CNA၊မြတ်သူ။
စစ်ကောင်စီက မတရားဖမ်းဆီးခေါ်ဆောင်သွားတဲ့ တေးသံရှင်မဆုမြတ်ထက်နဲ့ တွေ့ခွင့်မရတဲ့အတွက် မိသားစုဝင်တွေ စိုးရိမ်နေကြပါတယ်။
တေးသံရှင်မဆုမြတ်ထက်ကို ပြီးခဲ့တဲ့ အောက်တိုဘာလ ၇ ရက်နေ့ နေ့လယ် ၂ နာရီလောက်က သူမနေထိုင်တဲ့ ရန်ကုန်တိုင်း တာမွေမြို့နယ်အတွင်းက နေအိမ်မှာ စစ်ကောင်စီတပ်ဖွဲ့ဝင်တွေက စစ်ဆေးမေးမြန်းစရာ ရှိတယ်လို့ ဆိုကာစစ်ကောင်စီတပ်တွေက ဖမ်းဆီးခေါ်ဆောင်သွားခဲ့တာဖြစ်တယ်လို့ ဆိုပါတယ်။
အဲဒီနောက်မဆုမြတ်ထက်ဟာ ဒီနေ့အချိန်ထိ စစ်ကောင်စီက ပြန်လွတ်ပေးတာ မရှိသေးသလို မိသားစုဝင်တွေနဲ့လည်း တွေ့ ခွင့်မရသေးဘူးလို့ မဆုမြတ်ထက် သူမိသားစုနဲ့ နီးစပ်သူရခိုင်ဒေသခံ တစ်ဦးကပြောပါတယ်။
“ပြန်မလွတ်လာသေးပါဘူး။ခေါ်သွားတုန်းကတော့ စစ်ဆေးမေးမြန်းစရာရှိတယ်လို့ခေါ်သွားတယ်။ဘာအကြောင်းအရာလည်းဆိုတာကိုလည်းမသိဘူး။တွေ့ခွင့်လည်းမရဘူး။ မဆုမြတ်ထက်ရဲ့ ဘဏ်စာအုပ်တွေကိုလည်း သိမ်းသွားတယ်။ရဲတွေက အခုကတော့ မဆုမြတ်ထက်ကို စုံစမ်းရသလောက်တော့ တာမွေရဲစခန်းထဲမှာလို့တော့သိရတယ်လို့”သူကပြောပါတယ်။
ပြီးခဲ့တဲ့ ရက်ပိုင်းက တေးသံရှင်အိမ့်ပန်းချီဟာ သဘာဝရဲ့ တောက်ခေါက်သံတေးသီးချင်းကို ကမူရင်းတေးသံရှင် မဆုမြတ်ထက်နဲ့ တေးရေးဆရာ (ကိုလွမ်းဝေ- သံတွဲ)ဆီမှာ ဒီသီချင်းကို သီဆိုခွင့်ပြုပါလို့ ခွင့်ပြုချက်မတောင်းပဲ စတူဒီယိုမှာ အသံသွင်းထုတ်လုပ်မှု ကိစ္စတွေ နဲ့ပတ်သက်ပြီး အင်တာဗျူးများစွာ ဖြေဆိုပြီးတဲ့နောက်မှာ တေးသံရှင်မဆုမြတ်ထက်ကို စစ်ကောင်စီက အခုလိုလာရောက် ဖမ်းဆီးတာကို ခံခဲ့ရတာလည်းဖြစ်ပါတယ်။
ဒါပေမယ့် အခုလို မတရားဖမ်းဆီးပြီး ၃ ရက်ကြာအထိပြန်လွတ်ပေးခြင်းမရှိသေးတဲ့ အပေါ်မှာလည်း မိသားစုဝင်တွေအနေ နဲ့ စိတ်ပူပင်သောက များနေရပြီး အမြန်ဆုံး ပြန်လွတ်လာဖို့ကိုလည်း မျှော်နေကြတယ်လို့လည်း အဲဒီမိသားစုဝင်တွေ နဲ့နီးစပ်သူတွေကပြောပါတယ်။
“အမြန်ဆုံးပြန်လွတ်ပေးစေချင်တယ်။သူကဘာမှလုပ်တာလည်းမဟုတ်။ဈေးရောင်းတယ် အခုရေဘေးရောက်တော့ ရေဘေးအတွက် အလှူလေးတွေ နည်းနည်းပါးပါး တတ်နိုင်သလောက်လုပ်တယ်။သူ့မှာဘာအပြစ်မှလည်း မရှိဘူး။အဲဒါကြောင့် မြန်မြန်ပြန်လွတ်ပေးစေချင်တယ်လို့“သူကတောင်းဆိုပါတယ်။
တေးသံရှင် မဆုမြတ်ထက်ဟာ ရခိုင်ပြည်နယ်၊မာန်အောင်မြို့၊ပန်းခြံကျေရွာဒေသခံ တစ်ဦးဖြစ်ပြီး ရန်ကုန်တိုင်း တာမွေမြို့နယ် အတွင်းမှာ ဆုမြတ်ထက်ရခိုင်ရိုးရာပိုးထည်ချည်ထည် အမျိုးမျိုးရောင်းဝယ်ရေးဆိုင်လုပ်ငန်းလုပ်ကိုင်နေသူ တစ်ဦးဖြစ်ပါတယ်။
ဒါ့အပြင်တစ်ဖက်မှာလည်း ရေဘေးကူညီကယ်ဆယ်ရေးလုပ်ငန်းတွေမှာ တတ်နိုင်သလောက်ပါဝင်ကူညီဆောင်ရွက်ပေးနေတဲ့ တေးသံရှင် တစ်ဦးလည်း ဖြစ်ပါတယ်။
