စစ်တွေ မြို့နယ် အတွင်းမှာ ရှိတဲ့ တောကန်ကျေးရွာကို စစ်ကောင်စီတပ်တွေ က ဒီနေ့ ဇန်နဝါရီလ ၁၅ ရက်နေ့ မနက် ပိုင်းမှာ နေအိမ်တွေကို မီးရှို့ဖျက်ဆီးနေတာကြောင့် လူနေအိမ်တွေ မီးလောင်ပျက်စီးနေတယ်လို့ စစ်တွေ ဒေသခံတွေ ကပြောပါတယ်။
အဲဒီကျေးရွာကို လက်နက်ကြီး ကျရောက် ပေါက်ကွဲတာမဟုတ်ဘဲ စစ်ကောင်စီတပ်သားတွေ က မီးဝင်ရောက်ရှို့နေတာဖြစ်တယ်လို့ စစ်တွေ မြို့က မျက်မြင်ဒေသခံ တစ်ဦးက ပြောပါတယ်။
“လက်နက်ကြီး ကျပြီး မီးလောင်နေတာမဟုတ်ဘူး။ လက်နက်ကြီး ပစ်တာမရှိဘူး။စစ်ကောင်စီ တပ်သားတွေ ရွာကို ဝင်ပြီးမီးရှို့ နေတာဖြစ်တယ်။အခုတော့ ရွာတစ်ခုလုံးမီးလောင်နေတယ် ပေါက်ကွဲသံတွေ လည်း ကြားနေရတယ်”လို့ သူကပြောပါတယ်။
အလုမီးလောင်နေတဲ့ တောကန်ကျေးရွာဟောင်းဟာ အိမ်ခြေ ၂၀၀ကျော်ရှိပြီး ပြီးခဲ့တဲ့ ၂၀၂၃ ခုနှစ် ဒီဇင်ဘာလ ၂၂ ရက်နေ့ကလည်း စစ်ကောင်စီတပ်တွေ က တစ်ကြိမ် မီးရှို့ ဖျက်စီးခဲ့တာလည်း ရှိခဲ့ပါတယ်။
အဲဒီလို ၂၀၂၃ ခုနှစ် စစ်ကောင်စီတပ်က လူနေအိမ်တွေ ကို မီးဝင်ရှို့ဖျက်ဆီးခဲ့တဲ့ အချိန်ကတည်းကပင် ဒေသခံတွေဟာ ကျေးရွာအတွင်းကနေ ဘေးလွတ်ရာသို့ထွက်ပြေးတိန်းရှောင်နေကြတဲ့ ကျေးရွာတစ်ခုလည်း ဖြစ်ပါတယ်။
တောကန် ကျေးရွာ အတွင်းကနေ ထွက်ပြေးတိန်ရှောင်နေသူ အမျိုးသမီးတစ်ဦးက “ ပထမတစ်ကြိမ် မီးရှို့ ကတည်း က ကျမတို့ အိမ် မီးလောင်ပျက်စီးသွားခဲ့ရပြီး ဖြစ်တယ်။စစ်ကောင်စီက အပြစ်မရှိတဲ့ ဒေသခံ ပြည်သူတွေ နေအိမ် တွေ ကိုဆက်တိုက်မီးရှို့နေတာဖြစ်တယ်။ ကျမတို့ အနှစ်နှစ် အလအလ စုဆောင်းပြီးတည်ဆောက်ထားတဲ့ နေအိမ် တွေ ကို သူတို့ ရည်ရွယ်ချက်ရှိရှိ နဲ့ ဖျက်ဆီးနေတယ်လို့ ”သူကပြောပါတယ်။
စစ်ကောင်စီဟာ အပြစ်မဲ့ပြည်သူတွေ နေအိမ်တွေကို ရည်ရွယ်ချက် ရှိရှိနဲ့ မီးရှို့ ဖျက်ဆီးနေတာဟာ စစ်ရာဇဝတ်မှု ကို ပြောင်ပြောင်တင်းတင်း ချိုးဖောက်နေတာ ဖြစ်တယ်လို့ နိုင်ငံရေး လေ့လာသုံးသပ်သူတွေကပြောပါတယ်။
ပြီးခဲ့တဲ့ လပိုင်းတွေ ကလည်း ပေါက်တောမြို့နယ် အတွင်းက မနော်သီရိကျေးရွာ၊ပုဏ္ဏားကျွန်းမြို့နယ် အတွင်းက ခမောင်းတော၊ရဲရိုပြင်ကျေးရွာတွေ ကို မီးရှို့ဖျက်ဆီးခဲ့သလို ပေါက်တော၊မင်းပြား၊မြောက်ဦး၊ရမ်းဗြဲမြို့နယ်တွေ ထဲက ကျေးရွာတွေကို လေကြောင်းနဲ့ ဗုံးကြဲတာ ၊လက်နက်ကြီးတွေ နဲ့ ပစ်ခတ်တာ၊ မီးဝင်ရှို့ ဖျက်ဆီးတာတွေကြောင့် နေအိမ်တွေ၊ ဈေးတွေ၊သာသနိက အဆောက်အဦးတွေ များစွာပျက်စီးခဲ့ရပါတယ်။
ရခိုင်မှာ စစ်ကောင်စီတပ်တွေ နဲ့ ရက္ခိုင့်တပ်တော် အေအေတို့အကြား ၂၀၂၃ ခုနှစ် နိုဝင်ဘာလ ၁၃ ရက်နေ့ ကတည်းကပင် တိုက်ပွဲတွေ အပြင်းအထန်ဖြစ်ပွားနေပြီး စစ်ကောင်စီ တပ်တွေ က လူနေရပ်ကွက်တွေ၊ ကျေးရွာတွေ၊ရှေ့ဟောင်းသုသေန နေရာတွေကို လက်နက်ကြီးတွေ ၊ဒရုန်းတွေ ၊တိုက်လေယာဉ်တွေ နဲ့ ဗုံးကြဲတိုက်ခိုက် တာတွေအပြင်စစ်ကောင်စီတပ်ဖွဲ့ဝင်တွေ ကိုယ်တိုင် နေအိမ်တွေ ကို မီးရှို့ဖျက်ဆီးနေတာလည်း ဖြစ်ပါတယ်။
