ရခိုင်မှာ အာရက္ခတပ်တော်အေအေ အနေနဲ့ သိမ်းပိုက်ဖို့ကျန်နေသေးတဲ့ မြို့တွေက စစ်ကောင်စီတပ်စခန်းတွေ ထိုးစစ်အရှိန်မြှင့်တိုက်ခိုက်သွားမယ်လို့ စက်တင်ဘာလ ၂၇ ရက်နေ့ ကထုတ်ပြန်ပြီးနောက် မောင်တောမြို့ အပါအဝင် ရခိုင်က မြို့တွေကိုလကြောင်းတိုက်ခိုက်တာ ရက်ဆက်ပြုလုပ်လာနေတာတွေ တွေ့ရတယ်လို့ ဒေသခံ သတင်းအရင်းအမြစ်တွေကပြောပါတယ်။
အဲဒီလို စစ်ရေးအရှိန်မြှင့်တိုက်ခိုက်မယ်ဆိုတာကို အာရက္ခတပ်တော် အေအေက ပြီးခဲ့တဲ့ စက်တင် ဘာလ ၂၇ ရက်နေ့မှာ ထုတ်ပြန်ခဲ့ပြီးနောက် စက်တင်ဘာလ ၂၈ ရက်နေ့တစ်ရက်လုံး မောင်တောမြို့ကို လေကြောင်းတိုက်ခိုက်ခဲ့တာတွေ လုပ်ဆောင်ခဲ့တာ ဖြစ်တယ်လို့ မောင်တော ဒေသခံတစ်ဦးကပြောပါတယ်။
“စကစ လေကြောင်းတိုက်ခိုက်တာကတော့ အရင်တုန်းကလည်းတိုက်ခိုက်နေတာတော့ရှိပါတယ်။ဒါပေမယ့် ပြီးခဲ့တဲ့ ၂၈ ရက်နေ့ကတော့ နေ့ပါ ညပါ ဆက်တိုက် လေကြောင်းတိုက်ခိုက်တာကို လုပ်တာဖြစ်တယ်။ အခုမောင်တောမှာက နခခ ၅ တစ်ခုပဲကျန်တော့တာလေ အဲဒီနေရာအနီးဝန်းကျင် တွေကို Y-12 နဲ့ လေကြောင်းက ပစ်တယ် ပြီးတော့ ရိက္ခတွေ၊လက်နက်ခဲယမ်းတွေကိုလည်း လေထီးတွေ နဲ့ ချပေးတာမြင်ရတယ်လို့ ”သူကပြောပါတယ်။
စစ်ကောင်စီအခုလို လေကြောင်းတိုက်ခိုက်မှု ဆက်တိုက်လုပ်ဆောင်ခဲ့တာကြောင့် မောင်တောမြို့နယ် အတွင်းက အမှတ် (၂)ရပ်ကွက် ၊မြို့မ နဲ့ ငါးခူရ မွတ်ဆလင်ကျေးရွာတွေက နေအိမ်တွေ ဟာ မီးလောင်ပျက်စီးတာတွေလည်း များစွာရှိနေတယ်လို့ ဒေသခံ တွေကပြောပါတယ်။
အဲဒီလိုဘဲ စက်တင်ဘာလ ၂၉ ရက်နေ့ကလည်း စစ်တွေ နဲ့ ပုဏ္ဏားကျွန်းမြို့နယ် အတွင်းက ကျေးရွာတွေ နဲ့ လေကြောင်းတိုက်ခိုက်တာတွေကို လည်း စစ်ကောင်စီက လုပ်ဆောင်ခဲ့တာတွေ ရှိတယ်လို့စစ်တွေ ဒေသခံ တစ်ဦးကပြောပါတယ်။
“မနေ့က မနက်ပိုင်းမှာ စစ်တွေက တောကန်၊မင်းလှ၊ဝါဘိုရွာတွေကို စစ်ကောင်စီက Y-12 နဲ့လေကြောင်းတိုက်ခိုက်တာရှိခဲ့တယ်လို့ သိရတယ်။စစ်တွေမှာတော့ စစ်ကောင်စီက စစ်ရေးအတွက် ခိုင်ခိုင်မာမာ ပြင်ဆင်နေတာတွေ ရှိတယ်။ပြီးတော့ ပုဏ္ဏားကျွန်းက ကွမ်းတောင်၊အောင်မြေကုန်း နေရာတွေကိုလည်း ဗုံးကြဲတယ်လို့ သိရတယ် ထိခိုက်မှု အခြေအနေတွေကိုတော့ ကျနော်တို့ မသိရသေးဘူးလို့”သူကပြောပါတယ်။
အာရက္ခတပ်တော်အေအေ နဲ့ စစ်ကောင်စီတို့ဟာ စစ်တွေ မြို့နယ် အတွင်းမှာ နှစ်ဖက်စစ်ရေးတင်းမာမှုတွေ ရှိနေပြီး စစ်ကောင်စီကတော့ အေအေ ရဲ့ထိုးစစ်ကို ခုခံတိုက်ခိုက်ဖို့အတွက် ခံစစ်အနေ စစ်တွေမြို့တွင်းမှာ စစ်အင်အားတိုးချဲ့ထားတာ ဘန်ကာတွေ အခိုင်အမာတည်ဆောက်တာတွေ ရှိတယ်လို့ စစ်တွေ ဒေသခံတွေက ပြောဆိုကြပါတယ်။
CNA၊ခိုင်မြတ်ထူး။
