CNA၊ဖီးနစ်။
တောင်ကုတ်မြို့နယ်အတွင်းက ကင်းတောင်ကျေးရွာကို စစ်ကောင်စီက ဒီနေ့စက်တင်ဘာလ ၄ ရက်နေ့ မနက် ၂နာရီခန့်က လေကြောင်းက ဗုံးကြဲတိုက်ခိုက်ခဲ့တာကြောင့် အရပ်သားပြည်သူ ၄ ဦးသေဆုံးခဲ့ရပြီး ၇ ဦးထက်မနည်းတဲ့ ဒေသခံဟာလည်း ဒဏ်ရာအပြင်းအထန် ရရှိခဲ့ရတယ်လို့ ကနဦး သတင်းတွေ အရ သိရပါတယ်။
စစ်ကောင်စီဟာ အဲဒီကင်းတောင်ကျေးရွာကို တိုက်ပွဲတစ်စုံတရာ ဖြစ်ပွါးတာမရှိပဲ အခုလို အများပြည်သူ အိပ်ပျော်နေချိန်မှာ ရည်ရွယ်ချက် ရှိရှိ နဲ့ လူနေရပ်ကွက်တွေကို လာရောက်ဗုံးကြဲတိုက်ခိုက်ခဲ့တာ ဖြစ်တယ်လို့ ကင်းတောင်ကျေးရွာ ဒေသခံ တစ်ဦးကပြောပါတယ်။
“မနက် ၂ နာရီလောက်မှာတိုက်ခိုက်ခဲ့တာပါ မိုးကလည်းရွာနေတယ် ဗုံးလာကြဲတဲ့ အချိန်မှာ။ဗုံးကြဲတာကတော့ ကင်းတောင် အထက်ပိုင်း နဲ့ အောက်ပိုင်းတွေကို ကြဲသွားတာ ၂လုံးတွဲ ၂ ကြိမ်စီလာကြဲသွားတာ ဖြစ်တယ် သေတာက ၄ ဦး ဒဏ်ရာရတာက ၇ ဦးရတယ်လို့”သူကပြောပါတယ်။
သေဆုံးသူ ၄ ဦးထဲမှာ အမျိုးသမီး ၃ ဦး နဲ့ အမျိုးသား ၁ ဦးဖြစ်ပြီး ဒဏ်ရာရရှိသူတွေထဲမှာ ကလေးငယ်တွေလည်း ပါဝင်နေတယ်လို့လည်း ဆိုပါတယ်။အခုလေကြောင်းတိုက်ခိုက်ခံခဲ့ရတဲ့ ကင်းတောင်ကျေးရွာမှာ အိမ်ခြေ ၁၀၀၀ ခန့် ရှိတဲ့ ကျေးရွာတစ်ရွာဖြစ်သလို တောင်ကုတ်မြို့ နဲ့ ၁၀ မိုင်ခန့် အကွာမှာ ရှိတဲ့ ကျေးရွာတစ်ရွာလည်း ဖြစ်ပါတယ်။
လက်ရှိ ဒဏ်ရာရလူနာတွေကို အရေးပေါ်ဆေးကုသရေးတွေ အတွက် တောင်ကုတ်ဆေးရုံသို့ ပို့ဆောင်နေတာတွေ ရှိနေတယ်လို့လည်း ကင်းတောင်ကျေးရွာဒေသခံ တစ်ဦးကပြောပါတယ်။
“အခုက ဒဏ်ရာရ လူနာတွေကို ဆေးရုံပို့ဖို့သွားနေကြပါတယ်။ဒဏ်ရာရတဲ့ သူတွေ ထဲမှာတော့ ကလေးရောလူကြီးရောပါတယ်။ဒဏ်ရာတွေကို ခြေထောက်ပြတ်လက်ပြတ်တွေပါပါတယ်။တော်တော်ပြင်းပြင်းထန်ထန် တွေ ရထားတာပါလို့”သူကပြောပါတယ်။
ပြီးခဲ့တဲ့ အောက်တိုဘာလ ၂ ရက်နေ့ကလည်း တောင်ကုတ်မြို့နယ် အတွင်းက ခေါင်းလောင်းတူကျေးရွာကို စစ်ကောင်စီက လေကြောင်းက ဗုံးကြဲတိုက်ခိုက်ခဲ့တာကြောင့် နေအိမ်တွေပျက်စီးခဲ့ရသလို ကလေးငယ်တစ်ဦးဟာလည်းထိခိုက်ဒဏ်ရာ ရရှိတာရှိခဲ့ပါတယ်။
စစ်ကောင်စီဟာ ဒီရက်ပိုင်းအတွင်း တောင်ကုတ်မြို့နယ် အတွင်းမှာတိုက်ပွဲတစ်စုံတရာ ဖြစ်ပွါးတာ မရှိပဲ ကျေးရွာတွေကို လေကြောင်းတိုက်ခိုက်တာ မကြာခဏဆိုသလိုလုပ်ဆောင်နေတာကြောင့် ဒေသခံပြည်သူတွေဟာလည်း ထိခိုက်သေဆုံးဒဏ်ရာ ရရှိတာတွေ ရှိနေရပါတယ်။
