လျှပ်စစ်မီးတွေ မရတော့တဲ့အတွက် မြောက်ဦးမြို့ကရပ်ကွက်၊ကျေးရွာတွေမှာ ရေနံဆီ သံပုံးမီးတွေ ပြန်သုံးနေကြရပါတယ်။
အောင်မင်္ဂလာရပ်ကွက်၊ရတနာပုံရပ်ကွက်၊ဆင်ချဆိပ်ရွာသစ်၊ဘီလူးကန်ရပ်ကွက်၊ဒိုင်းဂျီရပ်ကွက်စတဲ့ရပ်ကွက်တွေမှာ အသုံးများနေကြတယ်လို့ သိရပါတယ်။
လျှပ်စစ်မီးတွေ မရတော့တဲ့အခါမီးထွန်းဖို့အတွက် ဆော်လာပြားနဲ့ဘတ်ထရီအိုးတွေဟာလည်း စျေးအဆမတန်ကြီးတဲ့အတွက် အခုလို ဆီပုံးတွေကို အသုံးပြုနေကြရတာလည်းဖြစ်ပါတယ်။
TaTa ဆိုလာပြား ၅၀ ဝပ် ၁ ချပ်ကို ၂ သိန်းကျော်အထိရှိပြီး၊ဆိုင်ကယ်မှာ အသုံးပြုတဲ့ ဘတ်တရီအိုးငယ် တစ်လုံးကို ၁ သိန်းခွဲ၊ ၈၀ ဗို့အားရှိတဲ့ ဘတ်တရီအိုးတစ်လုံးကို ၄ သိန်းကျော်အထိ ရှိတယ်လို့ သိရပါတယ်။
မြောက်ဦးမြို့ပေါ်က ချမ်းသာတဲ့ မိသားစုတွေမှာတော့ ဆိုလာပြားတွေ ဘတ်ထရီအိုးတွေ ဝယ်ကာ မီးထွန်းနိုင်ကြပြီး၊ဆင်းရဲကျပ်တည်းတဲ့ ပြည်သူတွေမှာတော့ အခုလို ဆီပုံးတွေကို အသုံးပြုနေကြရတာလည်း ဖြစ်တယ်လို့ ဆီပုံးအသုံးပြုတစ်ဦးကပြောပါတယ်။
“ဆိုလာပြားတွေ ဘတ်ထရီအိုးတွေ ဝယ်နိုင်တဲ့သူတွေကတော့ အဆင်ပြေတာပေါ့နော်။မဝယ်နိုင်တဲ့သူတွေမှာတော့ ဖယောင်းတိုင်စျေးကလည်းကြီးတော့ အရင်တုန်းက အဖိုးအဘွားတွေ အသုံးပြုခဲ့တဲ့ ဆီပုံးတွေကိုပဲ အသုံးပြုနေကြရပါတယ်”လို့ သူကပြောပါတယ်။
သံပုံးအခွံတွေမှာ ရေနံဆီအနည်းငယ်ထည့်ပြီး၊ မီးစာအဖြစ် အထည်စတွေကို အသုံးပြုရတာဖြစ်ပါတယ်။
မြောက်ဦးမြို့ပေါ်မှာ ရေနံဆီ တစ်လီတာကို တစ်သောင်းကျပ်ရှိပြီး ရေနီဆီ တစ်လီတာဆိုရင် ဆီပုံးအတွက် လခွဲလောက် အသုံးပြုရတယ်လို့ မြောက်ဦးမြို့က ဆီပုံးအသုံးပြုသူတွေက ပြောပါတယ်။
“ဟိုး အဘိုးအဘွား အရွယ်တုန်းကခေတ်ကို ပြန်ရောက်သလို ဖြစ်သွားတာပေါ့။ညတစ်ညအတွက်ဆီပုံးတွေ ထွန်းကာ နေနေကြရတယ်။ဆီပုံးကိုက သံပုံးထဲမှာ ရေနံဆီအနည်းငယ်ထည့် မီးစာအဖြစ် အဝတ်စကို ထည့်ပြီး မီးထွန်းရတာပေါ့”လို့ ပြောပါတယ်။
လျှပ်စစ်မီးတွေ မရတဲ့အခါ ပြည်မထွက်မီးတိုင်တွေကိုအသုံးပြုနေကြပေမယ့် ဈေးအဆမတန်ကြီးနေတာကြောင့် မီးတိုင်စျေးတွေ စျေးကြီးတဲ့အတွက် ဆီပုံးခွံတွေနဲ့ အသုံးပြုနေကြရပါတယ်။
ရခိုင်ပြည်နယ်အတွင်းမှာ တိုက်ပွဲတွေကြောင့် ကုန်သွယ်စီးဆင်းမှုမှာ ပိတ်ဆို့လာနေပြီး၊ကုန်စျေးနှုန်းတွေ အဆမတန်ကြီးမားနေသလို ပြည်သူတွေမှာလည်း စီးပွားရေးတွေ ပိတ်ဆို့နေတဲ့အတွက် အခုလို အခက်အခဲ ဖြစ်ပေါ်နေကြတာလည်း ဖြစ်ပါတယ်။
သုတဇော်
