ရခိုင်ကစစ်ကောင်စီထိန်းချုပ်မှုအောက်မှာ ရှိနေဆဲဖြစ်တဲ့ တောင်ကုတ်၊မာန်အောင် နဲ့ အမ်းမြို့နယ်တွေမှာ စစ်ကောင်စီက မနေ့ကအောက်တိုဘာလ ၁ ရက်နေ့ကစတင်ကာ လူဦးရေသန်းခေါင်စာရင်းတွေ စတင်ကောက်ယူနေပြီး ဖြစ်တယ်လို့ ဒေသခံတွေကပြောပါတယ်။
အဲဒီလို စစ်ကောင်စီက သန်းခေါင်စာရင်းကောက်ယူတဲ့နေရာမှာ လူဦးရေနဲ့ဆိုင်တဲ့ မေးခွန်း ၁၁ ခု၊ ပြည်တွင်း ရွှေ့ပြောင်း သွားလာမှု နဲ့ဆိုင်တဲ့ မေးခွန်းခြောက်ခု၊ ပညာရေးနဲ့ဆိုင်တဲ့ မေးခွန်း ခြောက်ခု၊ လုပ်သား အင်အားနဲ့ဆိုင်တဲ့ မေးခွန်း ခုနှစ်ခု၊ မွေးဖွားမှုနဲ့ဆိုင်တဲ့ မေးခွန်း ကိုးခု၊ မသန်စွမ်းနဲ့ဆိုင်တဲ့ မေးခွန်းတစ်ခု၊ ပြည်ပရွှေ့ပြောင်း သွားလာ မှုနဲ့ဆိုင်တဲ့ မေးခွန်း ရှစ်ခု၊ အိမ်အကြောင်းအရာ မေးခွန်း ၁၃ ခု၊ သေဆုံးမှု၊ ကိုယ်ဝန်ဆောင်မှုနဲ့ မိခင်သေဆုံးမှုနဲ့ ဆိုင်တဲ့ မေးခွန်း ခုနစ်ခု စုစုပေါင်း မေးခွန်း ၆၈ ခု နဲ့ အချက်အလက်တွေ စတင်ကောက်ယူနေတာ ဖြစ်တယ်လို့ တောင်ကုတ်ဒေသခံတစ်ဦးက Coastal News Agencyသတင်းဌာနကို အခုလို ပြောပါတယ်။
“မနေ့က စကောက်တယ် တောင်ကုတ်မှာက ။ လဝက၊ထွေအုပ်၊ရဲ အစုံပါတယ်။ ဦးဆုံးကတော့ လူဦးရေ နဲ့ အိမ်ထောင်စု စာရင်းအချက်အလက်တွေပါတယ်။တော်တော်များတယ် အခုမေးခွန်းတွေက ပြည်ပထွက်ခွါတဲ့ သူတွေ ရဲ့ အကြောင်းအ ရင်း အသေးစိတ်တွေကိုလည်း ဖြေရတယ် ။ကျနော်တို့ သူတို့လာကောက်လို့သာ ပေးရတာ မဆိုင်တဲ့ အကြောင်းအရာတွေကို မေးတဲ့ မေးခွန်းတွေလည်းပါနေတယ်လို့မြင်တယ်လို့”သူကပြောပါတယ်။
စစ်ကောင်စီ အနေ နဲ့ လက်ရှိလူဦးရေ သန်းခေါင်စာရင်းကောက်ယူနေမှု အပေါ်မှာ ရခိုင်ပြည်သူတွေ အနေ နဲ့ စိတ်ဝင်စားမှု မရှိပေမယ့် စစ်ကောင်စီရဲ့ လူဦးရေစာရင်းကောက်ယူနေမှု မေးခွန်းတချို့ အပေါ်မှာ ပြည်သူတွေကို စိတ်ပိုင်ဆိုင်ရာ ထိခိုက်မှု အခြေအနေတွေ နဲ့ ကြုံတွေ့ နေကြရတယ်လို့ တောင်ကုတ်ဒေသခံတွေက ပြောပါတယ်။
အဲဒီလိုပဲစစ်ကောင်စီဟာ မနေ့က မာန်အောင် နဲ့ အမ်းမြို့နယ်တွေက မြို့ပေါ်ရပ်ကွက်တွေမှာ လည်း သန်းခေါင်စာရင်းစတင်ကောက်ယူမှုတွေကို လုပ်ဆောင်နေတာရှိပြီး အဲဒီသန်းခေါင်စာရင်ကောက်ယူမှုအချက်အလက်တချို့ အပေါ်မှာ ပြည်ပထွက်ခွါသွားတဲ့ သူတွေ နဲ့ပတ်သက်ပြီး အချက်အလက် အသေးစိတ်မေးမြန်းဖြေကြားရတဲ့အတွက် တချို့ကိစ္စတွေအတွက် စိုးရိမ်စိတ်တွေ ရှိနေတယ်လို့ မာန်အောင်မြို့ဒေသခံတစ်ဦးက ပြောပါတယ်။
“ကျမတို့အရမ်းစိတ်ထဲမှာ မတင်မကျ ဖြစ်တဲ့ မေးခွန်းတွေက ပြည်ပရွှေ့ပြောင်းသွားလာရခြင်း အကြောင်းအရင်းကို မေးတဲ့ အခါမှာ မြန်မာနိုင်ငံက ဘယ်တုန်းကထွက်ခွါသွားတာလဲ ဆိုတဲ့မေးခွန်းတွေက ကျမတို့အခုဖြစ်နေတဲ့ နိုင်ငံရေး အခြေအနေ နဲ့ အရမ်းစိုးရိမ်ဖို့ကောင်းတဲ့ မေးခွန်းပေါ့ပြီးတော့ ပညာရေးဆိုင်ရာမေးခွန်းတွေမှာလည်း ဘာကြောင့်ကျောင်းမတက်တာလဲ ဆိုတဲ့ မေးခွန်းတွေက စိုးရိမ်ဖို့ကောင်းတယ်လို့” သူကပြောပါတယ်။
အဲဒီလို မေးခွန်းတွေကို လူဦးရေသန်းခေါင်စာရင်းအတွက် အသုံးပြုတာ မဟုတ်ပဲ တစ်ခြားကိစ္စတွေ အတွက် အသုံးချမှာလာခဲ့ရင် ကိုလည်း ပြည်ပကို ထွက်ခွါပြီး အလုပ်လုပ်ကိုင်နေတဲ့ မိသားစုဝင်တွေအတွက် အခက်အခဲ ဖြစ်မှာကိုလည်း စိုးရိမ်တယ်လို့ သူကဆိုပါတယ်။
စစ်ကောင်စီအနေ နဲ့ သူတို့ထိန်းချုပ်ထားဆဲဖြစ်တဲ့ ရခိုင်က မြို့နယ်တွေမှာ လာမည့် ၂၀၂၅ ခုနှစ်မှာ ပြုလုပ်မယ့် ရွေးကောက်ပွဲ အတွက်ဆိုတဲ့ ရည်မှန်းချက်နဲ့ အောက်တိုဘာလ (၁)ရက်ကနေ ၁၅ ရက် အတွင်းမှာ ဒီလူဦးရေ သန်းခေါင်စာရင်းကို အပြီးသတ် ကောက်ယူ သွားဖို့ ပြင်ဆင်ထားတယ်လို့လည်း သိရပါတယ်။
လက်ရှိ ရခိုင်မှာ အာရက္ခတပ်တော်အေအေ ဟာ ပေါက်တော၊ ရမ်းဗြဲ၊ မြေပုံ၊ မင်းပြား၊ မြောက်ဦး၊ ကျောက်တော်၊ ပုဏ္ဏားကျွန်း၊ ရသေ့တောင်၊ ဘူးသီးတောင်မြို့နယ်တွေကို အပြီးသတ် သိမ်းပိုက် ရရှိထားပြီးဖြစ်သလို မာန်အောင်၊ တောင်ကုတ်၊ဂွ၊မောင်တော၊အမ်း၊စစ်တွေ နဲ့ ကျောက်ဖြူမြို့နယ်တွေကိုလည်း အပြီးသတ် သိမ်းပိုက်နိုင်ဖို့ အတွက် ထိုးစစ်ဆင် တိုက်ခိုက်နေတာလည်း ရှိပါတယ်။
အဲဒါကြောင့် စစ်ကောင်စီအနေ နဲ့ လက်ရှိသူတို့ ရည်မှန်းထားတဲ့စစ်ကောင်စီလုပ်မယ့်ရွေးကောက်ပွဲဟာ ရခိုင်မှာ ဖြစ်လာနိုင်စရာာအကြောင်းမရှိသလို လက်ရှိကောက်ယူမှုဟာလည်း ဘာမှအသုံးဝင်မှာ မဟုတ်ဘူးလို့ စစ်ကောင်စီထိန်းချုပ်မှုအောက်မှာ ရှိနေတဲ့ ပြည်သူတွေက သုံးသပ်ပြောဆိုမှုတွေလည်း ရှိနေကြပါတယ်။
CNA၊ ဂူးဂူး။
