အာရက္ခဒေသအတွင်းမှာ နိုင်ငံခြားထုတ် နဲ့ ပြည်မထုတ် အရက်၊ဘီယာ၊ဝိုင် အပါအဝင်ယစ်မျိုးကုန် မှန်သမျှကို တင်သွင်းရောင်းချတာ မလုပ်ရဘူးလို့ ရက္ခိုင်အမျိုးသား အဖွဲ့ချုပ်( ULA) ဗဟိုဌာနရုံးချုပ် အတွင်းဝန်ရုံးက စက်တင်ဘာလ ၁၉ ရက်နေ့မှာ တားမြစ်ကန့်သတ်ထုတ်ပြန်လိုက်ပါတယ်။
ထုတ်ပြန်ချက်ထဲမှာ အာရက္ခဒေသအတွင်းသို့ ပြည်ပကဝင်ရောက်နေတဲ့ နိုင်ငံခြားထုတ်ကုန် ပြည်မထုတ်ကုန်အရက်၊ဘီယာ၊ဝိုင် အပါအဝင်ယစ် မျိုးကုန်မှန်သမျှကို အခုစက်တင်ဘာလ ၁၉ ရက်နေ့က စပြီး တင်သွင်းခွင့်မပြုလုပ်ရတော့ဘူးလို့ ဆိုပါတယ်။
လက်ရှိစီးပွါးရေး လုပ်ငန်းရှင်တွေ အနေနဲ့ တင်သွင်းထားပြီး ဖြစ်တဲ့ နိုင်ငံခြားထုတ်ကုန်၊ပြည်မထုတ်ကုန် အရက်၊ဘီယာ၊ဝိုင် နဲ့ ယစ်မျိုးကုန်တွေကိုလည်း စက်တင်ဘာလ ၁၉ ရက်နေ့ ကနေ ၃ လအတွင်းမှာ အပြီးသတ်ကုန်အောင်ရောင်းချကြရမှာ ဖြစ်တယ်လို့လည်း ထုတ်ပြန်ချက် မှာ ဖော်ပြထားပါတယ်။
အဲဒီလို ကန့်သတ်တားမြစ်တာကို ဖောက်ဖျက်ကျူးလွန်ပြီး တင်သွင်းတာတွေလုပ်ဆောင်ခဲ့ရင်လည်း ထိရောက်စွာ အရေးယူဆောင်ရွက်သွားမယ်လို့လည်း သတိပေးပြောဆိုထားပါတယ်။
အာရက္ခတပ်တော် ထိန်းချုပ်မြို့တွေထဲက မြို့နယ် တစ်ခု ဖြစ်တဲ့ ရမ်းဗြဲမြို့မှာတော့“လက်ရှိ ၃လ အချိန်ပေးထားတယ်လို့သိရတယ်။မနေ့ကမှထုတ်ပြန်တယ်ဆိုတော့ ဘာမှတော့ မလုပ်ကြသေးဘူး။ပုံမှန်အတိုင်း အရောင်းအဝယ်တွေကတော့ ရှိနေဆဲပဲ။ ၃လပြည့်အောင်တော့ စောင့်ကြည့်ရမှာ။ဒီကိစ္စက လတ်တလောကြီးလုပ်မယ်ဆိုတာကတော့မလွယ်ဘူးလို့ မြင်မိတယ်လို့ ” သူကပြောပါတယ်။
အာရက္ခတပ်တော် အေအေ ဟာ ယခင်ကတည်းကပင် ပြည်မထုတ် အရက် ၊ဘီယာတွေကို ဝယ်ယူသောက်သုံးတာ နဲ့ ရောင်းချတာမလုပ်ကြဖို့ ရခိုင်မှာ တိုက်တွန်းမှုတွေ လုပ်ဆောင်ခဲ့တာတွေလည်းရှိခဲ့ပါတယ်။
ဒါပေမယ့် ထိရောက်စွာ အရေးယူဆောင်ရွက်မှုတွေမရှိခဲ့တာကြောင့် ဒေသအတွင်းမှာ ပြည်မထုတ်အရက် ၊ဘီယာတွေ နဲ့ နိုင်ငံခြားထုတ် အရက်တွေဟာ ပျံ့နှံ့နေဆဲဖြစ်ပြီး လက်ရှိကန့်သတ်ချက်ဟာလည်း ထိရောက်စွာ လုပ်ဆောင်နိုင်တာမရှိဘူးဆိုရင် အခြေအနေက သိပ်ထူးခြားလာမှာ မဟုတ်ဘူးလို့ ကျောက်ဖြူဒေသခံ တစ်ဦးကပြောပါတယ်။
“ကျနော်တို့ကတော စကစလက်အောက်မှာ ရှိသေးတဲ့မြို့ဆိုတော့ ပြောစရာမလိုအောင်ကိုရောင်းဝယ်နေကြတာ။အပေါဆုံးက စကစထုတ်အရ က်ဘီယာတွေပါပဲ။လူတွေကလည်း အိမ်မှာ စားစရာဆန်တွေသာမရှိတာ အရက်သောက်မဲ့ဟာတွေဆိုရင်ရှိကြတယ်။ဒီကိစ္စကိုသာ အေအေက သေချာ ကိုင်တွယ်နိုင်မယ်ဆိုရင်တော့ တော်တော် အဆင်ပြေသွားမယ်လို့မြင်တယ်လို့”သူကပြောပါတယ်။
မြန်မာနိုင်ငံအတွင်းမှာ စစ်ကောင်စီက အာဏာသိမ်းပြီးနောက်ပိုင်းမှာ စစ်တပ်ထုတ်ကုန်တွေထဲက မြန်မာဘီယာ ၊ Andaman Gold တံဆိပ် အရက်၊ ဘီယာ၊ အချိုရည်၊ Dagon တံဆိပ် အရက်၊ ဘီယာ၊ အချိုရည်၊ မန္တလေး ဘီယာနဲ့ ရမ်၊ Black Shield ဘီယာ၊ အာမီရမ်၊ Red Ruby စီးကရက်နဲ့ Premium Gold စီးကရက်တွေကို ပြည်သူတွေ အနေ နဲ့ ဝယ်ယူသုံးစွဲတာ နဲ့ ရောင်းချတာတွေ မလုပ်ကြဖို့ မသုံးစွဲကြဖို့ တော်လှန်ရေး အင်အားစုတွေက တိုက်တွန်းနေတာတွေလည်းရှိကြပါတယ်။
