ရခိုင်မှာ စစ်ရှိန်မြှင့်တိုက်ခိုက်မယ်လို့ စက်တင်ဘာလ ၂၇ ရက်နေ့က ထုတ်ပြန်ပြီးနောက်ဂွမြို့နယ်အတွင်းက ကျောက်ပါးစပ်ကျေးရွာ အပါအဝင် နေရာ ၃ နေရာမှာ အာရက္ခတပ်တော် အေအေ နဲ့ စစ်ကောင်စီတော့ တိုက်ပွဲ အပြင်းအထန်ဖြစ်ပွါးနေတာ ရှိနေတယ်လို့ ဒေသသတင်းအရင်းမြစ်တွေ ကဆိုပါတယ်။
အာရက္ခတပ်တော် အေအေ အနေ နဲ့ ရခိုင်မှာ သိမ်းပိုက်ဖို့ကျန်ရှိနေသေးတဲ့ မြို့တွေ နဲ့ မပြီးပြတ်သေးတဲ့ စစ်ကောင်စီတပ်စခန်းအားလုံးကို စစ်ရှိန်မြှင့်တိုက်ခိုက်မယ်လို့ ထုတ်ပြန်ပြီးနောက်ပိုင်းမှာ ဂွမြို့နယ် အတွင်းက ကျောက်ပါးစပ်၊ဆားချက်၊ကိုင်းခုံစတဲ့ ကျေးရွာအနီးတဝိုက်မှာ သေနတ်ပစ်ခတ်သံတွေ ပြန်လည်ကြားလာရတာ ဖြစ်တယ်လို့ အဲဒီအနီးအနားမှာ ရှိတဲ့ ဒေသခံ တစ်ဦးကပြောပါတယ်။
“ညတုန်းကလည်းတစ်ညလုံးပစ်ကြတယ် ။တော်တော် ပြင်းပြင်းထန်ထန်ဖြစ်ကြတာ။ကျနော်တို့ အိပ်တောင်မအိပ်ရဘူး လက်နက်ကြီး ပစ်ခတ်သံ လက်နက်ငယ်ပစ်ခတ်သံတွေ နဲ့ တော်တော် ပြင်းပြင်းထန်ထန် ဖြစ်ကြတာ ဖြစ်တယ်လို့” အဲဒီဒေသခံ ကပြောပါတယ်။
အာရက္ခတပ်တော် အေအေ ရဲ့ စက်တင်ဘာလ ၂၇ ရက်နေ့ ထုတ်ပြန်ချက်မှာတော့ ဂွမြိုနယ်အတွင်းက ကျောက်ပါးစပ်ရွာရဲ့ အရှေ့တောင်ဘက် မီတာ (၁၀၀၀) ခန့်အကွာ ကျိန္တလီကားလမ်းမအနီးက တောင်ကုန်းမှာ စက်တင်ဘာလ (၂၄) ရက်နေ့က ၃ နာရီအကြာတိုက်ပွဲ ဖြစ်ပွါးခဲ့တာ ရှိတယ်လို့ ထုတ်ပြန်ထားပါတယ်။
လက်ရှိမှာလည်း စစ်ကောင်စီတပ်စခန်းတွေ ဖြစ်တဲ့ ကုလားပြင်(ရတာနမြိုင်)ရဲစခန်း နဲ့ ကြွေချိုင်ကမ်းခြေမှာ အခြေချထားတဲ့ စစ်ကောင်တပ်စခန်းတွေက လက်နက်ကြီးပစ်ကု ပေးတာ ရှိသလို ဂန့်ဂေါ်တောင်ဆည် အနီးဝန်းကျင်ကိုလည်း စစ်ကောင်စီက လေကြောင်းတိုက်ခိုက်မှု တွေ လုပ်ဆောင်နေတာ ရှိနေတယ်လို့ နောကထပ်ဒေသခံ တစ်ဦးကပြောပါတယ်။
“ နှစ်ဖက် ပစ်ခတ်မှုကတော့ မနက် ၁၀ နာရီလောက်မှာ ရပ်သွားတယ်။အခုကတော့ စစ်ကောင်စီက လက်နက်ကြီးတွေ နဲ့ပစ်နေတယ်။ ညတုန်းကတော့လိုနှစ်ဖက်ဖြစ်လို့ပစ်နေတာ တော့မဟုတ်ဘူး စစ်ကောင်စီက တစ်ဖက်သတ် ပစ်နေတာ။လေကြောင်းကလည်း ဂန့်ဂေါ်တောင် ဆည်အနီးကို ၂ခေါက် ဗုံးလာကြဲတာရှိတယ်လို့”သူကပြောပါတယ်။
အာရက္ခတပ်တော်အေအေ ဟာ ရခိုင်တကျော့ပြန်တိုက်ပွဲ အတွင်းမှာ ရခိုင်က မြို့ကြီး တွေ ဖြစ်ကြတဲ့ ပေါက်တော၊ မင်းပြား၊ မြောက်ဦး၊ ကျောက်တော်၊ မြေပုံ၊ ပုဏ္ဏားကျွန်း၊ ရမ်းဗြဲ၊ ရသေ့တောင်၊ ဘူးသီးတောင်၊ သံတွဲမြိုတွေအပြင် ပလက်ဝဒေသကိုပါ အပြီးသတ်သိမ်းပိုက်ထားနိုင်ပြီးဖြစ် ပါတယ်။
အဲဒီနောက် သိမ်းပိုက်ဖို့ ကျန်ရှိနေသေးတဲ့ မောင်တောမြို့ အပါအဝင် တောင်ကုတ်၊ ကျိန္တလီ၊ ဂွ၊ အမ်း၊ စစ်တွေ၊ ကျောက်ဖြူ၊ မာန်အောင်မြို့တွေကိုပါ အပြီးသတ်သိမ်းပိုက်နိုင်ဖို့အတွက် ဆက်လက်ထိုးစစ်ဆင်တိုက်ခိုက်သွားမယ်လို့ အေအေက ပြောဆိုထားပါတယ်။
CNA၊ဂူးဂူး။
