CNA၊ဖီနစ်၊မြတ်သူ။
တောင်ကုတ်မြို့နယ် အတွင်းက ကင်းတောင်ကျေးရွာကို ဒီနေ့ ညနေ ၄ နာရီလောက်မှာ စစ်ကောင်စီက လေကြောင်းကထပ်မံ ဗုံးကြဲတိုက်ခိုက်ခဲ့တာကြောင့် ကလေးငယ် ၁ ဦး သေဆုံးခဲ့ရပြီး နောက်ထက် ကလေးငယ် ၁ ဦးအပြင်းအထန် ဒဏ်ရာရရှိခဲ့တယ်လို့ ဒေသခံတွေကပြောပါတယ်။
စစ်ကောင်စီဟာ အဲဒီကင်းတောင်ကျေးရွာကို ဒီနေ့ မနက် ၂ နာရီဝန်းကျင်လောက်မှာလည်း လေကြောင်းတိုက်ခိုက်မှု လုပ်ဆောင်ခဲ့တာကြောင့် စစ်ကောင်စီပစ်ချလိုက်တဲ့ ဗုံး ၄ လုံးထဲက တစ်လုံးဟာ ကင်းတောင်ကျေးရွာအထက်ပိုင်းကလူနေအိမ်ကို ကျရောက်ပေါက်ကွဲကာ အရပ်သားပြည်သူ ၄ ဦးသေဆုံးခဲ့ရပြီး ၇ ဦးထက်မနည်းတဲ့ ဒေသခံဟာလည်း ဒဏ်ရာအပြင်းအထန် ရရှိခဲ့ရပါတယ်။
အဲဒီနောက်ဒီနေ့ ညနေ ၄ နာရီမှာလည်း ဂျက်ဖိုက်တာ တစ်စီး နဲ့ ဗုံးထပ်မံလာရောက်ကြဲချခဲ့တာကြောင့် ကလေးငယ် တစ်ဦးသေဆုံးပြီး နောက်ထပ်ကလေးငယ်တစ်ဦး ဒဏ်ရာရရှိသွားခဲ့ရတယ်လို့ ဒေသခံ တစ်ဦးက အတည်ပြုပြောပါတယ်။
“ဒီနေ့ ညနေ ၄ နာရီလောက်မှာ စစ်ကောင်စီက ဗုံးထက်ပြီးလာကြဲတာ ကင်းတောင် မီးသတ်ရုံးနာကို ကျပြီးတော့ ကလေးငယ်တစ်ယောက်သေတယ်၊နောက်တစ်ယောက်ကတော့ ခြေထောက်တစ်ဖက်ပြတ်သွားခဲ့ရတယ်။လူနေအိမ်တွေလည်း ပျက်စီးသွားခဲ့ရတယ်လို့”သူကပြောပါတယ်။
စစ်ကောင်စီဟာ အဲဒီကျေးရွာအတွင်းမှာ တိုက်ပွဲတစ်စုံတရာ ဖြစ်ပွါးနေတာမရှိဘဲ အကြိမ်ကြိမ်လာရောက်ဗုံးကြဲတိုက်ခိုက်တာတွေ လုပ် ဆောင်နေတာကြောင့် ကင်းတောင်ကျေးရွာအတွင်းက ဒေသခံပြည်သူတွေဟာကျေးရွာအတွင်းမှာ မနေထိုင်ရဲတောပဲ ထွက်ပြေးနေကြရတယ်လို့ လည်း ဒေသခံ တစ်ဦးကပြောပါတယ်။
“ကျေးရွာကလူတွေ အကုန်ပြေးနေကြပြီ။တစ်ယောက်မှလည်းမနေရဲကြတော့ဘူး အကြောင်းမဲ့သက်သက်လာပြီးတော့ ဗုံးကြဲတိုက်ခိုက်နေတာအခုဟာက ကျနော်တို့ပြည်သူတွေကို အသေသတ်နေတာဖြစ်တယ်လို့ “သူကပြောပါတယ်။
ရခိုင်စစ်မြေပြင်မှာ စစ်ရေးအရှုံးနဲ့ရင်ဆိုင်နေရတဲ့ စစ်ကောင်စီဟာ ပြီးခဲ့တဲ့ စက်တင်ဘာလ အတွင်းကပင် တိုက်ပွဲဖြစ်ပွါးတာတွေ မရှိတဲ့ မြို့တွေကိုလေကြောင်းက မကြာခဏဆိုသလို ဗုံးကြဲတိုက်ခိုက်တာတွေကို လုပ်ဆောင်နေတာတွေလည်း ရှိနေပါတယ်။
အဲဒီလိုဗုံးကြဲတိုက်ခိုက်မှုတွေ ဆက်တိုက်လုပ်ဆောင်နေတာကြောင့် အာရက္ခတပ်တော် အေအေ အပြီးသတ်သိမ်းပိုက်ထားပြီး ဖြစ်တဲ့ သံတွဲမြို့နယ်အတွင်းကစစ်ဘေးရှောင်တွေ နေထိုင်နေတဲ့ သဘာဝပတ်ဝန်းကျင်ရုံးကို လေကြောင်းတိုက်ခိုက်ခဲ့တာကြောင့် အရပ်သား စစ်ဘေးရှောင် ၁၄ ဦးအစုလိုက်အပြုံလိုက်သေဆုံးတာရှိခဲ့သလို ဒဏ်ရာ ရသူလည်း ၂၅ ဦးထိရှိခဲ့ပါတယ်။
CNAရဲ့ မှတ်တမ်းတွေအရ ရခိုင်မှာ စစ်ကောင်စီ ကအကြောင်းမဲ့သက်သက် လေကြောင်းတိုက်ခိုက်မှု လက်နက်ကြီးပစ်ခတ်မှု တွေကို လုပ်ဆောင်ခဲ့တာကြောင့်စက်တင်ဘာလ တစ်လအတွင်းမှာ အရပ်သား သေဆုံးထိခိုက်ဒဏ်ရာ ရရှိသူ ၆၈ ဦးထိရှိခဲ့တာကိုလည်းတွေ့ရပါတယ်။
