တောင်ကုတ်မြို့ တန်းလွဲရွာမ နဲ့ ကျောက်ဆိပ်ရွာကို စစ်ကောင်စီက မနေ့ကစက်တင်ဘာလ ၂၄ ရက်နေ့ ညနေ ၇ နာရီ ၄၀ မိနစ်မှာ လေကြောင်းက နေတဆင့် ဂျက်ဖိုက်တာတစ်စီး နဲ့ ၂ ကြိမ်တိုင်တိုင် ဗုံးကြဲခိုက်တိုက်ခဲ့တာကြောင့် ဒေသခံ ၂ ဦးသေဆုံးကာ ၃ ဦးထက် မနည်းဟာ လည်း အပြင်းအထန်ဒဏ်ရာ ရရှိခဲ့တယ်လို့ ကနဦး သတင်းတွေ အရ သိရပါတယ်။
“ဗုံးက ရွာမရဲစခန်းကို တစ်လုံးကျတယ်။နောက်ရွာမ နဲ့ တစ်ဖက်တစ်ကမ်းမှာ ရှိတဲ့ ကျောက်ဆိပ်ရွာကို တစ်လုံးကျတယ်။ သေတာ ကတော့ ကလေးတစ်ယောက် နဲ့ လူကြီးတစ်ယောက်သေတယ်။နောက် ၃ ဦးထက်မနည်းလည်းဒဏ်ရာရတယ်။အဆောက် အဦးတွေလည်း တော်တော် ပျက်စီးသွားတယ်လို့ ” တောင်ကုတ်ဒေသခံ တစ်ဦးကပြောပါတယ်။
လက်ရှိမှာ အဲဒီရွာမ နဲ့ ကျောက်ဆိပ်အနီးတဝိုက်ကို စစ်ကောင်စီက ဖုန်းလိုင်းအင်တာနက် လိုင်းတွေက ဖြတ်တောက်ထားတယ်လို့ လည်း ေးသခံတွေကပြောပါတယ်။
အဲဒီဗုံးကြဲခံရတဲ့ တန်းလွဲရွာမ နဲ့ တောင်ကုတ်မြို့ဟာ ၁၄ မိုင်ခန့် အကွာမှာ ရှိပြီး စစ်ကောင်စီဟာ ပြီးခဲ့တဲ့ ရက်ပိုင်းကတည်းကပင် အဲဒီ တန်လွဲရွာမ မြို့ကို လျှပ်စစ်မီးဖြတ်တောက်တာတွေကိုလုပ်ဆောင်ထားခဲ့တယ်လို့ သိရပါတယ်။
အဲဒီလို လျှပ်စစ်ဖြတ်တောက်မှုလုပ်ဆောင်ထားတာကြောင့် အေအေ ရဲ့ နယ်မြေတာဝန်ခံ နဲ့ စစ်ကောင်စီတပ် ဖွဲ့ဝင်အကြား စကားများပြီး နှစ်ဖက်တင်းမာမှု ရှိပြီးတဲ့ နောက်မှာ စစ်ကောင်စီက အခုလို လေကြောင်းကနေတဆင့် ဗုံးကြဲ တိုက်ခိုက်တာ ကို လုပ်ဆောင်ခဲ့တာ ဖြစ်နိုင်တယ်လို့ နောက်ထပ်တောင်ကုတ်ဒေသခံ တစ်ဦးက သုံးသပ်ပြောဆိုပါတယ်။
“တိုက်ပွဲ ဖြစ်တာတော့မရှိဘူး။တန်းလွဲရွာမကိုတော့ စစ်ကောင်စီ မီးဖြတ်ထားတာ ၃ ရက်လောက်တော့ ရှိပြီး။ကျနော်ကြားရသလောက် ကတော့ အေအေ ရဲ့ နယ်မြေတာဝန်ခံဆိုတဲ့ သူက မီးဖိုးတွေကို ကောက်ပြီး ဖြတ်စားထားလို့ စစ်ကောင်စီအဖွဲ့ဝင်တွေ သွားတောင်းတဲ့ အခါမှာ မပေးလို့ အဲဒီ နယ်မြေတာဝန်ခံ နဲ့ စစ်ကောင်စီတပ်ဖွဲ့ဝင်တွေ နဲ့ စကားများကြတယ်လို့သိရတယ်။အဲဒါကြောင့် အခုလို စစ်ကောင်စီက လေကြောင်းကနေ ဗုံးကြဲတိုက်ခိုက်တာဖြစ်နိုင်တယ်လို့” သူကပြောပါတယ်။
တောင်ကုတ်မြို့နယ် အတွင်းမှာ စစ်ကောင်စီ နဲ့ အာရက္ခတပ်တော် အေအေ တို့ဟာ အရင်ကတည်းကပင် နှစ်ဖက်စစ်ရေး တင်းမာ နေတာတွေ ရှိနေပြီး စစ်ကောင်စီဟာ ဒေသခံပြည်သူတွေ နေထိုင်ရာ နေရာတွေကို လေကြောင်းက ဗုံးကြဲတိုက်ခိုက်တာကို မကြာခဏဆိုသလို လုပ်ဆောင်နေတာတွေလည်း ရှိပါတယ်။
အဲဒီလို လေကြောင်းဗုံးကြဲတိုက်ခိုက်တာကြောင့်လည်း မကြာခဏဆိုသလို အရပ်သားထိခိုက်သေဆုံးမှုတွေလည်း ရှိနေကြရတယ်လို့ ဒေသခံတွေကပြောဆိုကြပါတယ်။
CAN ၊ ဖီးနစ်။
