားရတဲ့ တပ်ဖွဲ့ဝင်တွေလည်း များစွာ ရှိတယ် လို့ အဲဒီစစ်ကောင်စီတပ်တွေ နဲ့ နီစပ်သူတွေကပြောပါတယ်။

“အကျဉ်းချထားရတဲ့ စစ်ကောင်စီတပ်သားတွေလည်း အများကြီးရှိတယ်။ဒီရက်ပိုင်းမှာ အေအေတိုက်ပွဲဖြစ်တာ မရှိပေမယ့် စစ်ကောင်စီကတော့ လေနက်ငယ်တွေ ပစ်ခတ်တာ လက်နက်ကြီးတွေ ပစ်ခတ်တာတွေကို ခဏခဏလုပ်နေတာတွေတော့ ရှိတယ်။စစ်ကောင်စီတပ်သားတွေက အေအေ နဲ့ထိပ်တိုက် တိုက်ခိုက်ရမှာကိုလည်း တော်တော်ကြောက်နေတဲ့ အနေအထားမှာ ရှိနေပြီလို့တော့ ကျနော်မြင်တယ်လို့”သူကပြောပါတယ်။

အာရက္ခတပ်တော်အေအေ ဟာ ရခိုင်တကျော့ပြန်တိုက်ပွဲ အတွင်းမှာ ရခိုင်က မြို့ကြီး တွေ ဖြစ်ကြတဲ့ မင်းပြား၊ မြောက်ဦး၊ ကျောက်တော်၊ မြေပုံ၊ ပုဏ္ဏားကျွန်း၊ ရမ်းဗြဲ၊ ရသေ့တောင်၊ ဘူးသီးတောင်၊ သံတွဲမြိုတွေအပြင် ပလက်ဝဒေသကိုပါ အပြီးသတ်သိမ်းပိုက်ထားနိုင်ပြီးဖြစ် ပါတယ်။

အဲဒီနောက် သိမ်းပိုက်ဖို့ ကျန်ရှိနေသေးတဲ့ မောင်တောမြို့ အပါအဝင် တောင်ကုတ်၊ ကျိန္တလီ၊ ဂွ၊ အမ်း၊ စစ်တွေ၊ ကျောက်ဖြူ၊ မာန်အောင်မြို့တွေကိုပါ အပြီးသတ်သိမ်းပိုက်နိုင်ဖို့အတွက် ဆက်လက်ထိုးစစ်ဆင်တိုက်ခိုက်သွားမယ်လို့ အေအေက ထုတ်ပြန်ပြောဆိုထားပါတယ်။

CNA၊ဂူးဂူး။