ရန်ကုန် – စစ်တွေ ကားလမ်းဘေးမှာရှိတဲ့ မြောက်ဦးမြို့ နယ်အတွင်းက လင်းမြွေတောင် စခန်းက စစ်ကောင်စီ တပ်သားတွေဟာ ဒီနေ့ မနက်ပိုင်းမှာ စခန်းကို စွန့်ခွါထွက်ပြေးသွားကြတယ်လို့ မျက်မြင်ဒေသခံတွေကပြောပါတယ်။
အဲဒီလင်းမြွေတောင်တပ်စခန်းကို ပြီးခဲ့တဲ့ ၂၀၁၉ မှာ စတင်တပ်စွဲထားတာဖြစ်ပြီး စခန်းအတွင်းမှာ ရှိတဲ့ စစ်ကောင်စီတပ်သား အင်အား ၆၀ ခန့်ဟာ ဒီနေ့မနက်ပိုင်း မှာ စခန်းကိုစွန့်ခွါထွက်ပြေးသွားကြတာဖြစ်တယ်လို့ မျက်မြင်ဒေသခံတစ်ဦးကပြောပါတယ်။
“ဒီနေ့မနက် ၆ နာရီလောက်မှာ စစ်ကောင်စီတပ်သားတွေ စခန်းကို စွန့်ခွာထွက်ပြေးသွားကြပါတယ်။ ကျောက်တော်အခြေစိုက် စစ်ဆင်ရေးကွပ်ကဲမှုဌာနချုပ် – စကခ (၉) ဘက်ကို ခြေလျင်ထွက်သွားတာတွေ့ရပါတယ်”လို့ ဆိုပါတယ်။
မြောက်ဦးမြို့နယ် အတွင်းက စစ်ကောင်စီတပ်စခန်းတွေကို သိမ်းပိုက်နိုင်ဖို့အတွက် ရက္ခိုင့်တပ်တော် အေအေက ပြီးခဲ့တဲ့ ဒီဇင်ဘာလ ၂၄ ရက်နေ့ ကတည်းကပင် ထိုးစစ်ဆင်တိုက်ခိုက်နေတာလည်းဖြစ်ပါတယ်။
အဲဒီထွက်ပြေးသွားကြတဲ့ စစ်ကောင်စီ တပ်သား အင်လအား ၆၀ ခန့်ဟာ တိမ်ညိုရဲစခန်းကထွက်ပြေးလာတဲ့ စစ်ကောင်စီတပ်နဲ့ ပူးပေါင်းထားတဲ့ တပ်ဖြစ်တယ်လို့လည်း ခိုင်မာတဲ့ သတင်းအရင်းအမြစ်က သိရပါတယ်။
လက်ရှိမှာတော့ အဲဒီလင်းမြွေတောင် တပ်စခန်းမှာ စစ်ကောင်စီတပ်သားအင်အား အနည်းငယ် ကျန်ရှိနေတာကို တွေ့ရသေးတယ်လို့လည်း ဒေသခံသတင်းအရင်းအမြစ် တွေကဆိုပါတယ်။
လက်ရှိ လင်မြွေတောင်စခန်း အနီမှာ စစ်ကောင်စီ တပ်နဲ့ ရက္ခိုင့်တပ်တော် အေအေတို့ တိုက်ပွဲဖြစ်ပွားနေတာကြောင့် အနီးအနားမှာရှိတဲ့ ရှာရှည်ပြင်၊ ထိပ်ဝပြင်၊ လိပ်ဆင်းပြင်၊ ကျီရာပြင်၊ အိုးထိမ်း စတဲ့ ကျေးရွာက ဒေသခံတွေဟာ ဘေးလွတ်ရာကို ထွက်ပြေးတိန်းရှောင်နေကြရပါတယ်။
“ဒီနားတဝိုက် မှာတော့ ဒေသခံတွေ မရှိကြတော့ဘူး။ဘေးလွတ်ရာကို အကုန်ထွက်ပြေးသွားကြပြီးဖြစ်တယ်။ အခု လင်မြွေတောင်နားမှာလည်း စစ်ရေးတင်းမာနေတယ်။အခန်းတွေမှာလည်း စစ်ကောင်စီတပ်သားတွေ နည်းနည်း ရှိသေးတယ်ဆိုတော့ တစ်ဖက်ကို စစ်ကူလွတ်တာလားတော့ မသိသေးဘူး။စခန်းမှာတော့ ရှိသေးတယ်”လို ပြောပါတယ်။
ဒီနေ့ မနက်ပိုင်း မှာလည်း မြောက်ဦးမြို့အတွင်းမှာ စစ်ကောင်စီ ခမရ (၃၇၇) နဲ့ ခမရ (၅၄၀) တပ်ရင်း တွေက လက်နက်ကြီးတွေ နဲ့ ကျေးရွာတွေကို အဆက်မပြတ် ပစ်ခတ်နေတာတွေ ရှိတယ်လို့ ဒေသခံတွေကပြောပါတယ်။
မြောက်ဦးမြို့ကို ရက္ခိုင့်တပ်တော် အေအေ က ပြီးခဲ့တဲ့ ဒီဇင်ဘာ ၂၄ ရက် နေ့က စတင်ထိုးစစ်ဆင် တိုက်ခိုက်ခဲ့ပြီး ၂၆ ရက်နေ့မှာတော့ မြောက်ဦးခရိုင်ရဲစခန်းကို သိမ် းပိုက်နိုင်ခဲ့တယ်လို့ အေအေ ဖက်က ထုတ်ပြန်ခဲ့သလို
ဒီဇင်ဘာ ၃၀ ရက် နေ့မှာလည်း မြောင်းဘွေရဲစခန်းကို အပြီးသတ် သိမ်းပိုက်နိုင်ခဲ့တယ်လို့ ထုတ်ပြန်ခဲ့ပါတယ်။
