ဘူးသီးတောင်မြို့ အမှတ် (၂) ရပ်ကွက် ရွာသစ်က ဝါးခုတ်သွားရာကနေ ပျောက်ဆုံးနေတဲ့ အရပ်သား ၂ ဦးကို ARSAအကြမ်းဖက် လက်နက်ကိုင်အဖွဲ့တွေက ဖမ်းဆီးပြီး ခေါင်းဖြတ်သတ်ကာ မြေမြုပ်ခြင်း ခံထားရတဲ့ အလောင်းတွေကို ဒီနေ့ အောက်တိုဘာလ ၁၀ ရက်နေ့ မနက်ပိုင်းမှာရှာဖွေတွေ့ရှိခဲ့တယ်လို့ အာရက္ခတပ်တော်က သတင်းထုတ်ပြန်လာပါတယ်။
အသက် (၆၇) နှစ်အရွယ် ဦးစံရွှေမောင် နဲ့ အသက်(၆၅) နှစ်အရွယ် ဦးမောင်မြအောင်တို့ နှစ်ဦးဟာ ပြီးခဲ့တဲ့ အောက်တိုဘာလ ၇ ရက်နေ့ မနက် ၈ နာရီက အိမ်ဆောက်လုပ်ဖို့ အတွက် ဂုံးနားရွာဘက်သို့ ဝါးခုတ်သွားရာကနေ ပျောက်ဆုံးနေခဲ့တာ ဖြစ်ပါတယ်။
အဲဒီနောက် ပျောက်ဆုံးနေသူ ဒေသခံ ၂ ဦးကို မိသားစုဝင်တွေ ရဲ့တိုင်ကြားချက်အရ အာရက္ခပြည်သူ့တော်လှန်ရေးအစိုးရ၊ DLEPS အာရက္ခပြည်သူ့ လုံခြုံရေးတပ်ဖွဲဝင်တွေက လိုက်လံရှာဖွေရာ ဒီနေ့ အောက်တိုဘာလ (၁၀) ရက်နေ့မနက် ၇ နာရီ ၄၀ မိနစ်မှာ ဘူးသီးတောင်မြိုနယ်၊ ဂုံးနား (မူဆလင်) ရွာက “ဖာရုပ်” ဆိုသူရဲ့ နေအိမ်ခြံဝင်းအတွင်းမှာ ဒေသခံ ၂ ဦးကို ARSAအကြမ်းဖမ်အဖွဲ့ေ တွက ဦးခေါင်းကိုဖြတ်ပြီး မြေမြှုပ်ထားခဲ့တာကို တွေ့ရှိခဲ့ရတယ်လို့ အာရက္ခတပ်တော် ရဲ့ ထုတ်ပြန်ချက်မှာ ဖော်ပြထားပါတယ်။
အဲဒီလို ရက်စက်စွာသတ်ဖြတ်ခံထားရတဲ့ ဒေသခံ ၂ ဦးရဲ့ ရုပ်အလောင်းတွေကို အာရက္ခပြည်သူ့တော်လှန်ရေးအစိုးရ၊ DLEPS အာရက္ခပြည်သူ့ လုံခြုံရေးတပ်ဖွဲဝင်တွေ၊ အုပ်ချုပ်ရေးဘက်ဆိုင်ရာဝန်ထမ်းတွေ နဲ့ မှုခင်းဆိုင်ရာ ဆေးဘက်ဝန်ထမ်းတွေက ပူးပေါင်းကာ အလောင်းကို သွားရောက်တူးဖော်တာတွေ လုပ်ဆောင်ခဲ့ပြီး လိုအပ်သည်များကို စစ်ဆေးမှု ပြုလုပ်ခဲ့တယ်လို့ ဆိုပါတယ်။
အဲဒီနောက်မှာ ရက်စက်စွာသတ်ဖြတ်ခံလိုက်ရတဲ့ သူ ၂ဦးရဲ့ မိသားစုဝင်တွေကို အာရက္ခပြည်သူ့တော်လှန်ရေးအစိုးရက အလောင်းကို တွေ့ ရှိထားပြီဖြစ်ကြောင်း အကြောင်းကြားခဲ့ပြီး ကောင်းမွန်စွာ ပြန်လည်မြေမြှုပ်သင်္ဂြိုဟ်ပေးတာကို လုပ်ဆောင်ပေးခဲ့တယ်လို့ လည်းဆိုပါတယ်။
ဒါ့အပြင် အာရက္ခပြည်သူ့တော်လှန်ရေး အစိုးရအနေ နဲ့အပြစ်မဲ့ရွာသားနှစ်ဦးကို ရက်စက်စွာ သတ်ဖြတ်သွားခဲ့တဲ့ ARSA မွတ်ဆလင်အကြမ်းဖက် လက်နက်ကိုင်တပ်ဖွဲဝင်တွေကို လိုက်လံရှာဖွေကာ ရှင်းလင်းမှုတွေ လုပ်ဆောင်နေတယ်လို့လည်း ဆိုထား ပါတယ်။
ဘူးသီးတောင် နဲ့ မောင်တောမြို့နယ်တွေမှာ ARSA, RSO မွတ်လဆင်အကြမ်းဖက်လက်နက်ကိုင်တပ်ဖွဲ့တွေဟာဒီရက်ပိုင်း အတွင်းမှာ ပြည်သူတွေ အပေါ် အကြမ်းဖက်လုပ်ရပ်တွေ ခပ်စိပ်စိပ်ပြုလုပ်လာတာတွေ ရှိနေတာကြောင့် မိဘပြည်သူများအနေ နဲ့ အကြမ်းဖက်လုံခြုံရေးဆိုင်ရာ သတိအပြည့်ဖြင့်နေထိုင်ကြဖို့ လိုအပ်သလို မသွားမဖြစ်သွားလာရမည့်ခရီးတွေမှာလည်း လုံခြုံရေးသတိအပြည့် နဲ့ စောင့်ကြည့်ကြဖို့ကို အာရက္ခတပ်တော်က သတိပေးထုတ်ပြန်ထားပါတယ်။
