CNA၊ မြတ်သူ။
အမ်းမြို့နယ်အတွင်းက စစ်ကောင်စီရဲ့လက်ကျန်တပ်စခန်းတွေထဲက တစ်ခုဖြစ်တဲ့ မဲတောင်ဗျူဟာစခန်းတစ်ခုလုံး ကို အာရက္ခတပ်တော် အေအေ က အောက်တိုဘာလ (၇) ရက်၊ ညနေ (၃) နာရီ (၅၀) မိနစ်မှာ အပြီးသတ်သိမ်းပိုက်ရနိုင်ခဲ့ပြီးဖြစ်တယ်လို့ အာရက္ခတပ်တော် အေအေက သတင်းထုတ်ပြန်လာပါတယ်။
အဲဒီ မဲတောင်ဗျုဟာကုန်းဟာ အမ်း နပခ ဌာနချုပ် နဲ့ အဖြောင့်တိုင်း (၁၄) ကီလိုမီတာခန့်အကွာမှာ ရှိတဲ့ စစ်ကောင်စီရဲ့ဗျူဟာစခန်းတစ် ခုလည်းဖြစ်ပြီး အဲဒီဗျူဟာစခန်းတစ်ခုလုံးကို အပြီးသတ်သိမ်းပိုက်နိုင်ဖို့အတွက် ဝိုင်းရံပိတ်ဆို့ ဖြတ်တောက်ထားတာဟာ ကာလအတန် ထိကြာမြင့်နေပြီးလည်းဖြစ်တယ်လို့ ဆိုပါတယ်။
အဲဒီနောက် အမ်းမြိုနယ်၊ ကျောက်စကွဲကျေးရွာရဲ့ အနောက်ဘက် မီတာ (၄၀၀) ခန့်အကွာအဝေးမှာ စက်တင်ဘာလ ၂၆ ရက်နေ့ ကတည်းကပင် စစ်ကောင်စီတပ်တွေ နဲ့ အာရက္ခတပ်တော် အေအေတို့ဟာ နှစ်ဖက်တိုက်ပွဲ ဖြစ်ပွါးခဲ့တာဖြစ်ပြီးနောက် မဲတောင်ဗျူဟာကုန်း ရဲ့ စခန်းတွေကို တစ်ခုပြီးတစ်ခု သိမ်းပိုက်နိုင်ခဲ့တာလည်းဖြစ်ပါတယ်။
အဲဒီ မဲတောင်ဗျူကုန်းမှာ စစ်ကိုင်းတိုင်း၊ ကလေး၊ မော်လိုက်၊ ဟုမ္မလင်းအခြေစိုက် စကခ (၁၀) လက်အောက်ခံ တပ်ရင်းတွေဖြစ်ကြတဲ့ ခမရ (၃၆၂/၃၆၅/၃၆၉) တပ်ရင်းများ၊ အမ်း၊ နပခ ဌာနချုပ်လက်အောက်ခံ တပ်ရင်းတချို့ ပါဝင်တဲ့ ဗျူဟာတစ်ခုလည်းဖြစ်ပါတယ်။
ဒါ့အပြင် စကခ (၅) လက်အောက်ခံ ခမရ (၃၄၆/ ၃၇၃/ ၃၇၂) တပ်ရင်းတွေ စုပေါင်းထားတဲ့ တပ်ရင်းတွေလည်း ပါဝင်ပြီး အဲဒီတပ်ရင်းတွေ ဟာမဲတောင် နဲ့ အမ်းဌာနချုပ်ပတ်ဝန်းကျင်မှာ လှုပ်ရှားတာလည်းရှိတယ်လို့ ဆိုထားပါတယ်။
မဲတောင်ဗျုဟာ ကုန်းသိမ်းတိုက်ပွဲအတွင်းမှာ အာရက္ခတပ်တော် အေအေ အနေ နဲ့ လက်နက်ခဲယမ်း၊ စစ်အသုံးအဆောင်ပစ္စည်းတွေကို လည်း သိမ်းဆည်းရမိခဲ့တယ်လို့ ဆိုထားပါတယ်။
အာရက္ခတပ်တော် အေအေ အနေ နဲ့ ဒီရက်ပိုင်းအတွင်းမှာ ရခိုင်ကသိမ်းပိုက်ဖို့ကျန်နေသေးတဲ့ ဂွမြို့နယ် ကျိန္တလီမြို့အတွင်းက စစ်ကောင်စီတပ်စခန်းတွေ ဖြစ်တဲ့ ကိုင်ခုံ နဲ့ကံဂေါ်တောင်အခြေစိုက် စစ်ကောင်စီတပ်စခန်းတွေကိုလည်း အောက်တိုဘာလ ၆ ရက်နေ့မှာ သိမ်းပိုက်ရယူနိုင်ခဲ့ပါတယ်။
အဲဒီနောက် မောင်တောမြို့နယ် အတွင်းက လက်ကျန် တပ်စခန်းတစ်ခုဖြစ်တဲ့ နခခ ၅ ကိုလည်း အပြီးသတ်သိမ်းပိုက်ရရှိနိုင်ဖို့ အတွက် ဆက်လက်ထိုးစစ်ဆင်တိုက်ခိုက်နေတယ်လို့လည်းဆိုပါတယ်။
ဒါ့အပြင်တောင်ကုတ်မြို့နယ် အတွင်းက စစ်ကောင်စီရဲ့ စကခ (၅) လက်အောက်ခံတပ်ရင်းတွေ ဖြစ်ကြတဲ့ ခမရ (၃၄၆/၅၄၄) တပ်စခန်း တွေ နဲ့ တခြားသောစစ်ကောင်စီရဲ့ စခန်းတွေကိုလည်း အာရက္ခတပ်တော် အေအေက ဝိုင်းရံပိတ်ဆို့တာတွေကို လုပ်ဆောင်ထားပြီး အပြီးသတ်သိမ်းပိုက်ရရှိနိုင်ဖို့ အတွက်လည်း ဆက်လက်ဆောင်ရွက်နေတယ်လို့ ထုတ်ပြန်ပြောဆိုထားပါတယ်။
