ကျောက်ဖြူမြို့ ၊ဇင်ချောင်းတိုက်နယ်အတွင်းမှာ စစ်ကောင်စီတပ်တွေ နဲ့ အာရက္ခတပ်တော် အေအေတို့ မနေ့က ညနေ ၂ နာရီကျော်လောက်မှာ နှစ်ဖက် အပြန်အလှန်ပစ်ခတ်မှုတွေ ရှိခဲ့တယ်လို့ ဒေသခံ သတင်းအရင်းမြစ်တွေက ပြောပါတယ်။
ဇင်ချောင်းတိုက်နယ် အတွင်းမှာ ရှိတဲ့ ကျောက်ခလေရွာ နဲ့ ဝက်မျှောင်ကျေးရွာ အနီးက ပြင်လယ်ပြင်မှာအချေစိုက်ထားတဲ့ စစ်ကောင်စီ နေဗီ ၃ စီးက လက်နက်ကြီးနဲ့ စတင်ပစ်ခတ်ခဲ့တာကြောင့် နှစ်ဖက် အပြန်အလှန် ပစ်ခတ်မှုတွေ ဖြစ်ပွါးခဲ့တာ ဖြစ်တယ်လို့ ဇင်ချောင်းဒေသခံတစ်ဦးကပြောပါတယ်။
“စစ်ကောင်စီနေဗီက ကမ်းနာကိုကပ်လာပြီးတော့ အဲဒီနားကတောင်တန်းတွေကို လက်နက်ကြီးတွေ နဲ့ပစ်လို့ အေအေက ပြန်ပစ်တယ်လို့သိရတယ်။အများကြီး အကြာကြီး ပစ်ခတ်မှု ဖြစ်ခဲ့တာတော့မဟုတ်ဘူး။တစ်ဖက် ၅ ချက်လောက်ပဲ ပစ်ခတ်မှုဖြစ်ခဲ့တာ”လို့ သူကပြောပါတယ်။
အဲဒီပစ်ခတ်မှု အပြီးမှာ စစ်ကောင်စီ နေဗီတွေဟာ အဲဒီအနီးဝန်းကျင်ကနေ ပြန်လည်ဆုတ်ခွါသွားတယ်လို့ ဒေသ သတင်းအရင်းမြစ်တွေကပြောပါတယ်။
စစ်ကောင်စီတပ်တွေဟာ ကျောက်ဖြူ နဲ့ မာန်အောင်ကြား ပင်လယ်ပြင်အနီးမှာ ငါးဖမ်းလှေတွေ နဲ့ နေဗီတွေကို အသုံးပြုကာ မာန်အောင် နဲ့ကျောက်ဖြူမြို့တွေကို စက်လက်နက် နဲ့ ရိက္ခာဖြည့်တင်းတာ တွေကို လုပ်ဆောင်တာတာတွေကိုလည်း ဆက်တိုက်လုပ်ဆောင်နေတာတွေ ရှိနေတယ်လို့လည်းသိရပါတယ်။
CNA၊မြတ်သူ(သတင်းတို)
