သံတွဲမြို့နယ်အတွင်းက ပေါက်တူးကျေးရွာကို စစ်ကောင်စီက ပြီးခဲ့တဲ့ စက်တင်ဘာလ ၁၆ ရက်နေ့ နေ့လယ် ၃ နာရီလောက်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦးသေဆုံးခဲ့ရပြီး ၉ ဦးဒဏ်ရာရရှိခဲ့ရတယ်လို့ ဒေသခံသတင်းအရင်းအမြစ်တွေဆီက သိရပါတယ်။
အဲဒီလို စစ်ကောင်စီကလေကြောင်းတိုက်ခိုက်မှုကြောင့် သေဆုံးခဲ့ရတဲ့သူ ၂ဦးကတော့ အသက် ၃၂ နှစ်အရွယ် ကိုအောင်ဆန်းဦးနဲ့ အသက် ၉၃ နှစ်အရွယ် ဒေါ်သိန်းကြွယ်တို့ ဖြစ်ကြပြီး ဒဏ်ရာရရှိသူတွေကတော့ အသက် ၂၂ နှစ်အရွယ်ကိုအောင်လှဖြူ၊ ဒေါ်အေးပုံ၊ ဒေါ်ရီနှင်းစီ၊ ဦးတင်လှမောင်၊မောင်ဖြိုးမင်းအောင်၊ မစုမွန်ကျော်၊ မဆောင်းသဇင်ဦး၊မောင်မင်းခန့်ကျော် နဲ့ နောက်ထပ် ဒေသခံ(အမည်မသိရသေး)တို့ ဖြစ်ကြတယ်လို့ ဆိုပါတယ်။
“စစ်ကောင်စီက ၁၆ ရက်နေ့ နေ့လယ် ၃ နာရီမှာ လေကြောင်းက ဗုံး ၂ကြိမ်လာကြဲတာပါ။နှစ်ကြိမ်ဗုံးကြဲတဲ့ အထဲမှာ ဗုံးအလုံးရေ ၂၆ လုံးလောက်တော့ကြဲခဲ့တယ်။ရွာထဲကိုမိုးရွာသလို ရွာတယ်။သေဆုံးသွားတဲ့ ကိုအောင်ဆန်းဦးမှာဆို လသားအရွယ် ခလေးနဲ့ မိန်းမကျန်ခဲ့တယ် ကိုအောင်လှဖြူက ခြေထောက်နှစ်ဖက်လုံးပြတ်ထွက်သွားတယ်။ရွာမှာနေအိမ်တွေလည်းတော်တော် ပျက်စီးသွားတယ်။ဘာတိုက်ပွဲမှ မရှိဘူး ဒီအတိုင်းလာကြဲတာ ဖြစ်တယ် ။ကျန်တဲ့သူတွေလည်း ဒဏ်ရာ ပြင်းပြင်းထန်ထန်ရတယ်လို့”သူကပြောပါတယ်။
အဲဒီပေါက်တူးကျေးရွာဟာ သံတွဲမြို့ နဲ့ မိုင် ၂၀ ခန့်အကွာမှာ ရှိတဲ့ကျေးရွာတစ်ခုဖြစ်ပြီး သံတွဲမြို့က ပြည်သူအများစု စစ်ဘေးရှောင်နေကြတဲ့ ကျေးရွာတစ်ရွာလည်း ဖြစ်တယ်လို့ အဲဒီဒေသသတင်းအရင်းမြစ်တွေကပြောပါတယ်။
အဲဒီကျေးရွာကို ပြီးခဲ့တဲ့လပိုင်းက စစ်ဘေးရှောင်တွေစားဝတ်နေရေး အတွက် အလှူရှင်တွေက လာရောက်ကာ ဆန်နဲ့ စားနပ်ရိက္ခာလှူဒါန်းတာတွေ ရှိခဲ့တယ်လို့ဆိုပါတယ်။
အဲဒီနောက်မှာ အလှူရှင်တွေက ကျေးရွာအတွင်းက နေရာတချို့နဲ့ စစ်ဘေးရှောင်တွေရဲ့ပုံတွေကို လိုင်းပေါ်မှာ အများအပြားတင်ခဲ့တာရှိခဲ့ပြီးနောက်ပိုင်းမှာ စစ်ကောင်စီကခုလို လေကြောင်းတိုက်ခိုက်တာကို လာရောက်လုပ်ဆောင် ခဲ့တာဖြစ်တယ်လို့လည်း စစ်ဘေးရှောင်အရေး ကူညီပေးနေသူတွေကလည်း သုံးသပ်ပြောဆိုမှုတွေလည်း ရှိကြပါတယ်။
သံတွဲမြို့နယ်အတွင်းက စစ်ဘေးရှောင်အရေးကူညီပေးနေသူ တစ်ဦးက “ပြီးခဲ့တဲ့ လပိုင်းတွေက အလှူရှင်တွေ ရောက်တော့ ပုံတွေ တော်တော် များများတင်ကြတယ်။အဲဒီနောက်မှာ ကျနော်တို့လည်းစိုးရိမ်နေတယ် ပြန်ဖျက်ခိုင်းလို့ ရတာတွေကို ပြန်ဖျက်ခိုင်းတယ်။ဒါပေမယ့် အချိန်ကမမှီလိုက်ဘူး အဲဒီနောက်မှာ အခုလို စစ်ကောင်စီက လာဗုံးကြဲတာ။လူတွေ အများကြီးရှိနေတယ်ဆိုတဲ့ နေရာကို သိသွားလို့ အခုလို လာကြဲတာ။အဲဒါကြောင့် ကျနော်တို့ အနေ နဲ့ကစစ်ဘေးရှောင်တွေကိုလာလှူတာကို ကျေးဇူးတင်တယ်။လာလှူတဲ့အခါမှာ ပြည်သူ့လုံခြုံရေးကို အလေးပေးပါလို့ မေတ္တာရပ်ခံချင်တယ် ”လို့ သူကတောင်းဆိုပါတယ်။
အဲဒါကြောင့် သံတွဲမြို့တွင်းက စစ်ဘေးရှောင်ပြည်သူတွေကို လာရောက်လှူးဒါန်းကြတဲ့ နေရာတွေမှာ မှတ်တမ်းတင်ပုံတွေကို လိုင်းပေါ်မှာ အဆ မတန် တင်တွေတွေ မလုပ်ပဲ မှတ်တမ်းအရသာ အဖွဲ့အစည်း၊လူပုဂ္ဂိုတွေ အနေနဲ့ သိမ်းဆည်းထားတာတွေမျိုးကို လုပ်ဆောင်ဖို့ လိုအပ်နေတယ် လို့သံတွဲမြို့ စစ်ဘေးရှောင်အရေးကူညီနေသူတွေက အထူးမေတ္တာရပ်ခံတဲ့ အနေနဲ့တောင်းဆိုတယ်လို့လည်းပြောပါတယ်။
စစ်ကောင်စီဟာ သံတွဲမြို့တစ်ခုလုံးကို လက်လွတ်ဆုံးရှုံးလိုက်ရပြီးတဲ့ နောက်ပိုင်းမှာ သံတွဲမြို့ကို လေကြောင်းတိုက်ခိုက်တာ မကြာခဏ လုပ်ဆောင် နေတာကြောင့် ပြည်သူတွေလည်း များစွာ ထိခိုက်သေဆုံးမှုတွေ ရှိနေရပါတယ်။
CNA၊မြတ်သူ။
